22 May 2007

KALIMBUBU SI LA DAT NAKAN

Bagi enggo isuratken kami ibas Buletin Anglehta edisi
Natal (Desember 2005) kerna kalimbubu, emaka kalimbubu
enda pe lit ka piga-piga erbage rikutken penggelaren,
hubungen perkade-kaden, bagepe fungsina ibas
adat-istiadat Karo. Kalimbubu ibas kalak Karo si nuria
(ndekah) eme jadi si nangar-nangari runggun (rapat
adat) ras jadi pijer podi itengah-tengah anak beruna.
Erkiteken ia jadi sinangar-nangar, emaka ibas
peradaten kalimbubu biasana ipindo guna mereken
telah-telah entahpe pedah-pedah. Ibas kerja-kerja
megi-megi rusur dahinna, emaka kerna mbuat keputusen
iperluken rusur ‘restu’ entah pe masuken arah pihak
kalimbubu. Emaka kata “ertima kam kentisik” merupaken
kata si megati sibegi ibas runggu. Emaka kalimbubu
ikataken pe kalimbubu ingan nungkun ras ingan mindo.
Konsep ingan mindo enda emaka muncul sibegi perkatan
tuah kalimbubu.

Lit piga-piga erbage kalimbubu si lit ibas kalak Karo,
eme
(1) kalimbubu taneh, eme kalimbubu si manteki kuta,
igelari pe kalimbubu simajekken lulang. Ibas si enda
banci saja lalit hubungen dareh secara langsung,
erkiteken sada kehamaten man bana erkiteken ia pemena
manteki perkutan ibas sada kuta. Sebage contoh,
misalna kutaku Lau Limpek mula-mula ije ipanteki Barus
mergana erbahan perjuman ras barung-barung ije, eme
deher Lau Belume. Ia me siigelari anak nu taneh entah
pe si jadi kalimbubu taneh. Emaka reh me nini opung
(bapa bulang) ku kuta e si mergana Limbeng, bagepe lit
ka Ginting mergana reh ku kuta e. Si telu kalan enda
ringan ibas barung-barung sini ibahan Barus mergana.
Emaka arih-arih me kalak enda teluna, maka Barus
mergana jadi kalimbubu taneh, Limbeng mergana ras
Ginting mergana jadi anak beru taneh, janah ibas
hubungen pe selanjutna maka Limbeng ras Ginting enda
mbuat beru ku Barus mergana. Tambah warina reh buena
jelmana, maka jadi me kesain, she jadi kuta. Jadi
situhuna kalimbubu taneh enda asal-asalna eme
erkiteken kesepakaten erkiteken ia si menai ngiani
sada ingan;
(2) Kalimbubu tua, entah pe rusur ka igelari kalimbubu
bena-bena. Kalimbubu enda enggo lit hubungen dareh,
umpamana kalimbubu bapanta arah nandena, entah pe mama
bapanta. Amin gia ia igelari kalimbubu tua entah pe
bena-bena, tapi biasana reh dauhna, sierkimbang lebih
ndeher;
(3) Kalimbubu simada dareh, eme turang nandenta,
sembuyakna, eme mamanta.
(4) Kalimbubu si erkimbang, eme kalimbubu si mupus
ndeharanta;
(5) Kalimbubu sipemeren. Kalimbubu enda pe tentuna
tingkatenna erbbage-bage, tergantung ku kalimbubu si
apai ia sipemeren, banci ku kalimbubu si erkimbang,
simada dareh, puang kalimbubu, entah pe ku kalimbubu
tua;
(6) Puang Kalimbubu, eme kalimbubu kalimbubunta.
Misalna aku bere Tarigan Tambak, Nande bere Sitepu,
emaka kalak Sitepu enda jadi puang kalimbubuku.
Kalimbubu si bage rupana pe megati igelari sebagai
singalo perkempun entah pe perkempunku ibas ertutur.
Puang kalimbubu sibagenda rupana termasuk pe kalimbubu
ibas kalimbubu si erkimbang nari.
(7) Puang ni puang (kalimbubu), eme kalimbubu si
terakhir kel si kirana denga ibas kelompok kalimbubu,
aminna gia banci denga siban tingkaten si terteruhen,
eme puang-puang ni puang kalimbubu.

Kerina kalimbubu enda adi tingkatenna sada ibabonta
idilo man si dilaki ‘mama’ man si diberu ‘mami’, tapi
adi enggo dua tingkat datasenta emeka idilo ‘bulang’
man si dilaki, ras ‘nini’ man si diberu, ras bage pe
seterusna tingkaten lebih meganjang idilo opung
entahpe empung duana man di dilaki bagepe man si
diberu, tapi tetap ibas posisina sebagai kalimbubu.
Adi teruhen setingkat ia ibas kita biasana idilo
‘permen” man si dilaki ras si diberu. Dua tingkat
teruhenta idilo tetap ‘kempu’ selanjutna kuteruhna
‘ente’ ras pe ‘entah”.

Adi marenda kai sini ikataken kalimbubu la banci
isimbak, adi gundari tentuna enggo lit perubahen,
tergantung pedah siberekenna e. Adi mehuli akap anak
beruna tentuna idalankenna, tapi adi la akapna pantas
idalanken, maka amin gia la secara spontan teridah
ibas ayona, tapi lit lebe ije enggo kesempaten guna
rukur, payo entah lang sini katakenna e (lebih
demokrasi). Erkiteken bage hagana kalimbubu ibas
peradaten, emaka ibas kalak Karo kalimbubu e ikataken
pe “dibata ni idah”, entah pe lit ka singatakenca “si
mupus takal piher”. Erdandanken si e maka ibas kerja
adat kehamaten man kalimbubu e mutlak teridah arah
perbahanen. Misalna, adi nai kerja-kerja nereh empo
(erdemu bayu) biasana nakan kalimbubu lebe ielaken
(kerina kalimbubu ei erbage-bage). Nakan e biasana
ibahan ibas pernakan khusus, bereken piringna, gulenna
(bengkau), bagepe ibedaken ia ras pinggan-pinggan
jelma sieenterem. Adi pinggan kalimbubu adi nai
kuta-kuta lit tutupna kibul sini ibahan ibas bulung
galuh nari. Enggo ser-ser kerina kalimbubu e dat nakan
maka banci elaken nakan man jelma sideban. Entah lit
denga langa ije kalimbubu, emaka biasana ilebuh. Enggo
kundul ije ia maka ilanjutken mbereken nakan man jelma
si rulo.

Aku sendiri pe marenda tahun 70-an, hal sibage rupana
kuidah denga secara langsung, aminna gundari maka
kusadari ertina e kerina. Iajari orang tua kita
marenda gelah mamanta lebe mbuat nakan ras sidebanna.
Tapi tahun 90-an ibas kerja-kerja bas jambur I Medan
sekitarna kerna perpanganen enggo lanai isikapken
sepenuhna anak beru ibas hubungen peradaten (dareh),
aminna gia per-catering banci saja ikategoriken
sebagai anak beru. Tapi ibas pengelanken nakan aminna
gia ikataken “ibas meja kam elai kami” sebagai
ungkapen pehamat kalimbubu ndai ibas kerja-kerja,
lambat laun berubah ka. Lanai pihak kalimbubu e lebe
inomorsadaken muat nakan ku meja, tapi ise sindeherna
ku meja. Biasana adi enggo ndeher ku jam sada, enggo
mulai reh deherna kalak ku meja ingan nakan sikapken.
Adi enggo keri nakan bas meja, tapi kalimbubu la denga
dat nakan, emaka ibas kerja e muncul sada jenis
kalimbubu si mbaru éme kalimbubu si la dat nakan.
(jl).

Bekasi 5 September 2006

1 comment:

Andreas Tarigan said...

Nina tua tua si adi kamibubu em kap dibata siidah

About Me

My photo
Bekasi, Jawa Barat, Indonesia
Etnomusikolog