12 July 2019

Cerpen : TUAH NANDE

TUAH NANDE TUAH
Julianus P. Limbeng
Erbekas denga ibas pusuhku seh gundari kai nina anakku man bangu asum ia peberkat kami nerusken sekolahna ku Bandung. “Sehat-sehat kam ya nande, totokenndu aku anakkndu, gelah banci pagi seh suran-suranta” nina Tuah nadingken kami ras bapana, bagepe agina Cirem ras Mencen. Biang kami Si Pancur pe ngkibas-kibasken ikurna ikut erndele ate penading Tuah, erkiteken ras ia rusur ku juma kenca mulih sekolah. Megati pe mulih ku rumah baba Tuah ras Si Pancur napuh ulih erburu bas kerangen deher peken kami. Kulitna biasana luak Tuah jadi tutup gendang karo. Tulan-tulanna me biasana jadi sikerajangen Pancur. Dakep Tuah pe Pancur, emana pe takalna. “Tading ko lebe jenda ya nak….” Nina Tuah. Berkat me ia erlajang. Sekolah. Mberat memang kuakap, erkiteken ia ngenca pupus kami dilaki.
Telu tahun kenca Tuah berkat, agina Cirem pe mindo maka ia pe ngelanjutken sekolahna ku Pulau Jawa. Amin gia nina nande marenda adi diberu labo perlu meganjangsa sekolahna, sebab man kalak ka nge ia pagi, janah ku dapur nge pagi dahinna nina nande marenda, tapi kami ras Bapa Tuah la pang nulak sura-sura Cirem. Emaka peberkat kami ka me ia pe ku Jawa sekolah. “Tutus kel ateku sekolah nande, gelah banci pagi terulin kegeluhenta, emaka totokendu pagi maka mejile pagi perdalanen persekolahenku”, nina Cirem. Tading me i kuta kami teluna ras kakakna Mencen, erkiteken Mencen anak kami sintengah lit sitik kekurangenna. Ia lahir premature, janah pernah bas sada paksa melas kulana, janah kenca si e lit sitik masalah bas perkembangenna. Sekolah pe ia labo beluhsa kel. Tapi kai pe dahikenna tutus kel atena. Emaka ia me teman kami kuta, janah ia pe labo nggit nerusken sekolah, erkiteken namatken SD saja pe ndekah kel ia. Awalna memang labo terterima kami bage keadaanna, tapi ndekah-ndekah enggo me akap kami biasa saja ras bapana.
Tuhu meriah kel ukur kami, maka kai sini belasken anak kami marenda ope berkat tuhu-tuhu erdalan alu mehuli. Duana anak kami enggo banci dung sekolahna, janah la ndekahsa minter ka ia duana dat dahin i Pulau Jawa. “Adi la kami sekolah Bandung enda, mungkin entah labo kam seh Bandung enda… hehehe…” nina Tuah man kami sanga gawah-gawah kami babana ku Lembang. Bagepe kenca piga-piga wari Bandung, berkat ka kami ku Bali, ingan Cirem erdahin. Ije pe meriah tuhu-tuhu akap kami ibabana keliling-keliling ku ingan si cukup mejile kel pemandangenna. Dua minggu dekahna mulih kami ku kuta, janah jumpa ka kami mulihi ras pupus kami Mencen. Sada sisi turah ateku megogo erkiteken Mencen la ikut ras kami. La ningen kami mela, tapi lit sitik bas pusuh kami permelana erkiteken keadaanna. Padahal teluna kel ia ndarat ibas bertinku nari. Tadingken kami ia ras Bibina kuta. Meriah ukurna ngaloken luah ibaba kami ibas turang ras agina, bagepe Bibi ras Bengkilana ngaloken luah permenna nari.
Kenca duana anak kami enggo erbahan jabuna, janah sukses pe ibas pendahinna, bagepe kempu-kempu kami enggo lit 4 kalak, emaka tuhu-tuhu jadi keriahen man kami amin gia lit sitik ngganjalna bas pusuhku, erkiteken Tuah sikusuraken ndube erjabu ras impalna, tapi buatna beru iKaroken. Bagepe Cirem amin gia jumpa ras kalak Karo, tapi jarang kel mulih ku kuta. “Ras kami saja kam Bali ras Bapa Nande… I rumah kam banci la akapndu latih, sekalian ras Tengah Mencen banci kam tading ras kami..” nina. Aku kueteh nge maka kata anakku Cirem e tuhu-tuhu ibas pusuhna nari. Tapi kuukuri makai a enggo lit emanna nggeluh, janah aku pe ndauh lebih sikapen nge akap kami tading bas jabu kami. Tading bas rumah kami. Emaka Natal ras Tahun Baru ngenca kesempaten kami jumpa ras anak-anak bagepe kempu kerina. Sangana kempu-kempu kami kitik denga marenda, mulih kenca ku kuta nambah kel riahna akap kami. Banci baba kami kempu ndurung ku sabah, bagepe mbuat durin sangana erbuah i peken. Kempu-kempu pe meriah kel tuhu-tuhu akapna adi mburtas kolam kenca. Itangkapna nurung badau ras nurung emas alu durung i kolam. Sibenter-benteren kubang ia ras anak-anak sideban bas kolam kami. Amin gia enggo piga-piga tahun ia nadingken kuta, entabeh denga akapna cibet, nurung timah-timah, bagepe cih ras kohol. Tapi kempu-kempu bagepe ras permen kami la ia pet. Bage gia, tuhu-tuhu meriah kel akap kami erkiteken banci ersada pulung. Kupujiken rusur man kalak sideban keberhasilen anak-anakku. Kubanggaken rusur ia duana bas perpulungen jabu-jabu. Kalak pe megati mujiken kami uga berhasil ndidik anak janah berhasil pe bas karirna. Sangap kel kam nina kalak man bangku.
Kenca umurku enggo metua, anak-anakku pe enggo mbue kesibukenna, bagepe kempu-kempuku kerina enggo sibuk bas persekolehenna. Emaka rukur aku, anakku Mencen, parang anak sintengah langa erjabu. Singuda-nguda pangke. Janah umur kami duana ras bapana enggo metua nandangi ben. Janah tenaga pe enggo me bagi sikurang. Ku juma pe lanai bo ngasep. Mencen me ibas keterbatasenna banci ngurusi juma ras sabah kami. Mencen me mbaba kami ras bapana hampir dua minggu sekali ku Puskesmas ertambar ras ngurus BPJS kami. Duana kami ras bapana enggo buen man tambar asa man nakan. Pegancih kami ku rumah sakit.
Pernah piga-piga kali pupus kami si Tuah tugas ku Medan. Memang sempatkenna nge lalap singgah ku kuta ndahi kami. La iarap enggo lit parkir motor lebe-lebe rumah, janah nusur me Tuah taruhken supir. La setengah jam pe enggo ka ia mulih ku Medan. Tadingkenna man kami sen, bagepe man agina Mencen. Sibuk. Emaka Medan me ia medem. Janah mulih ka ku Jawa. Kirimina rusur sen man kami, tapi situhuna kel labo ate kami malem, erkiteken ulih juma ras sabah kami saja pe situhuna cukup nge pan kami teluna. Janah labo sen na e arapken kami. Adina mulih pe ia wari natal ras tahun baru piga-piga tahun terakhir, lanai ia medem jabu kami, ija ije ia tubuh janah ngkeriken waktuna sanga danak-danak marenda. Alasenna la banci anak-anakna medem. Erkiteken enggo kebiasaan ingan medemna la bagi ingan medem kami. Tapi kamar hotel enggo ia tunduh i Medan. Amin gia enggo mulai nggir-gir kupala-palai ndurung gelah entabeh kari ate anakku ndai man ateku. Cibet-cibet simarenda biasa pindo Tuah adi mulih ku kuta, sikutanggerken pe lanai panganna. “Labo dalih nande, aku manganca, entabeh kuakap cibet-cibet ras timah-timah si enggo tasakkenndu e”, nina Mencen man bangku. Morah ateku. Ugape entabeh nari nge kari akap anakku, erkiteken ndekah la panna ateku. Tapi aku ka nge ras anakku si Mencen ngkerikenca.
Tahun-tahun berikutna pe enggo bage. Setiap tahun baru ibahanna perjumpan keluarga. Man ras-ras janah iundangna pe pendeta terkenal khutbah, rikut pe kibot ras perkolong-kolongna. Anak kuta pe ikut undang, janah besur man kerina. Tapi kenca acara dung, mulih ka ia ku Medan, janah lanai ia pernah tunduh bas rumah kami. Tatapna ngenca inganna medem marenda. Setahun sekali ngenca ia reh. Wari-wari lambang e, Mencen me teman kami ras. Mencen me siperdiateken kami. Mencen si la pernah kupujiken erkiteken lalit sekolahna. Mencen si jarang kubaba gawah-gawah erkiteken keterbatasenna. Mencen singurusi sabah ras juma kami. Mencen simbaba kami ertambar ras bapana. Mencen sinanggerken nakan kami. Mencen sinaptapi baju kami tupung kami kurang sehat. Mencen…. Mencen si banci muat ukurku seh gundari. Mencen si la kuperdiateken sedekah enda me jadi inganku ergani-gani.
Kenca mulih anakku Tuah, tangis me aku sisada ngukuri kerna kecibal kegeluhen e. Ije kugejapken situhuna, isekin anakku situhuna. Anakku simperdiateken aku ras bapana, anakku situhu-tuhu meteh ukurku, eme anakku si la enggo pernah kupujiken. Anakku si la kuperdiateken kel bagi kaka ras agina sikupujiken. Anakku si la kusekolahken meganjang bagi abang ras agina. Anaku sidiberu si la kuanggap penting kel erkiteken la penerus keturunen Bapana. Anakku Mencen, diberu si biasana baba kalak ku jabuna. Anakku Mencen sikubedaken kel ras kaka ras agina.
Tengah berngi, sangana badeh kel pertunduh anakku Mencen, kudahi kuinganna medem. Kuselimuti nahena, janah kuema kurumna silambak galuhen erkiteken kena matawari. Kurumna si la melinang erkiteken ku sabah ras ku juma. Nahena si ciang-ciangen erkiteken kena las ras jarang ercekili. “Anakku, keleng kel ateku. Salah kel aku nandendu anakku, sayang nandena. Ampuni kel aku Tuhan… kurang kuperdiateken kam sedekah enda. La kam pernah kupujiken sedekah enda, tapi kam kap simeteh pusuhku, si banci muat ukurku. Nemani geluhku ibas pudi geluhku, umurku metua”, bage me ningku bas ukurku janah iluhku pe naktak bas kurumna. Erkiteken iluhku mambur bas ayona, emaka medak me ia, janah sengget ia ngidah aku. “Kai atendu nande? Uga maka kam ngandung?’ nina janah ndakep aku. La kuturiken kai si lit bas pusuhku, tapi dakepenna nambah malem kel ateku er-anakken Mencen singkelengi aku. Kusimpan saja pas pusuhku kai sikuukurken bas bengi ndai. Tapi ndekut kel bas pusuhku ateku jadi man Mencen, janah keleng ateku simbages. “Tunduh kam nande, ndekah denga erpagi-pagi..” nina. La tertunduhken aku mis, rukur aku ndekah uga tak-tak kegeluhen enda, janah sora kirik sierderik nari ngenca kubegi, ras sora padek ernong-nong, bagepe sora perbulangenku sekali-sekali mengker. Bene.
​​​​​​Senayan – Jakarta, 17 Juni 2019.

1 March 2018

NAMO DUNG-DUNG


NAMO DUNG-DUNG

Julianus P Limbeng

Sanga aku anak-anak ndube tahun 1970-an, ope tunduh Nande Beru Tarigan Tambak ndube, megati kel erbahan turi-turin ope aku medem. Salah sada turi-turin sini pernah turikenna janah kuinget seh gundari eme Namo Dung-Dung. Turi-turin enda kutulis, mperingeti nande beru tarigan, pas kel telu tahun enggo ngadap man Dibata.

Hio.., nai i Lau Belumai lit me sada turi-turin kerna dung-dung, eme sada binurung bagi belut si lit nggeluh ibas sada namo i Lau Belumai. Turi-turin enda cukup termur-mur sekitar daerah Serdang hulu.

Lau Belumai eme sada lau si cukup mbelin, lau e me jadi tapin anak kuta, janah ije me ingan anak kuta ridi, naptapi gonjei, mbuat lau, nawen bubu, salir, bagepe ingan engkawil. Tuhu mbue binurungna, lit can-can, jurung, sibaro, gampual, kaperas, ­dung-dung ras sidebanna. I tepi lau e mbue denga je bantang kayu, termasuk lit sada batang kayu si seh kel galangna, eme batang tualang. Launa pe maler julu nari meciho kel, emaka melas ate nginemsa amin gia langa tanggerken. Ije pe lit sada sumbul si launa mbergeh kel.

Ibas lau e, lit me sada namo si mbages janah mbelang. Ban bagesna meratah me rupana. Ije me biasa pernanden naptapi baju. Ibas sada paksa, sekalak pernanden mbaba anakna ku lau janah naptapi. Lit me teridah itengah namo bagi bunga kacemba, rupana mentar ku megersingna, janah njoler bas namo e nari. Erkiteken teridah mejile, emaka anak kitik si baba pernanden ndai mindo man nandena gelah ibuat bunga kacemba ndai. “Mbages…” nina nandena. Tapi erkiteken lalap pindo anakna ndai, emaka ipala-palai pernanden ndai me erlangi ku tengah namo mbuat bunga kacemba ndai. Tapi bage kenca seh pernanden ndai itengah namo. Minter bagi irintakken ku teruh pernanden ndai. Bene. Lanai teridah. Tading me anakna ndai tangis serko sekalak i lau, erkiteken lanai idahna nandena. Kenca lit kalak ku lau, idapetina me anak ndai sekalak ngandung, janah nandena lanai teridah. Idarami pe segedang lau ku jahe tapin, tapi lanai teridah nandena ndai. Bagem la ieteh anak kuta ku ja lawesna pernanden ndai.

La ndekahsa kenca kejadin si ndai. Lit ka pernanden ras anakna ku lau. Idahna ka bagi bunga kacemba ndai ibas namo. Bunga ndai mulgap teruh nari janah mutar-mutar ibas namo e. Mejile tuhu rudang e janah minter kin turah ate mbuatsa. Erkiteken mejile teridah rudang ndai, emaka ilangi anakna me erkiteken enggo ndeher ku tepi tapin. Bage ibuat anakna ndai, emaka anakna ndai pe langsung bene bagi sirintakken e. Emaka she kel senggetna pernanden ndai janahna serko, ngidah maka bunga kacemba ndai kepeken dilah dung-dung si seh kel belinna. Anakna ndai enggo ibendut dung-dung si galang. Serko me pernanden ndai mulih ku kuta janah entam-entamkenna takalna ku taneh. Isungkuni la tersungkuni. “Anakku… anakku enggo ipangan dung-dung…” nina janah serko. Emaka kiam me anak kuta ku lau, tapi kai pe lanai teridah ije.

Mbiar me anak kuta. Lanai ise pe pang ridi ku tapin. Lanai pang naptapi ras mbuat lau. Mehantu me akap anak kuta lau e. Erkiteken dua kesah ije bene. Bagepe dung-dung si galang e pe enggo iakap mehantu, janah lit keramatna, emaka ipanna jelma. Pulung dingen runggu me anak kuta uga carana gelah banci dung-dung si galang e itangkap. Lit deba ngatakenca la banci kawili, sebab adi dung-dung enggo galang e tandana dung-dung keramat, banci saja jadi tula man sada kuta. Tapi lit ka deba ngatakenca arus itangkap dingen bunuh, sebab lanai banci ku lau, janah turah kebiaren man anak kuta. Kedungenna iputus me gelah dung-dung e itangkap.

Bagi asil runggu, emaka ibahan me tinali kawil ibas nali sienteguhna, janah empanna ibahan me manuk megersing sibiasa ibahan jadi kahul. Erpagi-pagi berkat me anak kuta ku lau, janah ibas namo e teridah ka me mulgap teruh lau nari bagi bunga kacemba. Ibenterken me ku namo manuk ndai. La man timan ndekah, minter me ipan dung-dung kawil ndai. Bage itarik, retap me tinali ndai. Pepagina ibahan anak kuta ka me tinali tergalangen, janah empanna anak babi jarah-jarah. La ndekahsa mis ka ipanna empan ndai. Emaka mis itarik piga-piga perbapan. Tapi latertarik. Emaka isampati kerina anak kuta me nariksa erkiteken mberatna nariksa tinali kawil si galang ndai. Tuhu-tuhu mesera nariksa. Kenca ndarat takalna tepi tapin, sengget kel anak kuta erkiteken la pernah idahna bage galangna dung-dung. Ipala-palai me Tarik anak kuta. Enggo pe seh bas kesain, ikur dung-dung e bas lau denga. Bageme galangna dung-dung enda. Rikut ras rawa janah ngilas, emaka ibunuh me dung-dung enda, janah ibagi-bagiken man anak kuta, ijadiken gulen. Ise si la ikut nariksa maka la dat panggung.  Dung-dung e me ibahan anak kuta gulen ciger bagepe gulen berngi. Sisana pe mbue denga.

Emaka kenca sundut matawari bengket ku berngina, lit tempa turah kebiaren man anak kuta erkiteken ngidah galangna dung-dung ndai. Daging sisa iparaken gelah ula maru. Sekalak ngenca pernanden janda la ikut ku lau engkawil ndai erkiteken enggo metua janah kurang sehatna. Tengah berngi kenca anak kuta enggo mulai badeh pertunduhna, emaka terbegi me sora penganak erdeping-deping ibas bang kayu tualang nari, “Pong…. Pong… ulihken gendit ku ndai…..” La erngadi-ngadi terbegi sora e datas batang kayu ndai nari. “Pongg…. Pongg….. ulihken kena bentingku ndai …..ulihken gendit ku ndai” nina.  Kenca bage sora e lanai idatas batang tualang nari, tapi enggo keliling-keliling tengah kesain. Bagem sora e keliling-keliling lalap itengah kesain ibas berngi e. Tuhu-tuhu mbiar anak kuta e kerina, sad ape la pang ndarat rumah nari. “Ulihken gendit ku ndai.. ulihken bentingku ndai” nina sora janah terbegi sora penganak ipalui.

Kenca erpagi-pagi, medak me pernanden si la ikut ngkawil ndai. Ia ngenca la dat daging dung-dung ndai. Sengget kel ia, la bagi biasana. Sada pe lalit rumah pulka pintuna. Sada pe lalit jelma teridah. Ilebuhina rumah-rumah bas kuta e, sada pe lalit ngaloi. Singkat cerita rempet kuta e bagi kuta mesuni, melino. Lanai lit jelmana seakatan ia nari ngenca sekalak erdalan pala-pala I tengah kesain. Lanai lit sada pe ndarat. Kepeken kerina anak kuta e enggo mate. Kepeken dung-dung sini ibunuh anak kuta eme keramat si nggeluh ibas namo. Keramat nini si tading ibas kayu si galang ndube. Emaka penande sekalak ndai pe tuhu-tuhu mbiar janah tadingkenna me kuta e. emaka kuta e enggo jadi kuta terulang, janah namo ras batang kayu sigalang ndube ijadiken me ingan keramat ras ipajuh. Gelar namo e gundari eme Namo Dung-dung. Bagem ia ceritana. Bujur.

Jakarta, Februari 2018 
(In memoriam 3 Tahun Nandeku, sinuriken turi-turin e bangku).

10 November 2014

Fragmen Natal Runggun Sitelusada 2014



FRAGMEN LITURGI NATAL GBKP SITELUSADA
24 Desember 2014

Pt. Julianus P Limbeng

*****

Fragmen 1 :
”Penciptaan ras Manusia ndabuh ku dosa”

Prolog: Bageme itepa Dibata terang ras gelap, lawit simangko-angko ras daraten, kerina rubia-rubia ras binurung, sikabang sinjoler. Rikutpe ibas abu taneh nari itepana manusia sue ras gambarNa, guna ngkuasai kerina isi doni ndai. Kerinana tinepana mejile kap.. (dinyanyikan).

Suasana di atas panggung : Adam berjalan, bersama dengan binatang-binatang yang sangat jinak dan bersahabat. Kemudian di multimedia menunjukkan gambar Allah dan suara voice over :

Dibata (VO) : Eranak erkempulah, demilah doni enda dingen kuasai pe. Tapi Inget O Adam..., kerina buah ibas Peken Pardis enda banci ipanndu, seakatan nuah batang kayu simereken pemeteh kerna sibujur ras jahat. Adi ipanndu la banci ang mate kam ibas wari e. (Kej. 2: 16-17).

Adam : (mereken gelar rubia-rubia sada-persada) : Engko gelarmu Arimo... Engko gelarmu Bengkik... Engko Birnawit.. Engko Kak Koang..  Engko Cip-cip.. hehehe..

Babi : Aku gelarku kai ?

Adam : Engko gelarmu Babi.., janah engko Menci..., Engko gelarmu Nipeii...(nina man babi, menci ras nipei)

Bengkik : Aku uga maka gelap kuidah suari..

Adam : Oh.. engko gelarmu Bengkik, janah engko Lingkaber.. Arif ras Oundan..

Prolog : La mehuli manusia e nggeluh sisada, emaka ibahan Dibata me teman si cocok nampati Adam. Eme si Hawa gelarna.. Kenca manusia ndai nggeluh, ilanggarna kap pedah Dibata ndai, janah ipanna buah batang kayu si larang Dibatan kin. (dinayikan).
(Hawa masuk ke panggung, dan bersalaman dengan Adam, kemudian melanjutkan situasi bahagia mereka bersama di taman. Hawa mendekati sebuah pohon dan memetik buahnya, kemudian memberikannya kepada Adam, dan Adam memakannya)

Adam ras Hawa (sisalamen, sitandan)

Hawa : Gelarku Hawa kaka.. aku kap jadi temanndu bas Peken Pardis enda (erdalan-dalan ras Adam ngkelilingi Peken Pardis)

Nipe : Hihihihih... Hawa.. enda lit buah batang kayu si seh kel tabehna. Uga la kam merincuh manca ?

Hawa : Nina Dibata la banci ipan kami buah batang kayu sada ena Nipe, jemak pe ola. Mate kami.. Mate kari kami Nipe..

Nipe : Labo payo e. Labo kam mate. Pankenlah.. Entabeh kel..

Hawa : Enda ngidah potongenna buah enda pasti entabeh, rupana pe mejile. Endo kuputikken, gelah pan kami ras bulangenku enda. Enda kaka, panken buah batang kayu enda..

Adam : Oh entabeh kel tuhu buah enda ndai Agi Kakana... tapi... ooooh... ohhhh... (mbiar Adam)

Dibata (VO) : Ija kam Adam ?

Adam : Kubegi ndai kam erdalan bas peken, mbiar aku, emaka cebuni aku, erkiteken aku manjang-anjang..

Dibata (VO) : Ise ngatakenca maka kam manjang-anjang ? Ipanndu kin buah batang kayu sikularang e ?

Adam : Diberu siitamakenNdu ras aku kap merekenca man bangku, emaka ku pan.

Dibata (VO) : Engkai maka bage perbahanenNdu Hawa ?

Hawa : Nipe singajar-ngajari aku maka ku pan..

Dibata (VO) : O nipe.... Erkiteken perbahanenNdu e maka ku ukum kam ? Ibas kerina rubia-rubia, kam ngenca kena sumpah enda. Mulai genduari nari kam njoler alu beltekndu..

Prolog : Abu me jadi pangan nipe, janah perimbangken Dibata nipe ras diberu ndai, bagepe kesusurenna. Kiniseranna diberu ndai pe tambahi Dibata. Mesui akapna mupus, amin bagepe metedeh atena rusur ngenehen perbulangenna, janah perbulangenna engkuasai ia. Erkiteken Adam megiken ndeharana, emaka kena sumpah taneh ndai. Emaka latih akap manusia erdahin. Terpaksa igegehi erdahin alu cur-cur panas, gelah taneh banci mereken ulih man bana, seh maka mulihken pagi manusia e ku taneh. Sebab ije nari kap manusia ijadiken.
Adam ras Hawa ipelawes i Peken Pardis nari... (erpalasken Kej. 2 dan 3).



Fragmen 2 :
”KEJAHATAN MANUSIA”
(susasana panggung ncidahken erbage-bage kajahaten anak manusia)
Prolog : Manusia ndai enggo enterem ibelang-belang doni. Tapi nambah warina dosa lalap ngerim-rim ibas manusia. Lanai patuh dingen la megiken Kata Dibata. Nehenlah ... anak-anak singuda enggo nggeluh erate-ate janah bebas...

Seluruh Anak Muda : Bebas... Aku bebas... (spontan dan langsung)

Anak Perana : Muda poya-poya, tua kaya raya, mati masuk sorga.. hahahaha..

Singuda-nguda : Nikmatilah tupung banci denga, tupung nguda denga..(nyuntik)

Perbapan : Adi kena kenca togelku, inemen enda lebih kuakap tabehna nanamna..

Prolog :  Ise kin si erdiate nandangi kalak si bagenda rupana ?
(sekalak anak perana lewat mbaba Pustaka Sibadia, lawes PA Permata, ia pe hanya ngenehen kalak mabuk ras narkoba ndai, mbiar ia iganggu janah la peduli man kalak ndai. Lewat ka sekalak Pertua, la nulihkenca pe, tapi erdalan saja. Sekalak Moria pe lewat, tapi seri kerinana lalit si erdiate).

Permata : Orang tuana saja pe la diatena, apai ka aku..

Pertua : Kejahaten anak singuda sibagenda, Perlu pagi baba Sidang Runggun, gelah programken janah cakapken.. Mbera-mbera la cakapken ngenca.

Moria : Andiko.. anak ise kin lah enda.. la nge ajarken orang tuana ari..

Mamre :  Uga pe bapa nandena jarang ku gereja maka bage anakna.. Ihh… Pediat, jera nge ia pagi.

Pendeta : Jeralah o anak muda, adi la kam jera, ku neraka pagi kam kerina..

Voice Over : Bagenda me gereja ngidah dosa si lit ilebe-lebe matana.. Adi Musa mbaba bangsa Israel ndarat ibas perbudaken Taneh Mesir nari, ku taneh si janjiken Dibata si dem tengguli ras dadih, uga ninta manusia ? Ersuruh nge ukurta nehken kata Dibata janah mbabai kalak si it ibas dosa guna bengket kubas kinirajan Dibata ? O manusia anak Adam ras Hawa si enggo ndabuh kubas Dosa ? Uga ninta ?

Vokal Solo :  .................  Mula Pertama”

Koor : PJJ Bojong Menteng -  ”Sendah Jumpa Wari Raya e”


Fragmen 3
”KELAHIREN TUHAN YESUS”

Narator : Ratusen tahun dekahna ope Kristus, nabi-nabi enggo ningetken kerna kelahiren Yesus Kristus, emekap Mesias e.

Nabi : O kam Betlehem i Taneh Juda, labo kam kuta si kitikna i Taneh Juda, sabab ibas kam nari reh me sekalak pemimpin si mpermakani bangksaku, bangsa Israel (Matius 2:6).

Malaikat: "O Maria sikelengi Tuhan, ula kam mbiar.. Enggo ibereken Dibata perkuah ateNa man bandu. Mehuli pagi kulandu janah ipupusndu sada anak Dilaki janah bahanlah gelarNa, JESUS. Ia pagi jadi kalak si mbelin, dingen igelari pe anak Dibata si meganjangna kel. Tuhan Dibata pagi njadiken Ia jadi raja bagi ninina Daud. Janah Ia me pagi raja man kesusuren Jakup seh rasa lalap. Kinirajanna la erkeri-kerin. (Lukas 1: 30-33).

Maria : Kuga banci jadi e man bangku, sebab aku singuda-nguda denga ?

Malaikat : Kesah si badia pagi nusur ku babondu, janah kuasa Dibata ringan ibas kam. Perbahan si e me, maka anak si ipupusndu e pagi badia, janah igelari anak Dibata.

Maria : Kuendesken diringku man Tuhan, janah jadilah i bas aku bagi si enggo ikatakenndu.

Narator : Bagepe Malaikat rehka ndahi Jusup tunangen Maria…

Malaikat: O Jusup kesusuren Daud, ula kam mbiar mbuat Maria jadi ndeharandu, erkiteken anak siipupusna e erkiteken kuasa kesah dibadia kap.. Ipupusna pagi sekalak anak Dilaki janah bahanlah gelarna JESUS. Sebab Ia me pagi sinebusi bangsana ibas dosa-dosa nari. Janah igelari pe Immanuel. (Matius 1: 21-23)

Narator : Minter kenca si e, laws Maria ku sada kuta I Juda, i daerah si erdeleng-deleng. Ije lawes ia ku rumah Sakaria.

Maria : Mejuah-juah man bandu Elisabet

Elisabet : Kerina diberu, kam me simbelinna daten pasu-pasu. Ipasu-pasu gelah anak siipupusndu. Ise kin aku maka nande Tuhan reh ndahi aku ? Sebab kenca kubegi sorandu, minter kemuit anak si lit ibas bertinku alu meriah ukur. (Lukas 1:42)

Maria (rende) : Tendingku muji Tuhan, meriah ukurku erkiteken Dibata penebusku. Sebab enggo ingetna aku, kawanNa simeteruk. Genduari nari kerina ngataken maka aku daten tuah.. Sebab Dibata simada kuasa ncidahken perbahanenNa man bangku, Badia me gelarNa. Ipeterukna raja-raja sierkuasa, janah ipeganjangkenna kalak simeteruk. Kalak simelihe ibesurina alu kerina simehuli, janah kalak bayak isuruhna lawes ngambe-ngambe (Lukas 1:46-53).

Narator : Kira-kira telu bulan dekahna Maria ringan rumah Elisabet, emaka mulih ia ku rumahna. Paksa si e Agustus kepela Pemerentahen Roma, nuruh kerina rayat si lit ibas daerah kekuasanna gelah isensus. Enda me sensus si pemena, sanga si e, Kirenius me gubernur i Siria.

Kaisar : Momo… Momo.. man kam kerina rayat si rulo, mulih kerina ku kutandu gelah isensus kam kerina. Daftarken dirindu. Momo… Momo… Momo …

Narator : Emaka kerina kalak berkat ku kuta pengulihen gelah isensus. Jusup pe berkat i Kuta Nasaret I Galilea nari ku kuta Betlehem I daerah Judea, kuta ketubuhen raja Daud. Sebab Jusup pe kesusuren Daud kap. Kenca seh Betlehem idaramina ingan tading erkiteken enggo seh waktuna mupus.

Jusup : Mejuah-juah Bengkila, banci kami tading jenda, erkiteken mehuli kula ndeharaku enda.

Batu : Ih.. lit kin senmu anak ? Lit kin senmu nggalarisa, lang pe jenda enggo dem.

Jusup : Mejuah-juah Pa, banci kami tading jenda, erkiteken mehuli kula ndeharaku enda. Lanai ia ngasup erdalin ndauh. Tolong sampati kami Pa.. Tolong…

Gantang : Eit.., ula ko ndeher anak, pakenmu pe jorok.. jenda lalit ingan tading. Enggo dem. Kerina si tading rumah enda kalak pantas.

Anak Kecil : Erkai kam je Bibi ? Enggo kap tengah berngi ?

Jusup :  La dat kami ingan tading agi. Entah lit etehndu ingan tading man kami berngi enda ?

Anak Kecil : Mari tadinglah kam bas karang asuhenku, je mungkin la akapndu mbergeh erkiteken lit gara api. Mari kutaruhekn kam duana.

Jusup : Labo dalih agi, sipenting banci ingan kami pekesahken berngi enda.

Anak Kecil : Mari kita berkat. (menuju kandang)

Narator : Kenca seh masana, mehuli me kula Maria, ipupusna sekalak anak dilaki. Balutina salu ampan, janah pepedemna ibas pelangkah. Erkiteken lanai lit nari ingan bas rumah penginapen. (Lukas 2:7). Ibas daerah e pe lit iga-piga permakan si sangana ngiani asuh-asuhen I mbal-mbal. Sangana ersurdam ras ercakap-cakap, rempet tedis sekalak malekat Tuhan.

Malaikat : Ola mbiar, aku reh mbaba berita si meriah, si mereken keriahen si mbelin man kerina manusia. Sendah I kuta Daud enggo tubuh juruselamat man bandu, eme Kristus Tuhan. Si jadi tanda kari man bandu eme, idapetindu kari anak-anak ibaluti alu uis, medem ibas pelangkah. Rempet teridah enterem malekat si ndai dingen rende muji Dibata. In excelcis Deo (dinyanyikan).

Permakan 1 : Suara kai akap ko e anak. Eta kita ku kuta Daud. Ku karang asuhen.

Permakan 2 : Ota kita lawes ku Betlehem, ngenehen kejadin si lit ije, bagi sini kataken malekat Tuhan ndai.

Permakan 3 : Sekalak juruselamat enggo tubuh ? Juruselamat siijanjiken e kin ?

Narator : Emaka pedas-pedas berkat permakan ndai, janah idapetina Maria ras Jusup dingen idahna pe anak e medem bas pelangkah.

Permakan 1 : Kami reh kujenda erkiteken berita sisehken Malekat Tuhan man kami. Janah payo kel bagi kai sibelasken malekat Tuhan ndai.

Permakan 2 : Terpujilah Tuhan ibas igan simeganjangna

Permakan 3 : Eta dage kita mulih janah sipeseh berita e man kalak sideban, berita keriahen.
(Kerina permakan berkat, nadidngken panggung).

Narator : Kenca Yesus lahir I Betlehem, itaneh Juda ibas jaman raja Herode. Reh me guru-guru  Timur nari ku Jerusalem ternungkun-nungkun.

Majus 1 : Ija kin Mesias, raja kalak Jahudi si mbaru tubuh e Raja, sebab idah kami bintangna I timur. Janah ate kami reh nembah man bana.

Herodes : Mesias ? Raja Kalak Jahudi ? Hmmm, Imam-imam !! Ija kin Mesias e tubuh ?

Ahli Taurat : I kuta Betlehem, Taneh Juda, erkiteken bage enggo isuratken nabi-nabi.

Herodes : O Guru Timur.., ndiganai bintang e mulai teridah ?

Majus 2 : Mbaru denga raja…

Herodes : Berkatlah janah pepayo alu mehuli ija ingan anak e, janah adi enggo kam jumpa, beritaken man bangku, gelah aku pe kujah nembah man bana.

Majus 3 : Banci Raja, mejuah-juah… Singgah pagi kami arah enda.

Narator : Kenca bage berkat guru-guru Timur e. Idahna ka bintang si enggo idahna marenda I Timur. La tanggung riahna ukurna ngidahsa. Bintang e erdalan arah lebena je nari ngadi tepat ibabo ingan anak e.

Majus 1 : Ah kap bintangna ndai nake ?

Majus 2 : Payo.. jelas kel bintang. Siikut-ikut saja bintang e. uga pe je anak e.

Majus 3 : Ma pas kel dage petunjuk bintang e. Enggo kita seh ibas ingan Mesias e.

Majus 1 : Mari si sembah..

Majus 2 : Pedarat dage luah persembahenta ndai. Emas, Mur ras Kumenen.

Majus 3 : Ersembah dingen erjimpuh kita erkiteken raja enggo tubuh. (Para majus ndarat nadingken panggung, janah Jusup ras Maria tetap ibas karang asuhen seh Nehken Persembahen atau Kolekte).

Narator : Bageme, Jesus lahir ibas karang asuh-asuhen. Kai ertina enda man banta kerina ? Mari sirenungken, sekali nari mari si renungken mbages-mbages. Uga Yesus Juruselamatta reh ku doni enda.
Rende : KEE 135 : 1-3 (Nagani Lilin) – petugas sienggo iaturken.
KHOTBAH – Pdt. Ekwin W. Ginting, M.Div

Fragmen 4
”NEHKEN PERSEMBAHEN PENGATAKEN BUJUR”

Prolog : Kelahiran Tuhan Yesus memang luar biasa ibas kegeluhen manusia. Mari sibayangken sekalak raja lahir labo ibas Istana entahpe rumah sakit si mejile, tapi ibas karang asuhen... karang asuhen. Bagi permakan enggo nehken persembahenna, bagepe guru-guru i timur ibas kuta si ndauh nari enggo nehken barang simehergana tupung si e, eme : emas, mur ras kumenen, kita pe mari berkat, alu pusuh si dem keriahen, erkiteken enggo reh Mesias, sinebusi dosa-dosanta manusia, sisehken dage persembahenta. (Persembahen isehken, janah simbuat persembahen nehken persembahen kubas Kandang Domba si enggo ibahan ibas panggung.)

Rende KEE No. 114 : 1- (Persembahen pedalan, simuat kolekte kenca dung iserahken kubas kandang si lit ibas panggung).

Dan seterusnya disesuaikan dengan Liturgi.....

CATATAN :
1.    Antara pragmen 1 – 4, tetap mengikuti acara liturgi yang telah dibuat, dan pragmen ini mengikuti dalam tata urutan liturgi.
2.    Acara enda ilakoken ibas kebaktian natal, janah menyatu ras bagian dari liturgi. Emakana peran perliturgi lanai lit, sebab enggo lit Narator, bagepe acara-acara sidebanna si lit ibas uruten liturgi enggo menyatu kerinana janah erdalan sesuai urutenna masing-masing seh dung.
3.    Setiap prgamen didukung oleh multi-media si sesuai menggambarkan situasi cerita pargmen.
4.    Asa bancina bas altar kosong, hanya pada saat khotbah saja pendeta sikapken mimbar kitik.
(Jakarta, 5 November 2014)

MULA PERTAMA
Mula Pertama Allah jadikan
Langit bumi dan laut
Surya dan bintang memberi terang
Sempurna dan tenang

Segala makhluk penghuni dunia
Tercipta oleh tanganNya
Dan manusia dib’ri kuasa
Terhadap segalanya

Tapi semuanya itu hilang
Damai dinodai oleh p’rang
Manusia yang dib’ri budi dan akal
Berbuat dosa ciptakan prang

Dunia semula sempurna tenang
Ternoda dosa manusia
Dan Yesus datang raja damai pemenang
Kembali bawa bahagia
Kembali bawa bahagia

About Me

My photo
Bekasi, Jawa Barat, Indonesia
Etnomusikolog