Posts

Showing posts from 2018

NAMO DUNG-DUNG

Image
NAMO DUNG-DUNG Julianus P Limbeng Sanga aku anak-anak ndube tahun 1970-an, ope tunduh Nande Beru Tarigan Tambak ndube, megati kel erbahan turi-turin ope aku medem. Salah sada turi-turin sini pernah turikenna janah kuinget seh gundari eme Namo Dung-Dung. Turi-turin enda kutulis, mperingeti nande beru tarigan, pas kel telu tahun enggo ngadap man Dibata. Hio.., nai i Lau Belumai lit me sada turi-turin kerna dung-dung, eme sada binurung bagi belut si lit nggeluh ibas sada namo i Lau Belumai. Turi-turin enda cukup termur-mur sekitar daerah Serdang hulu. Lau Belumai eme sada lau si cukup mbelin, lau e me jadi tapin anak kuta, janah ije me ingan anak kuta ridi, naptapi gonjei, mbuat lau, nawen bubu, salir, bagepe ingan engkawil. Tuhu mbue binurungna, lit can-can, jurung, sibaro, gampual, kaperas, ­dung-dung ras sidebanna. I tepi lau e mbue denga je bantang kayu, termasuk lit sada batang kayu si seh kel galangna, eme batang tualang. Launa pe maler julu nari meciho kel, emak