Kutai Timur

MOMO RAS ERDUHAP
Dk. Yulianus Liem Beng, S.Sn., M.Si.[1]

Adi sinen mulihi uga perdalinen budayanta secara umum Indonesia enda, lit kecenderungen si mbelin kel kubas diskontinuitas, emekap budaya si la berlanjut, banci jadi pe ngadi entah bene, janah lanai ieteh generasi siberikutna. Hal sibagenda rupana pe kitik galangna tentu terjadi ka nge kubas kebudayaan Karo, sisadari entah la sisadari. Perubahen kebudayaan memang lanai terelakken, ras memang harus terjadi. Kegeluhen budaya memang leket ras manusiana e sendiri, adi kin e iperluken manusia, maka lit kecenderungen untuk mempertahankenca, janah adi lanai iperluken mungkin hanya cukup ikenang saja (?). Enda nuduhkenca maka kebudayaan sekaligus sada kontinuum ras diskontinuum, lit si lanai terpake janah lit si tetap denga ipake erkiteken siperluken. Emaka tuhu nge kai sini ikataken filsuf sejarah, maka nina sejarah emekap dialektik antara kontinuitas ras diskontinuitas, kompetisi antara konsolidasi ras transformasi, suksesi antara order ras change (perubahen), entah pe bagi sini ikataken Soekarno, sejarah emekap simfoni revolusioner ibas usaha ‘njebol’ ras mbangun.

Sehna berita si meriah ku kalak Karo[2] galang kel pengaruhna (dampak) kubas dua faktor sini idatas ndai man kebudayaanta, emekap apai sini banci ipake ras apai sini lanai banci ipake, entah pe ilakoken. Dampak enda kerina erkiteken lit perubahen palas kegeluhen kalak Karo Kristen, emekap palasna tentuna kubas pustaka si badia sebagai palas kalak Kristen. Tapi ibas kita nentuken apai si banci pake, janah apai si labanci ipake ndai, megati kel kita labo mbuat sada keputusen si murni palasna ku bas pustaka sibadia e, tapi pertimbangen-pertimbangen sideban secara manusia berdasarken logika, aminna gia hal sibage labo tertulis ibas pustaka sibadia. Lit rusur penafsiren-penafsiren, sierbahanca kita masuk kubas dua kategori mbelin, emekap mehuli ras la mehuli, banci ras la banci si la sepenuhna alkitabiah. Erkiteken si e, ije megati terjadi kita ngelakoken sada hal si ‘la wajar’ man budayanta. Sebagai salah sada contoh misalna, uga kalak Kristen memperlakuken musik tradisinta (gendang lima sedalanen, gendang telu sedalanen, rsd). Erkiteken musik tradisi enda erat kaitenna ras upacara-upacara sinilakoken kalak Karo, emaka alat musik enda sikategoriken sebagai ‘la kristen’. Emaka labo lit siidah she asa gundari kebaktian belang-belang GBKP enda iiringi alu gendang Karo, surdam, balobat, ras sidebanna. Padahal adi sicermati secara musical, situhuna musik Karo pe labo lit duana ras musik sideban adi kita ngerana secara superiritas budaya (superiority cultural).

Memang adi sisiksiki secara njelimet, hal sibagenda rupana labo terjadi ibas kita kalak Karo saja ngenca, tapi pe siidah ibas gereja-geraja si deban hal sibagenda rupana terjadi. Adi sinehen uga perkembangen berita si meriah ku Kalak Toba, emekap sipemena ilakoken dua kalak perberita si meriah Burton da Ward ibas gereja Baptis, sekitar tahun 1834, Munson ras Lyman, Amerika nari. Dua kalak enda sieteh maka mate terbunuh ibas tanggal 28 juni 1834 erkiteken la terterima masyarakat. Emaka tahun 1849, Van Der Tuuk nterjemahken alkitab ku bas bahasa Toba, emaka selanutna pengirimen pandita Rheinsche Mission Zending (RMG) ku kalak batak, she pe maka tahun 1863 Nommensen ertugas ku Tarutung ras berhasil eng-kristenken kalak Toba janah berhasil ndiriken sada gereja HKBP i Tarutung (Nainggolan, 1979). Ibas paksa si e, Nommensen berusaha pengadi kegiaten-kegiaten kebudayaan masyarakat si ‘erkomunikasi’ ras leluhurna alu upacara-upacara si biasa ilakoken alu erkata gendang (gondang sabangunan). Musik tradisional pe lanai banci ipake, apai ka ibas kebaktian. Hal enda ibahanna alu cara mempengaruhi pemerintah Belanda, janah pedarat sada larangen erbahan upacara bius, emakap upacara tradisional Toba si berhubungen ras kepercayaan sindekah. Ise singelanggarsa, emaka kena sanksi ‘pengucilen’ ibas masyarakat nari (Siahaan, 1964). Memang lit nge perubahen secara berangsur-angsur, janah gundari gondang enda ndai enggo me mulai banci masuk ku gereja. Secara pribadi ras iman tentuna Nommensen pe punya alasen erbahan sada keputusen, emekap sulitna meneken ikaten batin masyarakat arah sora musik e ras kinitekenna sindekah. Je tentuna lit proses. Tapi payo kin e ?

Adi nulih kita mulihi uga perkembangen budayanta ibas gerejanta tentuna lit perserina ras situasi idatas ndai. Ibas tahun-tahun 80-an, gendang Karo langa bo banci ipake ibas gerejanta, janah lit nge she asa gundari vokal group saja pe ibas kebaktian langa bo terterima/teraloken ibas kebaktian-kebaktian, kecuali koor. Uga dage pemahamenta kerna si enda ? Teringet aku, ibas sada kebaktian pemasu-masun perjabun i Medan, lit sindaftarken man pertua/diaken untuk ngisi koor ibas kebaktian e, tapi kenca nampil ternyata labo koor, tapi vokal group. Emaka minter isuruh pertua/diaken ndai nusur. “Adi vokal group, kari kenca kebaktian maka banci”, nina. La kin nge nabi Daud pe muji Dibata alu kulcapi, harpa (harp) ras alat-alat musik sideban ? Adi sinehen ka pe ku Israel lit sini gelari klezmer, emekap rende alu iiringi musik muji Dibata, janah pengiringna pe musik tradisional Yahudi alu teknik kontrafung entahpe contrapoint. Kai kin bedana e ? Salah kin kita adi muji Dibata alu rende dingen metik kulcapi, surdam ras sarune ? Adi alkitabta pe enggom bahasa Karo (inget bahasa pe budaya), engkai maka la si pake musik Karo enda ? Engkai maka sipaksaken rusur main organ, aminna gia pemain organta pe langa bo pas ?

Mehuli entah lang unsur budayanta ibas ke-kristenenta, enda tentuna kita nge mutuskenca alu palas pustaka si badia ndai. Tapi pe megati ka nge ibas kita erkebaktian si pake denga budayanta si la mehuli ndai. Momo gerejanta labo siakap bagian dari ibadah. Sanga mbacaken momo sianggap ka nge kerja-kerja nereh empo entah pe erdemu bayu. Bage kenca momo, minter kel kita gejek kerina arah erbual-bual kita sapih-sapih kita, mungkin ka pe cekurak. Ibas sada sisi erduhap pe si larang ibas kuburen. Secara pribadi aku mengerti kai makna erduhap ibas kuburen man tua-tua si adi, tapi man generasi si labo mengenal budaya enda engkai maka ilarang erduhap ? Salah kin adi sibersihken ayonta ibas abu sikotor nari gelah reh jilena ? Engkai maka siciptaken makna berdasarken pemaknaan generasinta (pengalamen budaya) man generasi si la ikut bas enda ndai, bahkan labo lit makna kai pe man bana seakatan mbersihken ayo ?

Enda merupaken wacana saja ngenca, janah perlu denga secara ras-ras kita kerna ngangkai uga kaitenna budaya ras kiniteken gelah ula kita terseret ibas pemaknaan sepihak tapi la pas. Hal sibagenda rupana tentuna labo enda saja ngenca, janah melala denga budayanta si perlu si nen kuga kin seharusna kita memperlakuken budaya secara kristiani. Pasu-pasu i gereja labo denga siakap sah sebagai suami istri aminna gia enggo pasu-pasu pandita, nyatana kenca nganting manuk e maka siakap enggo sah. Mukul, mbesur-mbesuri ras kegiaten budaya sideban banci sibahan secara kristiani alu la encedaken budayanta. Tapi, salah sada lebe hal yang paling positif emekap GBKP merupaken lembaga paling galang/mbelin pengaruhna guna mempertahanken penutur bahasa Karo aminna gia enggo melala gerejanta erbahan kebaktian bahasa Indonesia.

Bj. Menteng, 30 November 2003.








[1] Sie Musik dan Budaya GBKP Bekasi, pemerhati budaya Karo, dosen musik di beberapa perguruan tinggi di Jakarta.
[2] Sehna berita si meriah man kalak Karo 18 April 1890, emekap ibukana pos penginjilan NZG Pdt. H. C. Kruyt ras Nicolas Pontoh I kuta Buluh Awar.