15 November 2006

P O T L A T C H
Pt. Julianus Limbeng

“Mbiar aku labo tersehi target e…,” nina Bp. Lita.
“Asakai kin target panitia..?” ningku nungkun man bana.
“Seratus telu puluh juta…, enggo nangndangi man ciger pe langa seh lima puluh juta..”
“Lange cocok juru lelang na…, lang adi idah tempas si reh kerina labo mungkin la dat.”
“Bagem totonta, mbera-mbera Tuhan nampati…?”
“Ula kin mbera-mbera nindu …, yakin kin kita….”
“Oe.. yakin, bage me ninta…, mbergeh-mbergeh saja kuidah kalak si ngelelang dah…”
“Mungkin ka nge erkiteken enggo rusursa lelang-lelang.., mungkin banci darami cara sideban sei lebih rohani ras ulihna pe memuasken.”
“Maksudndu..?”, nina Bp. Lita nungkun.
“Iakh, mungkin lit ka kap gundari ban kalak e kuidah istilahna janji rohani, nina..”.
“E…, aku edenga ka kubegi e. Adi marenda tersohor ka kel jajan rohani nina ka.”
“Bage kin. E kap deh kam gelarna manusia aktif ras kreatif.”
“Jadi kai kin maksudna janji rohani e ndai…?”
“Situhuna dehkam, adi Jakarta ah ban kalak gelarna Janji Iman nina, adi jenda janji rohani nina ka, situhuna seri nge maksudna e. Erjanji kita mere man Tuhan arah pengataken bujurta man Dibata arah nulisken ukurta meriah ibas kertas si enggo sikapken panitia pengumpulen dana.”
“Adi la galarna ?”
“Adi la galarna urusenna lah ras Dibata, gelarna pe janji rohani entah pe janji iman…”
“Lang pe kuidah enggo lit perkisatna kalak reh ku lelang-lelang e….”
“Labo bagi katandu ena, kita ngelelang dat ka lah barangna.., adi Jakarta ah nina kuidah Lelang Amerika enggo buen ras janji iman nina jah….”
“Arah ja nari ka kin tehndu e..?”
“E.. dehkam lit kap aginta sada tading ijah, ia nge nuri-nuri maka ku eteh, adi aku akapnndu, pengalaku pe tah labo pernah ku jah….”
“Egia kam enggo kin ngelelang e..?”
“Enggo. Kulelang ndai sada manuk sabugan. Lima puluh ribu.”
“Kam pe lima puluh ribu ngenca lelangendu, pantas nge akapndu persembahkenndu man Dibata?”
“Pantas ningen, labo min pantas, tapi bagem pepantas-pantas…, adi ase ngenca ngasupta..”
“Payo kin ase ngenca ngasupndu… ula kari tuhu-tuhu bage ban Dibata kengasupenndu..”
“Kuakap enggom tandaindu kel aku…. Bandingkenndu min ras sideban e.. la kin enggo me galang kel lelangenku e, adi dahinku pe ngemo-ngemo nge ?”

Juru lelang pe enggo bagi si serak sorana nawarken barang-barang si ilelangken. “Enda ikan emas. Nina dokter adi daging mbue kolestrolna, adi mbuesa banci bahaya man kesehatenta. Enda nurung emas, adi nurung melala pe pan la bahaya. Adi Tiga Pancur biasana sepuluh ribu sekilo, enda lima kilo, emaka tawarken kami lebe lima puluh ribu. Ise kita singelelangsa…?”, nina janahna ngelap panasna. “Lima puluh sekali….., lima puluh sekali…., Eakh kam Moria kami, tambahi kami pe tualahna sada gandeng, gelah kari rumah banci kental bandu santanna. Entabeh akap Mamrenta man kari berngi…. . Iah… lima puluh sekali….., lima puluh sekali….. lalit..?? Lima puluh sekali….. Eakh, adi lalit bangku yah. Emaka kuakap erkiteken jamta pe enggo jam sada lewat sepulu lima, kuakap banci man kita lebe. Kari silanjutken ku lelang tahap sipeduaken.” Nina juru lelang ndai. Dana siterpepulung lit enggo Buena lima pulu telu juta empat ratus lima puluh ribu rupiah. Tapi adi idah pertambahenna pesimis memang panitia tersehi target lelang.

Sanga aku man kuperdiateken sada per sada si reh ibas lelang-lelang e. Si reh ibas lelang-lelang e metunggung tempa kerina man tatapen. Moria Kuta Lepar nari pe enterem kel reh. Cur-curen kel kuidah kerina panasna e janah man. Teringet aku kai nina kalak sekalak tentera Jepang marenda asum Talapeta denga marenda. Nina ‘orang Karo kalau makan keringatan, kalau orang Nippong keringatan kalau bekerja…” Lit kuakap perpayona. Aku pe adi meser kenca bengkau e, naktaken panasku e. Bagepe kuidah kerina Moria Kuta Kepar nari cur-cur panasna man lomok-lomok si enggo sikapken panitia. Lit pe deba enggo sambar rupa gincu bas biberna erkiteken enggo campur ras getah lomok-lomok ndai.

Kunen ka kerina Moria ndai, rata-rata galang kel kuidah gelangna. Bagepe bas kerahungna mbirlak-irlak kel kerinana. Megersing ke kerina bajuna. Bagepe bas kerahung ras pergelangen tanna pe megersing erdilap rupana. Bagepe erjongkitka ia kerina. La hanya pakaianna si seragam, bas kerahungna ras pergelangen tanna e pe seragam ia kerina, amin gia galangna la seri. Tapi lit kerina. Bagepe Moria Kuta Garut nari pe bage ka. Seragam ka ia kerina, janah pergelangenna ras kerahungna pe seragam. Saja mainenna si beda, lit deba gambar Jesus isalibken, lit ka deba kibul ergambarken ratu Wilhelmina, lit ka deba gambar singa, lit ka deba huruf banna, eme singkaten gelarna, adi Bertha br Karo gelarna, maka mainen rantena huruf B banna. Tapi adi kunen ibas papan si ngelelang, langa piga lit si muat bagin. Aku enggo kin ku targetken seratus ribu, eme sekali ope man, ras sekali nari kari kenca elah man.

Bagepe arah perbapan kutatap sada persada isekin si reh. Mejelis kerina. Erjas sikap. Sierbatik pe sikap. Persurina pe lepet, erkiteken mekapal banna minak takalna. Lit ka deba si dua bas awakna gantungkenna asa anak kucing, eme arah kawes ras kemuhun. Handphone gelarna. La piga dagingna si kertang. Rata-rata beltekna enggo kuidah mbuncit. Mbuncit e, eme sada symbol sukses bas doni, amin gia la denga tentu sukses ras Dibata. “Enggo mbursa aku sitik e, obesitas nina dokter, lalap la terturunken beratku…”, nina ka deba nuduhken dagingna enggo mbur. “Uelah, ija nge akapndu terpenusur, adi PJJ makan malam rusur, wari sabtu ndahi kerja-kerja, mamre motong biang, retreat nggeleh babi, pembubaren panitia mbulak si empat nahe. Sendah ka akapndu lomok-lomok.”, nina ka sekalak Mamre. “Bage kin, arah kami ah labo rusur enterem Mamre pulung, emaka pepulungsa ena ndai me rusur ban, motong biang….” Nina ka Mamre ndai. Emaka kutatap ka singerana ndai, gosoken saluarna pe entelap. Ban telapna tempa-tempa banci nggeleh kerahung manuk. Lit kuidah arah pudi sekalak si kertang dagingna. Erbatik ia. Manjar-anjar ia man.

Emaka kenca aku man, ku ruang konsistori aku. Pas aku kuje, kepeken pertua-diaken enggo elah man. Emaka reh nina sekalak pertua, “Ehh.., kolekte ndai langa kap ndai kira…. Si kira lebe yah…”
Emaka pedaratna me arah waluh kantong siipedalan ndai bas kebaktin. Emaka aku pe ateku ikut nampati engkira persembahen ndai. Persembahen e buen rega seribu. Emaka nina sekalak Pertua Sembiring mergana, “Ih … aku latih kel kuakap e… melumat kel sendah kerina…”. Emaka nina Pertua Sebayang, “Biasa nge bulan tua, lakin cocok situhuna sendah lelang-lelang, tanggal 24, minggu sireh min ndai ban.” “Labo situhuna bagena, uga kin lah ban carana maka melumbar kalak mere ….E.. lit denga akapndu rega lima ratus….”

Dung kenca kira kolekte ndai, emaka ilanjutken ka me lelang tahap ke dua. Enggo lanai piga ije jelma si pulung. Kutatap sada-sada mobil e berkat ibas ingan parkir nari. Mobil-mobil si mbaru lanai piga ije.

Memang erbage-bage carana jelma maka nggit mere. Lit deba iangkat-angkat, lit ka deba setengah ipaksa. Lit ka deba ipanas-panasi tempa. Emaka la igejapna enggo melalasa akapna lelangenna piah rubati pe bas jabu. Lit ka deba si menahang akapna mere amin gia secara umum labo lebih kel idah bas ia. Lit ka si mereken talentana saja ngenca. Lit ka si shekel degilna. Lelangna sekali, minter ia ndarat ruangen e nari. Lit ka sideba ngelelang erkiteken mela ia ngidah jelma sienterem e. Lit ka sama sekali la ngelelang kai pe. Meriah saja akapna ngenehen kalak ngelelang ras nonton kibot. Erkiteken lelang-lelang biasana ibahan ka gendang kibotna. Apai ka adi perkolong-kolongna terkenal.

Padahal sebelum lelang, ndai ibas khotbah pe enggo isehken Pandita kata sini ibuatna ibas kita Maleakhi 3:10, nina “Babalah persembahen persepuluhenndu ku rumah pertoton asa arusna meka melala ije pangan. Ujilah Aku alu si e; tentu maka idahndu kutalangi tingkap-tingkap langit janah kucucurken man bandu kerina erbage simehuli alu la kurang kurangen.” Tapi adi kunehen kerina arah potensi perpulungen si lit, kepeken buen denga kami enda mbiar mere man Tuhan. Adi kunehen uga tradisi ibas kalak Amerika Utara, maka melala denga kepeken kalak Kristen bagi kalak Amerika Utara enda ndai, eme ngelakoken potlatch. Potlatch situhuna gampangna banci ikataken hobi pamer erta. Janah erta si lit ibas ia e iakapna jadi ukuren.

No comments:

Blog Archive

About Me

My photo
Bekasi, Jawa Barat, Indonesia
Etnomusikolog