DRAMA NATAL

JAMBE LA ERTANGKE

Sebuah karya:
Pt. Julianus P Limbeng


Casting:

Pa Berteng
Sekalak perbapan si perasatna ku kede ngenca, janah tiap wari dahinna ersabung manuk.

Nd. Berteng
Ndehara Pa Berteng, ranak kitik, janah rusur rubati ras Bapa Berteng, erkiteken erjudi ras ermanuk ngenca akap perbulangenna meriah.

Pa Lengke
Perkede kopi.

Pak Parjan
Kalak Jawa enggo ndekah tading ras kalak Karo, tapi logat Jawana kental denga kel. Ngampik-ngampiki ngenca perasatna. Kurang sehatna. Bergehen tempa lalap. Emaka kuja pe lalap babana kampuhna.

Nd. Jenggi
Rentenir, mbunga-mbunga ken sen ku perjudin.

Nd. Keranjang
Teman Nd. Jenggi. Adi nande jenggi mbungaken sen, Nd. Keranjang ngurut

Pengarapen
Sekalak Pertua, bujur. La ia bosan-bosan reh ndahi temanna ku perjudin gelah robah.

Tumarong
Kalak pertandang, ndeharana kalak Karo. Kai saja pe banci bahanna jadi judi. Logat Batak kental.

Tedis
Kepala Kampung. Bangga kel ia sebagai kepala kampong. Emaka kuja pe erseragam kepala kampong ia. Riahen akapna tedis asa kundul. Emaka tedis ban gelarna.

Drama enda sifatna fiksi saja, ija lit kejadin, pendahin, bagepe penggelaren seri ras enda labo isengaja, tapi pe penekanen lebih kubas humor rohani, tapi pe banci si buat maknana.

* * * * *

Scene1

Pa Lengke
(Kundul sisada ibas warungna erkiteken lalit denga reh kalak minem. Embusna surdamna, emaka reh me Pa Berteng ngelanja sunun manukna ku deher warungna janahna tawa-tawa sekalak)

Pa Berteng
Sendah ula ka kari mela ya Taruk…, hee…he…., sikat kerina… he… heee…… ma enggo Taruk…?
Adi kalah kin sendah, enggo bagi gelarmu e. Metaruk... Pengadi surdamndu ena ah…,
Akapdu ngenca megogo, ate kalak nembeh. Ban lebe kopi susu Pa Lengke….

Pa Lengke
Kopi susu…? Si nderbih uga ?

Pa Berteng
Tenang kam min…, kentisik nari enggo me dung kerina.
(tekuak manukna bas sunun nari)

Pa Lengke
Bual kaaam … (endekan bagi sora manuk tekuak) nina kap manuk ndu ah.

Pa Berteng
Labo…, payo tuhu…..(endekan ka bagi sora manuk tekuak) nge nina ah.

Pa Lengke
Dung kuga kin katandu e..? La gelah dung kalak Karo..?

Pa Berteng
Adi dung ningku dung. Telu wari enggo ku latih manuk ta e…, alu jurus-jurus maut…
Adi sendah kin pe talu denga…, anak e pe dung nge kuban.. (janah njemak kerahung manukna)

Pa Lengke
Jadi, dung kuga maksudndu e

Pa Berteng
Retap kuban kerahungna e, kam pe jelas naringe maka angkandu pe. Lulus kai kin kam ?
La gelah man curigan ijazah ndu e ?

Pa Lengke
Sarjana Ekonomi aku Pa Berteng, nasib ngenda lalit.

Pa Berteng
Ue lah, adi sarjana ekonomi la kap angkana dung ningen e. Tapi adi …, ah lapadah kuterusken

Pa Lengke
Ue yah…, enda kopindu ndai….

Pak Parjan
(reh ku kede kopi) Ee…, enggo kam je Pa Berteng ?

Pa Berteng
Ena gelarna la penungkunen. Enggom idahndu kita je, enggo kam je nindu. Tamat kai kin kam gelah?

Pak Parjan
Adi tamat katandu. Aku enggo tamat kerina. Uga kin akapndu ? Ma entebu denga nge akapndu kopi susu e?
Teh manis sada Pa Lengke…

Pa Berteng
Ih… bagi katanduenam. Nggeluh kuakap nini bulang marenda adi masuk susu e kubas…

Pak Parjan
Bagen nge ma.. ?

Pa Berteng
Bage. Enda kam lang, nggir-giri tiap wari… bergehen cigere wari e pe. Kurang tawar kam e Pak Parjan
Banci kin lang…, nggalari teh manis e pe mberat kel akapndu. Labo pagi baba ku jah…

Pa Lengke
(Janahna mbaba the manis) Tapi la ia pernah bon Pa Berteng…

Nd. Jenggi
(Mbaba tas ras buku cataten ras pulpen)
Ehh.. ega Pa Berteng, ma sehat nge manuk ta e?

Pa Berteng
Idahndu kin ? Tatapndu min…? Tamat kai kin kam .., maka bagah sehatna pe sungkunndu denga.

Nd. Jenggi
Labo sehatna e kel siperluna, gelah enggo ingetndu ateku (tuduhkenna buku catatenna)

Pa Berteng
O.. ena katandu. Gampang. Kari lepas ciger e enggo me dung kerina.

Nd. Jenggi
Engkai maka gampang nindu?

Pa Berteng
Aku dehkam, kuinget kel ndekah sada tulisen nandangi Tahura ah.
Bagenda nina: “Sada gia manukta, gelah tekuak….”
(minter tekuak manukna)
Eh… idahndu ah, ma minter ia tekuak…. Emaka tenang kam ya….
Tenang kam ya Nande Biring…. (kuitkenna isang Nd. Jenggi), kari lepas ciger e enggo dung kerina……

Nd. Jenggi
(tepiskenna tan Pa Berteng) Ee.eee… toh…

Pa Lengke
La tengka bage adi Mamre Pa Berteng..

Pak Parjan
Ngida kuakap ngenehenca pe…

Pa Berteng
Tarik lah kampuhndu…., mugul kam bas gelah ula akapndu mbergeh.

Nd. Kerajang
(Reh mbaba keranjang janahna man belo)
E… uga nak we…., enggo kam je Pa Berteng…, mama Iting… la kita ngorgan sendah ?

Pa Berteng
E…, enggo kam je Karo…., tentu dong.

Pa Lengke
Ngorgan kai ka kin kata kena e? Langa kap she wari minggu…

Pa Berteng
Emaka ula kin ketadingen. Ngorgan… enda nda…. (mparaktekken kalak ngurut) Ngurut.
Kam kai pe jelas kel atendu. Gundari e dehkam kai pe ula kin jelassa ban. La la lako.

Nd. Keranjang
Gelah keren Pa Lengke. Sebab kai pe gundari perlu keren istilahna.

Nd. Jenggi
Bage kin Nande Keranjang. Aku pernah baba anakta ku Kentuki Fri Ciken nina.
Manuk goring nge kepeken. Ndau kuakap tabehen tasak telu, singgur lah ia nanamna.

Pak Parjan
Bage kin Nande Jenggi. Aku pernah nge bagi kam ena. Sarapen marenda aku Padang Bulan ah.
“Kasi sarundeng pak… nina” Mbegi sarundeng nina entabeh nge ateku. Emaka kenca berekenna minter aku merawa,
Sarundeng sarundeng kau bilang, kelapa gorengnya…. Ningku. (Kerina tawa)

Pa Berteng
Adi kam Pak Parjan kampuhndu lah tarik. Kam la banci mbuesa ngerana, kari enggo kumat pinakitndu. Bergehen lalap.

Nd. Keranjang
Egia, mulihken ku cakapta ndai, surung kari kita ngorgan Pa Berteng ?

Pa Berteng
Oh.. tentu.. tentu.

Nd. Jenggi
La kuidah sendah reh denga SiTumarong nake.

Pa Lengke
Uga per eh nge. Kentisik nari enggo me reh. Tapi Nande Berteng kap sir eh dah.
Atur langkahndu Pa Berteng, atur jurusndu.
(reh Nd. Berteng janahna ngangkip anakna si Berteng)

Pa Berteng
(tedis ia bas inganna kundul nari) Kai atendu e..!! (setengah merawa)

Nd. Berteng
Enggo tasak kuban nakan mama Iting, gelah man kita ras kurumah ateku.

Pa Berteng
Ma enggo kukataken ula aku dahi ku kede ningku. Sitik pe la jagandu stendingku.
Nd. Berteng
Ban kujaga stendingndu maka kam ku dahi ku kede. Marenda adi kulebuh kam man rumah nari, katakendu kuban kam bagi ndilo babi man. Adi dahi ku kede la jaga stendingku nindu. Berendu min henponku, ma banci kam ku “sms”.

Pa Berteng
Hengpong…hengpong…(tarikna pinggel nande Berteng) Ula nari ku kede ya… nande berteng…
La tengka pernanden ku kede kopi.

Nd. Jenggi
Iiiii…, labo bagi katandu ena Pa Berteng. Erkumis kin idahndu kami ras nande Keranjang e.
Labo dalih kute nande Berteng. Adi ku kede atendu kukedeken saja.

Pa Berteng
Stop!! Stop !! Jangan ikut campur….!! Ini masalah pribadi saudara….
Siapapun yang turut campur, getem ko nanti…

Pak Parjan
Haa…haa…, lucu…lucu…., bahasa Indonesia pula dia..

Pa Berteng
(ndahi Pak Parjan janah tangkapna kerah bajuna)
Kampuhndu lah dek-dek, tunduhken kurumah gelah ula kam bergehen.

Pak Parjan
(lompat inganna kundul nari janah ngelepasken tan Pa Berteng)
Haitt…, hait…, cubaken dage. Cubaken. Reh ko arenda… kubere e…, reh ko arenda ku bere e.
Reh ko arah datas kubere e…., reh ko arah teruh kudedeh….. (alu logat Jawa kental)

Pa Lengke, Nd. Keranjang, Nd. Jenggi
(tawa kerina kalak enda… kik-kik)

Pa Lengke
Enak…, ena… na… Nokoh kena rusur man Pak Parjan ena. Labo percuma Brebes nari….

Pak Parjan
Ayo…. Darimana kau datang .., dari situ kau kubikin pergi. (janahna nggeraken pencak silat)

Nd. Keranjang
En adage Pa Berteng mela kita bage. Nderbih manukta kalah, manukta saja lah gia… adi kit aula kel min.

Nd. Jenggi
Bage kin Pa Berteng… mela kita bage.

Pa Berteng
Iah dage ya…, ula ko kari kiam ya…

Pa Lengke
Peturut saja duana. Je kari maka eteh ise buganna ras beruna….
(Pa Berteng ras Pak Parjan enggo masing-masing ambil posisi saling berhadapen)

Nd. Berteng
Enggo me Pa Berteng.. enggo… ula…

Pa Berteng
Ula kam je… enta kucuba sekale. Kam nde erbahance maka enggo bage.
(Duana erbahan gerak bela diri masing-masing, sada pencak silat, sada nari mayan, emaka Reh kepala kampong)

Tedis
E.. eee… kai e… kai e nake, maka enggo kuidah bagi si….. kai e… kai?

Pa Lengke
Latihen saja nge Pak Kades…

Tedis
Latihen kai kin e, maka … kundul kena duana. Kundul.
(Tumarong reh ka mbaba manuk janahna tawa-tawa)

Tumarong
Hee…hee…, songoni ma ale jambeku. Unang ma ban maila hita annon da… he…he…
Emmakk…, emmmak… (emana takal manukna janah ngkepitsa bas kikikna).

Pa Lengke
E… enggo reh Situmarong nake…

Tedis
E.. kebetulan Situmarong. Pedas kam dulu kesini.

Tumarong
Majua-jua Silli…, majua-jua…

Tedis
Jadi begini…, kepada kita semua. Mulai sendah ula nai lit ijenda judi. Sebab kita enggo jadi soroten ibas Kecamaten nari. Piga-piga wari enda reh pulisi ras upas rajia kujenda. Leng, joker, bola, sabung manuk, bagepe ding-dong adi banci ula nai.
Mindo kel aku kerina ula nai kam erjudi. Terlebih kita enda kuakap kerina Mamre, bagepe lit ka nge kuidah ijenda Moria.

Tumarong
Begini Pak Kades.. Minta tolong lah kami sekali ini saja soalnya…

Tedis
La pakai soal-soal Lae… pokokna ula nai lit judi.

Nd. Berteng
Bage kin Pengulu…Mamre ka nge kena rusur, tapi lalap erjudi. Wari natal e erjas ka kena kerina.

Pak Parjan
Mamre pe motong biang saja maka enterem Nd. Berteng..

Pa Berteng
Siiip ko. Urusenta langa dung ya….

Tedis
Jadi kuakap terlebih man kam Tumarong. Adi banci ula nai ban ndu judi kuta enda.

Tumarong
Minta tolong kel aku Silli, gelah sekali nari kel lah gia ijinkenddu. Sebab sendah pertandingen menentuken jambeku ini dengan jambe Silli Pa Berteng itu.

Pa Berteng
Bagekin Pengulu, sentabi kel. Sendah penentun e. Enggo piga wari kulatih manukta enda. Sendah me dungna kari kerina e.

Nd. Jenggi
Bage kin pengulu. Peridonku pe sendah me kualoken adi menang ia sendah.

Pa Lengke
Bage kin pengulu. Utang bas kedeku pe sendah janjina adi menang manukna erlaga.

Nd. Keranjang
Oee…, adi menang biasana ugape enda…(praktekkenna ngurut).. ngorgan…

Pak Parjan
Bage kin Pengulu. Biasana adi lit si menang ugape kopi susu enggo gratis..

Pa Berteng
Sendah ula ko ngarap. Adi aku menang.. teh pait pe labo daten.
Tumarong
Adi bage aku saja totoken Mas, adi aku menang enda kita (seketna kerahungna)
Ma enggo angkandu…, motong….
(Reh Pertua Pengarapen mbaba Pustaka)

Tedis
Ehh.. kuja nge atendu e Pertua?

Pengarapen
Ku kantor Klasis Pengulu. Ngelegi tema Natal ateku, bagepe lit piga-piga urusen surat.

Tedis
O… oe ari. Adi tema enggo kap lit. Kebetulen enda nderbih reh surat. Langa sempat kubereken man bandu. Adi la aku salah kerna tema Natal tahun enda.

Pengarapen
O bage nge. Egia kai kin ndai e maka enggo enterem.
Payo… tema Natal kepe enda Pengulu.

Tedis
Kai kin tema Natalta tahun enda.

Pengarapen
“Kristus e kap si ndameken, janah simpersadaken kerinana (Efesus 2:14). O enggo cocok adi bage.
Kai kin ndai e pengulu?

Tedis
Bagenda nge Pertua. Jadi enggo ndai kupeseh man senina ras turangta enda, kerna larangen ibas Kecamaten nari ula nai lit judi, erkiteken lit rajia piga-piga wari enda, ningku.

Pengarapen
Ue…, Adi judi labo kap erkiteken larangen Kecamaten saja, arusna kin pe adi Mamre ras Moria nge kita ma la kin mehuli adi erjudi. Encage… uga kin?

Tedis
Sekali nari kel lah gia… nina. Sebab sendah pertandingen terakhir nina ka Lae enda ras Pa berteng, bagepe mamre-Mamreta enda, rikut pe ras Moria mindo gelah sekali nari kel lah gia nina.

Tumarong
Betul Silli…, sekali lagi saja. Kalau saya menang akan saya sumbangkan buat dana natal kita.

Pa Berteng
Bage kin Pertua, aku adi menang lah aku.., nukur tapak ta ndai pagi kutambahi yah….

Tedis
Mekuah ka tempa ateku. Emaka sendah siijinken me. Tapi janji. Janah mindo aku man bandu, gelah ope pertandingen e imulai gelah banci kari bahanndu toto, gelah enda me terakhir kuta SiTasaktelu enda Mamreta erjudi.

Pengarapen
Adi bage, labo dalih yah, gelahna min ula nai ijenda lit nari kita erjudi. Kubacaken gia sekali nari tema natalta ndai, nina: “Kristus e kap sindameken, janah simpersadaken kerinana (Efesus 2:14)”.
Mpersadaken maksudna labo empersadaken arih ku si la mehuli. Labo ersada arih erjudi. Tapi gundari ersada arihta gelah kita ngelakoken erjudi sekali nari,
emaka erjanji ka kita gelah ula nai kita lit nari erbahan judi kutanta enda.

Tumarong
Betul Silli… aku pun janji ini.

Tedis
Iakh.. banndu dage totonta yah..

Pengarapen
Mari dage kita ertoto. Tuhan Dibata, reh kami ngataken bujur. Pulung kami kerina ijenda anak-anakNdu. Mindo penampat man bandu guna ngelepasken kami ibas kebiasan-kebiasaan si la mehuli ibas kami anak-anakNdu. Emaka erpadan kami maka mulai sendah nari lanai kami ngelakoken kai si langena ateNdu. PengasupNdu kami o Tuhan guna nadingken kerina si langena ateNdu e. GElah tuhu-tuhu kami banci jadi Mamre si Erpemere, Mamre Si Erdiate, bagepe banci kami jadi Moria sijadi nande si pintar singekelengi jabu si erguna man baNdu. Kam dage sindameken kami ras doni, bagepe ras pusuh kami si la tengka. Kam pe simpersadaken kami kerina guna ikut mbuat bagin pebelangken beritaNdu si meriah itengah-tengah lingkungen kami. Gelah tuhu-tuhu teridah kami anak-anakNdu.
Bujur tuhan. Reh kami arah anakNdu Yesus Kristus.
Amin.

Tedis.
Alu bage dage mari benaken….

Pa Berteng
(Buatna manukna bas sunun nari) Iak dage anak….

Tumarong
Ayo jambe… ayo jambeku (emmana takal manukna)

Pa Berteng
(Tedis janah rukur, natap ndauh, emaka dahina Nd. Berteng, tatapna ndekah,
janah sapu-sapuna takal anakna si lit ibas perembah Nd. Berteng,)

Tedis
Pedasi Pa Berteng… gelah enggo dung yah…

Pa Berteng
Rukur aku sanga ertoto ndai Pengulu, salah kepe aku selama enda. La kuukurken rusur anakku enggo mbelin, bagepe ndeharangku latih akapna tiap wari. Sementara aku erjudi ras kede kopi saja lalap tiap wari.
Kelengen ateku manuk enda asa anakku. Adi manuk enda tiap wari kuperidi janah kubersihken.
Anakku si Berteng enda mulai kin ia lahir la pernah kuperidi…
Salah aku anakku…, salah aku nande Berteng….. Huu…hu…..

Nd. Berteng
(tangis ka) Enggo me Pak… adi kam enggo sadar…

Pa Berteng
Huuu… (benterkenna manuk ndai ku datas) Lawes ko…, lawes ko… ayakina manuk ndai ku ja kiam…
Lawes ko…. Engko erbahanca e kerina…. Lawes ko….

Tumorang
(bingung….)
O….., bage kin ari….. (benterkenna ka manukna ndai)
Ho pe lawo…. Ho…. Lawo ho… lawo hoo…. (pekpekina manuk ndai)
Unang ho huida nai ison.... lao hooo...

Kerina kiam ngayaki manuk ndai…..


Bojong Menteng, 11 November 2006

Comments

Popular posts from this blog

Drama Natal : SAHABAT SEJATIKU

Drama Natal