5 September 2006

Puisi

ERSEPAH
Pt. J. Limbeng

Mbewat-mbewat sitik perdalanku
Sigurappangen nahengku
Ndedehken tapak-tapak ku kersik mbentar si melas
Erjingkang dalan gelahna pedas

Lit lalit tempa tujun
Mbiar nangdangi jelma sienterem
Bas erbelas enggome erpudun
Kata Dibata nge makana malem

Telu tahun stola ku kerahung
Tatapen jelma payo metunggung
Kinirajan Dibata payo kin surung ?
Maka arihta lalap nge rayung [?]

Mbewat-mbewat sitik perdalanku
Sigurappangen nahengku
Aminna gia enggo me ngaku
Nadingken dosa lalap la erbuku

Ndigan denga kin aku ku Kam ?
Sikerajangndu kap si ku nanam
Arusna kin dosa enggo ku-entam
Gelah atan aku ngadap Kam.

Bj. Menteng, 24 Agustus 2005.


[ PEIKHH !! ]

Kai kin Surga e Pa
Ingan senang, nakku.
----------
Lit kin surga e Pa ?
Lit !
Ija Pa ?
Meganjang….
Bas langit ?
Ue Sayang Bapana …
Lewat embun ?
Ue…
Kai deba lit jah Pa ?
Kai pe lit …
Adi merhat aku bon-bon lit man tukuren ?
Adi surga kai pe lit la nukur
Kai maka la nukur Pa ?
Bagekin anakku..
Ise kin empuna Pa ? La kari ia rugi….?
[Peikhh !!]
Nonton TV aku e…..

Bj. Menteng, 25 Agustus 2005.

N A T A L
Pt. Julianus P Limbeng

Natal, natal… natal.
Mbaru denga kuakap tempa tahun baru ndai
Enggo ka kepe seh natal gundari

Okh.., meter kepe wari-wari e mentas
Tertaren-taren rusur aku
Terpagi-pagi rusur aku

Piga kali ngenca aku ikut PJJ tahun enda ?
Piga kali aku ikut Mamre tahun enda ?
Piga kali aku ikut ngapuli kalak kemalangen tahun enda ?
Piga kali kam pernanden ikut Moria tahun enda ?
Piga kali aku ku gereja tahun enda ?

Ibas berngi simehuli enda
Kuukuri me langkungku sada tahun enda
Kai enggo si kuban man Tuhan
Kai enggo si kuban man keluargangku
Kai enggo kuban man lingkungenku
Kai enggo kuban man temanku erdahin
Kai enggo kuban man anak-anakku
Kai enggo kuban man teman sada perpulungen
Nol pih-pih !!!
Buen denga nge kuban guna diringku pribadi

Piga kali aku ertoto kerna kalak sideban
Piga kali aku ertoto kerna keluargangku, anak-anaku, ndeharangku
Piga kali aku ertoto kerna bangsa ras negara enda
Okh…, totoku pe sedekah enda buen kerna aku
Tapi, ningku mbela diringku
“Bagekin enggo iban Tuhan manusia enda. EGOISS !!!!

Natal…
Natal….
Natal….
Kai kin erti natal e man bangku ?
Sibuk tempa aku tiap tahun ngukurken natal…
La gelah tading siman ayaken ?

Natal…
Megati pe enggo jadi perayaan duniawi saja man bangku


Natal…
Natal berngi enda maba aku ngidah mulihin kupudi
Rusur ka pe langa aku siap adi aku tuan rumah PJJ
Megati ka pe la aku siap adi aku tuan rumah PA Mamre
Labo perban la banci ban perpulungen irumah
Tapi mberat kuakap nikapken ingan pulung e
Sebab adi perpulungen enggo mulih
Biasana sada she dua jam ka aku pesikap jabu
Ngaturi kursi
Nggulungi amak

Nikapken snack…..
Sebab adi la berbobot snackna jabuku kurang kuakap ergangku
Pernah melala tading bas piring risol ras mi keriting
Sedak kuakap natapsa adi la pan kalak snack si kusikapken
PJJ enggo jadi kontes pangan
Mamre, Moria enggo jadi kontes makanan..
Mberatsa kuakap namaken kolekte bas empat kantong e
Kuperhitungken kerina pengeluarenku ngadap Tuhan tiap minggu
Ongkos !!
Kolekte !!
Persembahen-persembahen pe macam-macam !!
Iuran Diakonia….
Iuran Mamre
Iuran Moria
Kolekte anak-anak

Ningku bas ukurku…
Adi lalit sen, ngadap Tuhan pe ateta susah kap….
Adi lalit sen, labo kam banci rembak ras Tuhan.

Iakh, adi la ate tama, labo uga pe, labo kai pe nina kalak
Bage nina tempa ukurku
Tapi, mela bage nina ukurku

Natal…
Eme erpala-pala ngelitken siman litenken
Jadi baban si mberat man bangku
Tapi sekali setahun kap ngenca
Janah jadi pengikut Kristus e arus kin mberat, mbue tantangen

Payo kin e ?
Natal jadi beban entah Natal mbaba dame ?
Kai kin ertina Yesus tubuh ibas ingan si meluat ndai ?
Okh…, Natal… Ate Yesus mbaba dame man banta, aku, kam, kita kerina.
Alo-alo dage kerehenna ibas pusuhta sekalak-sekalak. Amin.

2000 TAHUN SI LEWAT TUPUNG
KRISTUS NUSUR KU DONI
Karya : Pt. Julianus P Limbeng

Kurngee….., kurngee……, kurngee…….

Sora tangis terbegi tengah berngi si melenget
Arah karang asuh-suhen si payo melket
Bas mbal-mbal Efrata reh malekat tersinget
Berita si baba erbahan permakan sengget

Kurnge….., kurnge……., kurnge……..
Jusup Maria kap Bapa Nande….
Cirem ayona natap ayo anak e
Nasaret nari, Galilea ku Betelehem
Meriah ukur natap anak medem

Kurnge…., kurnge…..

Ibaluti na pake ampan
Gelah bene huana mbergeh
Si tubuh e kepe ken Tuhan
Sipadanken e enggo kap reh

Kurnge….., kurnge……, kurnge…….
Ndauh sorana njoler bas gelap berngi
Sitik-sitik sora e kubegi
Tedeh ate lanai terpilasi
Mbukaken pusuh lupa megati

Ia reh ibas si meluat nari
Erkiteken dosanta melket jine
Erkiteken dosanta lanai tertap-tapi
Sigejapken kin dosanta nake ?

Kurnge…., kurnge….., kurngeee….
2000 tahun lebih O Tuhanku…
Amin kitik gia terbegi denga sora tangisndu bas cupingku
Tapi lalap lakupesikap dalan kerehenNdu bas pusuhku
Erkiteken sehkal Buena sura-surangku,

Kurnge…., kurnge…
Bas berngi enda o Tuhanku,
Ateku ngaloken Kam ibas pusuhku arah peringeten ketubuhenNdu
Keriahen natal labo gunandu, tapi dominan gunangku
Keriahen mperingeti kerehendu, megati la sentudu ras sura-surandu…
Oh…. Berngi enda kuinget tangisndu, jadi persinget man bangku, kita. Aku ras kam.

Bj. Menteng, 6 Desember 2005.

No comments:

About Me

My photo
Bekasi, Jawa Barat, Indonesia
Etnomusikolog