5 September 2006

Kebaktian Alternatif

KEBAKTIAN ALTERNATIF

Pt. Julianus P Limbeng, S.Sn., M.Si*


Bena Kata

Ibas jaman si gundari penggunaan kata alternatif tuhu-tuhu mbue siidah berkembang ibas masyarakat. Lit pengobaten alternatif, musik alternatif, jalur alternatif, makanan alternatif, permainan alternatif, ras sidebanna. Mbue denga kata-kata berimbuhan ‘alternatif’. Kata alternatif nuduhken sada situasi, aksi, pelaksanaan sada dahin, ras sidebanna si la bagi aturen konvensional entahpe la bagi biasana si enggo lit ilakoken si banci merupaken sada pilihen. Hal sibagenda rupana tentuna nuduhken maka lit perbedaan-perbedaan bagi ibas sisi konseptual, bentuk, ukuren, nanam, selera, pengangkan entahpe pemaknaan, bagepe sisi pelaksanaan ras persyaraten-persyaraten sidebanna. Litna kata alternatif e sendiri tentuna menyangkut pe kubas cara ras metode uga sekalak-sekalak ngangkai sada-sada hal sesuai ras latar belakangna sierbage-bage guna memutusken untuk memilih.
Lebih mbages ka pe tentuna ije sadar entahpe la sadar lit keberpihaken, pengakap, ‘kiniteken’, menilai, ras pe erbahan nilai-nilai (value) kerna alternatif e sendiri bagepe kerna nilai-nilai si la alternatif si lanai banci mengakomodasi kebutuhen pribadi-pribadi entahpe kelompok-kelompok tertentu, erkiteken cara-cara entahpe metode si konvensional lanai ‘iakap’ pas. Alasen sideban pe litna alternatif terkait kubas masalah ‘nanam’ entahpe rasa (taste). Mbue si ngelakoken pengobaten ku ‘dukun’ patah, tapi pe melala ka kalak si ertambar ku ortopedist. Ije lit unsur-unsur kiniteken entahpe nanam ndai rikutken pengalamen. Kiniteken ras nanam e muncul erkiteken litna pengalamen-pengalamen, latar belakang, sierbahanca sekalak memutuskan erbahan penilaian baik, buruk, salah benar ras sidebanna.
Litna alternatif tentuna maba jelma baik secara individual entahpe kelompok memilih entahpe berpihak kubas sada-sada hal. Pemilihan ras pe keberpihaken e sendiri banci pe lebih kubas pembenaren ras sini iteki lebih pas entahpe lebih payo sesuai ras kebutuhen ras keperlun ibas sada situasi si pas man kalak si memilih alternatif e sendiri. Keberpihaken entahpe pemilihen e pe muncul erkiteken masalah nanamna entahpe cita rasa si lebih pas man bana entahpe kelompok-kelompok tertentu. Sifat perbedaan e banci saja pe lebih minimalis entahpe maksimalis bagi si enggo lit. Alu litna pengalamen-pengalamen ndia, maka mulai muncul cara uga memenuhi kebutuhenna e alu cara-cara sideban. Tentuna ibas gerejanta pe hal sibagenda rupana enggo ndekah muncul erkiteken manusia jenuh situasi monoton ras kaku.

Kebaktian Alternatif

Munculna kebaktian alternatif ibas gereja pe akhir-akir enda merupaken sada perkembangen untuk mengakomodasi kerna pengangkan nanam ndai ibas perpulungen si la seri. Lit si atena rende alu ertepuk-tepuk janah angkatna tanna, pokokna ibas ia rende banci alu ‘bebas’ mengekspresikan diri guna nembah muji Dibata. Tapi pe lit ka si atena rende cukup iiringi pake orgel, organ saja alu sada sora (monofoni). Ibas GBKP enda pe khususna ibas perayaan-perayaan Natal lit piga-piga bentuk kebaktian si enggo ilakoken. Lit ka kebaktian si mulai pemena seh pendungi menggunaken alat musik tradisional Karo (Sarune, Kulcapi, Gendang, Gung ras Penganak). Lit ka pe musikna kolaborasi musik etnik Barat, bagi kibot, terompet ras tradisional Karo. Ibas sada natal Permata GBKP pernah musik pengiring kebaktian bahanna band, alu kategori band ‘rock, eme musik hingar bingar. Lit ka hanya pakai organ saja entah pe piano saja ngenca. Lit ka si la memakai alat musik sama sekali. Adi kuta-kuta pada umumna langa piga si make alat musik, biasana a capella saja. Emaka tonalitasna pe tergantung sierbaba lagu. Emaka banci la seri nada dasar anggota perpulungen e. Tapi lit ka pe deba runggun si enggo lit pemimpin pujian (song leader) lengkap ras pemain musikna.
Adi sinen munculna ibadah-ibadah alternatif biasana lit daerah iperkotaan si tingkat persentuhen dengan budaya luar enggo mbue. Pengalamen-pengalamen kerohanian jemaat pe enggo mbue ‘ngenanami’ hal si la bagi semalna ibas gereja GBKP, lit ngatakenca alu istilah ‘jajan rohani’. Aktifitas si bagenda rupana tentu lit kaitenna kubas entahpe pengalamen spiritual kerna nanam ndai. Tapi GBKP sebagai sada gereja tentuna lit tata aturen sini isefakati bersama, kai si banci ilakuken ras kai si la banci ilakuken, eme Tata Gereja GBKP. Gereja GBKP pe lit pengakuan dasarna (konfesi). Tujunna eme gelah kerina banci ratur, sebab Dibata si sembah kita e pe eme Dibata si ratur (Band. Kej. 1). Tapi pe memang peraturen-peraturen si ni bahan manusia terbatas kel sifatna, lalit si sempurna, tapi manusia e selalu ingin menyempurnaken, erkiteken manusia e pe dari ke waktu ke waktu terus berubah. Bagepe GBKP dari 1890 she gundari terus mengalami perubahan-perubahan. Emaka tata gerejanta pe tatap ilakoken perubahen.

Liturgi ‘Alternatif’

Adi nulih kita kubas tata gerejanta si mbaru, eme Tata Gereja GBKP 2005 – 1015
[1] maka lit pe ije ruang man Runggun erbahan sada bentuk liturgy si bagi tertulis ibas buku liturgy si resmi ipedarat Moderamen GBKP.[2] Ibas Tata Gereja e lit isuratken kerna kai kin sini imaksudken ibadah, tujuan ibadah, bentuk-bentuk ibadah, penanggung jawab ibadah, pelaksanaan ibadah, menggunakan bahasa Karo ras Indonesia, pelayan ibadah, penggunaan alat-alat musik, pengembangan ibadah dan tata ibadah entah pe liturgy. Tapi penjelasen-penjelasen sechara rinci kerna ibadah e sendiri ras ltata ibadah (liturgy)na la lit. Erkiteken si e agak sulit man banta nafsirken uga kin situhuna tata ibadah liturgy ndai.
Litna Pasal 47 ayat 1, point (f), (i), ras (k), bagepe pasal 47 ayat 2 mbuka kesempaten man runggun-runggun entah pe perpulungen erbahan sada tata ibadah alternatif disamping tata ibadah si enggo lit isikapken Moderamen ibas Buku Liturgi si dua bahasa (Karo ras Indonesia). Ibas point f isingetken maka “pelaksanaan ibadah minggu menggunakan Tata Ibadah atau Liturgi GBKP dan Tata Ibadah lainnya yang digunakan secara khusus dan telah disetujui oleh Majelis Jemaat (Runggun)”
[3]. Enda nuduhkenca maka banci ibahan liturgy selain liturgy si enggo lit. Tapi uga batasenna ? Sebab ije fungsi Majelis Jemaat sangat dominan banci.
Bagepe ibas pasal 47, ayat 1 poin (i) isingetken “dalam ibadah dapat menggunakan alat musik’. Alat musik si kuga imaksudken ije, sebab musik sendiri pe luas kel pengertianna. Adi kalak karo sendiri lalit istilah musik. Kai pe ikataken gendang. Minimal lit 5 pengertian gendang man kalak Karo si berkaiten situhuna ras musik ndai, eme (1) gendang sebagai ensambel, eme gendang lima sedalanen, gendang telu sedalanen, gendang kulcapi ras sidebanna; (2) gendang sebagai repertoar, contoh gendang perang-perang, gendang pengarak-ngarak ras sidebanna, (3) gendang sebagai nama lagu, contoh gendang mari-mari, gendang patam-patam ras sidebanna; (4) gendang sebagai alat musik (instrumen), eme gendang anak, gendang indung, ras (5) gendang sebagai upacara, eme gendang guro-guro aron, ras sideban. Emaka uga kin musik sini maksudken ije ? emaka pengangkanta kerna musik pe ibas ibadah langa seri kel, aminna gia perbedan merupaken kinibayaken ninta. Lit deba gereja GBKP, vokal group saja pe bas kebaktian la iberena, harus koor entahpe paduan suara, nina. Lit ka si ertepuk—tepuk rende, lit ka si la banci ertepuk. Inget, ertepuk pe musik, sebab ia ritmis, lit ije tempo, aksen tersis, arsis.
Ibas Pengakuan Dasar (Konfesi) GBKP pasal 6, poin l, pe isingetken nina “hendaklah dasar theologia,bentuk dan irama dari liturgi dan nyanyian yang digunakan dalam ibadah adalah hasil dari hubungan yang dialektik antara Alkitab dan Tradisi dengan konteks peserta dan pemimpin ibadah. Jadi ije pe itekanken unsur tradisi, eme adi kita gereja latar belakang budaya Karo, tentuna tradisi Karo. Jadi situhuna imungkinken guna erbahan bentuk-bentuk tata ibadah entahpe liturgu ibas kebaktian, sebab kerna si e pe isingetken ibas Tata Gereja Pasal 47 ayat 2.

GBKP ras Globalisasi

Pemahamen keKristenenta tentuna maka labo GBKP enda si nelamatken kita ibas dosa nari, tapi pe Yesus Kristus Tuhan, anakNa si enggo ngamburken darehNa I Golgota. Tapi pe GBKP sebagai salah sada gereja Tuhan idoni, eme merupaken salah sada wujud persadan jelma si mbaru si terus menerus ipelimbarui kesah si badia gelah ngasup tetap jadi sira ras tending ijape ia ringan. Alu bage dage maka gereja banci naksiken geluh Yesus, gelah kinirajan surga terwujud ibas doni enda. Eme gereja sebagai kula ni Kristus ras Kristus sebagai ulu entah pe takal perpulungen (Band. Matius 5:13-16, Efesus 4:12-16). Emaka perpulungen e ibadiaken ibas kebenaren (Yoh. 17:17-19). Alu bage maka gereja e badia. Si pebadiakenca eme Yesus Kristus si enggo pedabdiaken diriNa bagi gereja (Yoh. 17:19, Titus 2:14, 1 Petrus 2:9), alu bage maka gereja e inganna i doni, labo bas doni nari (Yoh. 17:14-18).
Emaka GBKP sebagai gereja alu latar belakang, entahpe memproklamirken dirina gereja entahpe persadan kalak si badia ibas ‘Batak’ Karo, emaka ciri ke-Karoan ndai sangat perlu kel. Sebab ibas era globalisasi enda ciri sangat perlu kel. Emaka munculna pe perlindungen terhadap ke-khasan tertentu ibas Intellectual Property Rights (IPR), bagi cita rasa (taste) pe ilindungi, sebab e perlu. Si mbedaken coca-cola ras tuak, ayam goreng Suharti ras Kentucky Fried Chicken, pagit-pagit ras coto makassar, lomok-lomok ras rica-rica eme ibas nanam ndai. Kebaktian alternatif pe muncul erkkiteken nanam. Tapi enggo me siukuri uga gelah nanam ndai nanam Karo na kental ? Idah mis ije khas Karona. Sebab ibas konfesi gerejata pasal 6 point l pe itekanken situhuna ije masalah tradisinta.
Secara pribadi aku ngidah maka anak ‘nge-rock’ janah lompat-lompat ia bagi Raja Daud rende ibas konteks membina hubungen ras Dibata la lit masalah, sejauh alu cara bage banci ngerembakken hubungenna ras Dibata. Sebab la terban kita sada indicator si ketat musik si kuga banci ialoken Dibata. Ibas kitab Masmur kuakap melala ije isinggung alat-alat musik guna muji Dibata, tapi tentuna konteks alat musik si ungkapken ibas Masmur e, eme alat musik waktu jaman peMasmur nggeluh, eme sue ras tradisina. Janah alat musik band pe situhuna la terlepas kubas perubahen-perubahen, mulai arah alat si sederhana she ku alat musik si kompleks bas Negara Barat, misalna orkes simfoni (Band. Sejarah Musik Barat). Sarune, gendang, surdam, erkiteken siidah biasa, maka la siakap meherga. Adi gereja Barat ipakena alat musik Barat sebagai musik pengiringna. She maka ku Indonesia enda pe jaman Belanda babana piga-piga Organ Tabung (pipe organ), eme organ Gereja Kathedral, Gereja Imanuel Gambir ras Jawa Tengah. Alat musik e budayana. Lit kin GBKP enda alat musikna ibas kebaktian Gendang Lima Sedalanen ? Lang. Musik e ndekah siakap gendang perbegu.
Ibas jaman globalisasi enda, kuakap perlu kita memunculken kembali cirita sebagai gereja Karo. Pengembangen tata ibadah pe adi memungkinken ibas tata gerejanta gelah min ke-Karoan ndai gelah sifokusken. Kuakap la masalah gelar ‘alternatif’, sebab alternatif lit tempa maknana si erbage-bage.

Pendungi Kata

Teringet aku, marenda adi lakon persadan si badia Kuta Jurung tahun 80-an, roti bulan cepik-cepik ras anggour cap Vigour elaken pandita, perpulungen nikapkenca. Anggour vigour alkoholna di atas 15 persen. Mungkin berbahaya man kalak mehuli kulnana, adi mbuesa. Uga bicara anggur ras roti ibas Lakon Persadan Si Badia e iganti jadi gadung belgang ras lau pola, entahpe lau mbentar saja ? LPS Alternatif ? Sebab adi lit kebaktian alternatif, lit pandita alternatif, pertua alternatif, diaken alternatif, guru alternatif ? Justru, la pedah sibahan gelarna alternatif, sebab lit ije pemaknaan aminna gia ia merupaken sada pilihen, tapi ibas konteks litna kesemppaten erbahan tata ibadah entahpe liturgy, ruang si bage rupa cuba simanfaatken guna mengakomodasi perpulungen ibas arti ngerembakken dirina muji Dibata, tapi labo mengakomodasi kepentingen jemaat gelah ula kiam saja tapi kepentingen jemaat e sini iutamaken erkiteken lit latar belakang sierbage-bage rikutken ras pengalamen pribadi-pribadi. Sebab kepentingen Tuhan Yesus Kristus nge siterutama, mutlak. Lebih mehuli ka adi sifokusken ku tradisinta, gelah tuhu-tuhu gereja GBKP sebagai persadan kalak sipebadiaken Tuhan tuhu-tuhu Karo e teridah. Bekasi, 20 Maret 2006.

* Anggota Badan Pengembangan Ibadah dan Musik Gereja (BPIMG) GBKP.
[1] Aminna gia gundari paksana sosialisasi, janah lit denga piga-piga hal siipertanyaken perpulungen.
[2] Lihat Tata Gereja GBKP 2005 – 2015 pasal 47 (hal. 48-49).
[3] Kata ‘Runggun’ merupaken tambahen ibas penulis nari.

No comments:

About Me

My photo
Bekasi, Jawa Barat, Indonesia
Etnomusikolog