DOKURITSYU CA…
Julianus P Limbeng
Nangkeng-nangkeng uruk Jung Keriahen si mesangat pe ngasep tentera e erlereng, padahal dalinna dalin taneh si la mejile. La kueteh piga kalak beliganna kerina, tapi la kurang dua puluh kalak. Ertengkuluk janah ergonje lengkap ia kerina, rupana metaneh. Ndekah aku ngadi natap-natap kerina tentera e, janahku njujung lau tare tambe ibas takal alu erlanamken kain panjang si rusur pe kujadiken jadi perembah agingku si Tabar. Kerina kalak sierlereng e ngelepusi aku si sangana mulih tapin Lau Beton, inganku ridi ras mbuat lau inemen sitep-tep erpagi-pagi ras karaben. Tentera siperpudina kel bas kalak ndai sempat ngadi kentisik, janah tatapna aku sisangana njujung tambe ras erabit datas saja ngenca. Ciremina aku, minter ka ungkena lerengna ndai ngikuti teman-temanna.
Piga-piga wari ka, mulihken ka kuidah tentera ndai ku kuta. Erlereng ia kerina engkelilingi kuta. Tentera sipernah natap aku sangana mulih lau nari seminggu si lewat pe kuidah ikut denga ije. Kepeken kalak enda eme tentera Nippong. “Hirashaimase… hirashaimase….”, nina pengulu nalami tentera-tentera ndai kerinana. Tupung tentera ndai ngkelilingi kuta, lakugejap ngadi aku mbayu i umba-umba rumah, erkiteken terheran-heran kel aku natap-natap lereng (sepeda) tentera e kerina. Lit bab kalak e perik, gelarna perik tuan, lit ka pe suani tentera e kayu-kayu, sini tergelar kayu Nippong entahpe kayu tuan (saingon).
Sekali seminggu ugape tentera nippong e reh ku kuta kami. Iajarina piga-piga anak perana baris-berbaris lebe-lebe rumah tuan. “Dokuritsyu…. Ca…., dokuritsyu …. Ca….”, nina kubegi sora tentera e ngelatih anak perana kuta. Emaka iajarina ka anak-anak perana e lagu hinomaru ras sidebanna.Dung kenca latihen baris berbaris, sada tentera nippong ndai. Kepeken enggo dua tahun kalak ndai tading taneh Karo Dusun Deli, eme i Talapeta (Taman Latihen Pemuda Tani). Emaka alu kalukkang-kalukkang enggo ietehna sitik-sitik bahasa Karo. “Go kam man ha…, ise gerarndu…”, nina sada tentera man bangku kenca dung ia latihen. Kuciremi saja. Kuterusken saja mbayu bayunku amin gia meriah kel ukurku iperkuankenna aku. Merhat kel aku iboncengna idatas lerengna si mejile e. Amin gia kutaku la ndauhsa kota Medan nari, tapi jarang-jarang denga kel aku ngidah lereng. Radio pe rumah pengulu denga ngenca lit.
Tiap dung latihen baris-berbaris ugape tentera Nippong simperkuanken aku ndai pasti singgah entah pe lewat arah jabu kami. Sebab labo kata gombangku, labo kueteh selama enda rupaku mejile. Amin gia umurku nguda denga, enggo mbue rusur anak perana erjagar-jagar ras aku. Tapi labo kueteh kai maksudna. Kenca tentera Nippong e rusur mperkuanken aku maka kepeken lit turah penggejapen ibas pusuhku. Emaka aku pe bage, sengaja rusur aku kundul ku i umba-umba, erkiteken rumah kami rumah panggung. Kutimai rusur ia lewat. Adi marenda ngenehen lerengna ateku jadi, tapi gundari mulai turah ateku tedeh man jelmana. Gelarna pe enggo kueteh, eme Sakuhaci. Erkiteken mehuli kel kerina tentera nippong ndai emaka ngena ate anak kuta. Iajarina ngasuhi lembu, kuda ras sidebanna. Maka pe nina kita seri, janah Nippong nerangi bagepe ngelindungi. Bagepe pedas kel kerina tentera ndai beluh bahasa Karo. Emaka meriah kel ukurku, janah torah ateku jadi. Labo aku saja si ermeriah ate, kerina anak kuta meriah akapna ngalo-ngalo Nippong ndai, emaka piga-piga anak perana enggo masuk ku heiho, termasuk pe Kakangku Si Nuah pe ikut jadi heiho.
Ibas tahun 1942 umurku kira-kira sepulu lima tahun denga. Amin gia bapa ras nande la senang, erjabu me kami alu erbuni-buni ras tentera Nippong ndai alu lalit kerja adapt kai pe. Ibabana me aku tading ras ia i Talapeta. La ndekahsa mehuli me kulangku, janah kenca enggo she bulanna, tubuh me anak kami sintua, janah ibahan me gelarna Tala Mamoru. Tala e aku erbahansa, Mamoru perbulangenku erbahanca, janah labo kuangka kai ertina. Amin gia ibas ingan sideban lit romusha nina, tapi ibas kuta kami lalit e terjadi. Malah enggo mbue lembu bagepe kuda tuan nippong ndai ipejalang ibas permakanen. Meriah kel ukurku erkiteken kenca pupus kami si Tala Mamoru tubuh, nande ras bapa pe enggo senang erkelaken Sakuhaci. Iulih-ulihi nande rusur aku ku Talapeta, amin gia ngepari Lau Belumei si cukup mbages.
Sada wari ibas bulan waluh tahun 1945 reh me perbulangenku ku rumah. Tungkatkenna lerengna, janah bukana bulangna rikut pe teridah ndele ibas ayona. Bengket ia ku rumah, janah minter ia medem bas amak cike si kubayu ndube. Emaka kundul ia, tatapna anak kami si Mamoru sisangana main-main sekalak. Iangkipna… iemana kurumna… idakepna….. Amin gia dua tahun denga umurna anak kami Mamoru, tapi enggo beluh kel ia ngerana amin gia la pas, tapi jelas ertina. Tatap Sakuhaci ka aku alu pengenehen si la biasa. Erbelas tempa atena, tapi laibelaskenna. Emaka angkipna ka mulihken si Mamoru anak kami. Dakepna kel anak kami si Mamoru, janahna ngema kurum Mamoru, kuidah naktaken iluh perbulangenku. Padahal nin man bangku, makana sebage tentera Nippong la banci ngandung ras menyerah. Padin ndelis asangken talu ibunuh kalak. Tapi sendah la kueteh kai sebabna maka perbulangenku naktaken iluhna.
“Layou….”, nina man bangku alu manjar-anjar. “Kari karaben e aku terpaksa mulih ku kutaku, erkiteken kutaku enggo meseng, janah kami kerina tentera Nippong arus mulih kujah….” Nina Sakuhaci erbelas man bangku. Sehkel senggetna aku mbegiken rananna e, janah lanai terbahan aku erbelas selain naktaken ka iluhku. “Adi pagi enggo situasi mengijinken, reh ka pagi aku mulihken ku Talapeta enda ngelegi kam duana ras anakta Tala Mamoru… tapi aku arus karaben enda mulih….”, nina. Mulih ku kutana nina pe labo kueteh ija kutana, bicara dahi pe ningen labo pagi kueteh ku ja man dahin. Sebab sikueteh kutana nina arah matawari pultak.
Kutatap ku darat rumah, enggo enterem kuidah anak kuta ibas kesain. “Merdeka…, merdekaa….” Nina. “Merdeka Layou…. Merdeka…..”, nina sekalak perbapan man bangku. Perbapan, pernanden, singuda-nguda anak perana, rikutpe anak-anak kerina ermeriah ukur janah ersurak merdeka. Tapi aku sisada la kueteh kai ertina merdeka e, kai bedana merdeka e. Sikugejapken tuhu kel ndele ukurku, erkiteken perbulangenku arus wari karaben enda berkat mulihken ku matawari pultak.
Kira –kira nggeling matawari ku benna, enggo me ersikap-sikap kerina teman perbulangenku mbaba tas ras lerengna kerina. Ibas kesain kuta teridah anak kuta narik lembu ras narik kuda jadi sikerajangenna bekas tinading tentera Nippong si bakal berkat mulih ku kutana. Lit sinarik dua lembu, lit sinarik kuda janahna ersurak “Merdeka Bi…, merdeka bengkila…”. Bagepe Sakuhaci perbulangenku enggo nusuni tasna, bagepe lerengna. La lepas-lepas ibas dakepenna anak kami si mamoru. Bagepe aku, lanai kueteh kai siman turinken selain iluh mambur seh ku ten-ten. Kerina kalak ermeriah ukur janah ersurak ‘merdeka’ atapi aku sitik pe lalit meriah ukurku ibas merdeka ndai.
Karawaci, 20 Juli 2007
Nangkeng-nangkeng uruk Jung Keriahen si mesangat pe ngasep tentera e erlereng, padahal dalinna dalin taneh si la mejile. La kueteh piga kalak beliganna kerina, tapi la kurang dua puluh kalak. Ertengkuluk janah ergonje lengkap ia kerina, rupana metaneh. Ndekah aku ngadi natap-natap kerina tentera e, janahku njujung lau tare tambe ibas takal alu erlanamken kain panjang si rusur pe kujadiken jadi perembah agingku si Tabar. Kerina kalak sierlereng e ngelepusi aku si sangana mulih tapin Lau Beton, inganku ridi ras mbuat lau inemen sitep-tep erpagi-pagi ras karaben. Tentera siperpudina kel bas kalak ndai sempat ngadi kentisik, janah tatapna aku sisangana njujung tambe ras erabit datas saja ngenca. Ciremina aku, minter ka ungkena lerengna ndai ngikuti teman-temanna.
Piga-piga wari ka, mulihken ka kuidah tentera ndai ku kuta. Erlereng ia kerina engkelilingi kuta. Tentera sipernah natap aku sangana mulih lau nari seminggu si lewat pe kuidah ikut denga ije. Kepeken kalak enda eme tentera Nippong. “Hirashaimase… hirashaimase….”, nina pengulu nalami tentera-tentera ndai kerinana. Tupung tentera ndai ngkelilingi kuta, lakugejap ngadi aku mbayu i umba-umba rumah, erkiteken terheran-heran kel aku natap-natap lereng (sepeda) tentera e kerina. Lit bab kalak e perik, gelarna perik tuan, lit ka pe suani tentera e kayu-kayu, sini tergelar kayu Nippong entahpe kayu tuan (saingon).
Sekali seminggu ugape tentera nippong e reh ku kuta kami. Iajarina piga-piga anak perana baris-berbaris lebe-lebe rumah tuan. “Dokuritsyu…. Ca…., dokuritsyu …. Ca….”, nina kubegi sora tentera e ngelatih anak perana kuta. Emaka iajarina ka anak-anak perana e lagu hinomaru ras sidebanna.Dung kenca latihen baris berbaris, sada tentera nippong ndai. Kepeken enggo dua tahun kalak ndai tading taneh Karo Dusun Deli, eme i Talapeta (Taman Latihen Pemuda Tani). Emaka alu kalukkang-kalukkang enggo ietehna sitik-sitik bahasa Karo. “Go kam man ha…, ise gerarndu…”, nina sada tentera man bangku kenca dung ia latihen. Kuciremi saja. Kuterusken saja mbayu bayunku amin gia meriah kel ukurku iperkuankenna aku. Merhat kel aku iboncengna idatas lerengna si mejile e. Amin gia kutaku la ndauhsa kota Medan nari, tapi jarang-jarang denga kel aku ngidah lereng. Radio pe rumah pengulu denga ngenca lit.
Tiap dung latihen baris-berbaris ugape tentera Nippong simperkuanken aku ndai pasti singgah entah pe lewat arah jabu kami. Sebab labo kata gombangku, labo kueteh selama enda rupaku mejile. Amin gia umurku nguda denga, enggo mbue rusur anak perana erjagar-jagar ras aku. Tapi labo kueteh kai maksudna. Kenca tentera Nippong e rusur mperkuanken aku maka kepeken lit turah penggejapen ibas pusuhku. Emaka aku pe bage, sengaja rusur aku kundul ku i umba-umba, erkiteken rumah kami rumah panggung. Kutimai rusur ia lewat. Adi marenda ngenehen lerengna ateku jadi, tapi gundari mulai turah ateku tedeh man jelmana. Gelarna pe enggo kueteh, eme Sakuhaci. Erkiteken mehuli kel kerina tentera nippong ndai emaka ngena ate anak kuta. Iajarina ngasuhi lembu, kuda ras sidebanna. Maka pe nina kita seri, janah Nippong nerangi bagepe ngelindungi. Bagepe pedas kel kerina tentera ndai beluh bahasa Karo. Emaka meriah kel ukurku, janah torah ateku jadi. Labo aku saja si ermeriah ate, kerina anak kuta meriah akapna ngalo-ngalo Nippong ndai, emaka piga-piga anak perana enggo masuk ku heiho, termasuk pe Kakangku Si Nuah pe ikut jadi heiho.
Ibas tahun 1942 umurku kira-kira sepulu lima tahun denga. Amin gia bapa ras nande la senang, erjabu me kami alu erbuni-buni ras tentera Nippong ndai alu lalit kerja adapt kai pe. Ibabana me aku tading ras ia i Talapeta. La ndekahsa mehuli me kulangku, janah kenca enggo she bulanna, tubuh me anak kami sintua, janah ibahan me gelarna Tala Mamoru. Tala e aku erbahansa, Mamoru perbulangenku erbahanca, janah labo kuangka kai ertina. Amin gia ibas ingan sideban lit romusha nina, tapi ibas kuta kami lalit e terjadi. Malah enggo mbue lembu bagepe kuda tuan nippong ndai ipejalang ibas permakanen. Meriah kel ukurku erkiteken kenca pupus kami si Tala Mamoru tubuh, nande ras bapa pe enggo senang erkelaken Sakuhaci. Iulih-ulihi nande rusur aku ku Talapeta, amin gia ngepari Lau Belumei si cukup mbages.
Sada wari ibas bulan waluh tahun 1945 reh me perbulangenku ku rumah. Tungkatkenna lerengna, janah bukana bulangna rikut pe teridah ndele ibas ayona. Bengket ia ku rumah, janah minter ia medem bas amak cike si kubayu ndube. Emaka kundul ia, tatapna anak kami si Mamoru sisangana main-main sekalak. Iangkipna… iemana kurumna… idakepna….. Amin gia dua tahun denga umurna anak kami Mamoru, tapi enggo beluh kel ia ngerana amin gia la pas, tapi jelas ertina. Tatap Sakuhaci ka aku alu pengenehen si la biasa. Erbelas tempa atena, tapi laibelaskenna. Emaka angkipna ka mulihken si Mamoru anak kami. Dakepna kel anak kami si Mamoru, janahna ngema kurum Mamoru, kuidah naktaken iluh perbulangenku. Padahal nin man bangku, makana sebage tentera Nippong la banci ngandung ras menyerah. Padin ndelis asangken talu ibunuh kalak. Tapi sendah la kueteh kai sebabna maka perbulangenku naktaken iluhna.
“Layou….”, nina man bangku alu manjar-anjar. “Kari karaben e aku terpaksa mulih ku kutaku, erkiteken kutaku enggo meseng, janah kami kerina tentera Nippong arus mulih kujah….” Nina Sakuhaci erbelas man bangku. Sehkel senggetna aku mbegiken rananna e, janah lanai terbahan aku erbelas selain naktaken ka iluhku. “Adi pagi enggo situasi mengijinken, reh ka pagi aku mulihken ku Talapeta enda ngelegi kam duana ras anakta Tala Mamoru… tapi aku arus karaben enda mulih….”, nina. Mulih ku kutana nina pe labo kueteh ija kutana, bicara dahi pe ningen labo pagi kueteh ku ja man dahin. Sebab sikueteh kutana nina arah matawari pultak.
Kutatap ku darat rumah, enggo enterem kuidah anak kuta ibas kesain. “Merdeka…, merdekaa….” Nina. “Merdeka Layou…. Merdeka…..”, nina sekalak perbapan man bangku. Perbapan, pernanden, singuda-nguda anak perana, rikutpe anak-anak kerina ermeriah ukur janah ersurak merdeka. Tapi aku sisada la kueteh kai ertina merdeka e, kai bedana merdeka e. Sikugejapken tuhu kel ndele ukurku, erkiteken perbulangenku arus wari karaben enda berkat mulihken ku matawari pultak.
Kira –kira nggeling matawari ku benna, enggo me ersikap-sikap kerina teman perbulangenku mbaba tas ras lerengna kerina. Ibas kesain kuta teridah anak kuta narik lembu ras narik kuda jadi sikerajangenna bekas tinading tentera Nippong si bakal berkat mulih ku kutana. Lit sinarik dua lembu, lit sinarik kuda janahna ersurak “Merdeka Bi…, merdeka bengkila…”. Bagepe Sakuhaci perbulangenku enggo nusuni tasna, bagepe lerengna. La lepas-lepas ibas dakepenna anak kami si mamoru. Bagepe aku, lanai kueteh kai siman turinken selain iluh mambur seh ku ten-ten. Kerina kalak ermeriah ukur janah ersurak ‘merdeka’ atapi aku sitik pe lalit meriah ukurku ibas merdeka ndai.
Karawaci, 20 Juli 2007
Comments