23 March 2007

KULCAPI

By: Kiel Nangins

“Jadi lanai bo kurang ergana e Ma..?”, ningku man sierbahan kulcapi e. “Ii…, lang. Labo man bandu saja kubahan bage ergana. Bupati pe nukursa bage nge kuban”, nina perbapan ndai janahna mbuat kulcapi. “Enda sorana si mejilena ndi…”, nina ka tole janahna mereken kulcapi ndai bangku. Lit ije surdam, balobat, bagepe pingko-pingko. Lit ka deba kulcapi si langa cet, janah lit ka deba si enggo cat tapi transparan saja. Tapi kulcapi e buen rupana mbiring. “Kai nge bahanndu cetna e”, ningku ka janah njemak kulcapi siberekenna ndai. “Ee.., rahasia…”, nina. Kepeken amin gia kuakap ia tradisional, tapi bas ia pe kepe lit rahasia dagang.

Em percakapenku ras ia ibas tahun 1993 sangana kutukur kulcapi man bana. Amin gia Rp. 75.000,- ngenca ergana tupung e, tapi pe cukup meherga man bangku. “E kulcapi si man bandu e produksi ke sekian…” nina. Biasana gitar klasik si mejile lit nomor serina, tapi enda kulcapi pe ietehna produksi ke piga. Emaka man bangku ia tuhu-tuhu sekalak si njelimet, metia ras murri. Janah bagian dalam kulcapi e ugape tulisna telu huruf singkaten gelarna. E ertina ia amin gia la mpelajari hak cipta (Intellectual Property Rights), khususna siterkait ibas bidang merek ras rahasia dagang, tapi enggo ipraktekken ras iterapkenna ibas produk alat musikna.

Ibas bulan Juli 2006 si lewat, mulihi ka aku reh ku jabuna nukur kulcapi. Kerina sikubegi arah babahna sepulu telu tahun silewat tetap seri. Siberubah erga kulcapi e ngenca. Eme naik lebih kurang sepuluh kali lipat per kulcapi. Woou.. luar biasa naikna. Ingan nukursa pe tetap denga, masuk ku gang sempit. Emaka kune merhat kita nukur kulcapi, labo kerina kalak meteh ija nukursa.

Kutukur kulcapi sada, balobat, surdam, ras pingko-pingko lebih kurang sepuluh item. Memang kualitas barang-barang enda kerina layak untuk igunaken entahpe imainken. Kutatap manjar-anjar perbapan ndai, enggo mulai nggir-nggiri erdalan erkiteken umurna pe enggo cukup metua. Cep-cepna mbako tabeh, janah inemna ka kopi hasil racikenna sendiri. “Enda kari bubuk kopi babandu mulih yah, aku sendiri erbahanca e..”, nina ka janah mbungkusi bubuk kopi alu plastik si erbutak sitik. “Lit denga nge sierbahan kulcapi e selain kam..?”, ningku. “Lanai bo lit kuidah, atendulah gia bas kibot e pe enggo banci ban sora kulcapi, emaka kalak si erpangir pe lanai bo enterem kel bagi nai. Impalndu pe sada ka pe la berminat neruskenca”, nina.

Emaka erdalan-dalan aku kota Berastagi. Kunehen barang-barang sibagenda rupana, mana tau lit replika entahpe miniaturna alat-alat musik entah pe kerajinen Karo, ateku. Tapi lalit kuidah. Padahal situhuna alat musik enda unik, janah banci jadi luah mulih adi kalak ertandang ku Taneh Karo (daerah tujuan wisata). Adi sinen barang-barang kerajinen si lit i tiga, la mbue siidah khas Karo-na. Paling pe lit sendok ras garpu ibas kayu nari, tulisenna pe LAKE TOBA. Menurutku sektor sienda kurang denga igarap Taneh Karo. Padahal adi biasana kalak si gawah-gawah ku sada ingan, ugapa pe enggo sikapkenna bas gajutna guna nukur luah khas daerah e. Misalna uis, makanen, cendera mata, ras sidebanna. Tentuna amin gia la bagi kualitas simejile, tapi pe ciri khas alu harga terjangkau.

Tupung pertama kali aku ku Kupang, mbue idayaken duplikasi entahpe replika alat musik khas Pulau Rote, ‘Sasando’, rikut pe hasil tenunen. Rukur aku janahku nangkih kereta sado keliling-keliling kota e. Amin gia lit guni plastik ingan kotor kuda e, tapi lit denga piga-piga si ndabuhen ibas dalan, erbahanca kebersihen kota e terganggu. Bagepe bauna nusuk ku igung. Tupung das kuda e, kuinget ka lalap kulcapi ndai. La piga nari kalak Karo erbahan kulcapi, bagepe nenun uis Karo. Adi kusungkun inang-inang sierbinaga uis Karo i Kaban Jahe, kepeken sierbahan uis Karo epe enggo Kalak Toba. Emaka labo kita heran adi luah siman tukuren taneh Karo nari pe merekna ‘Lake Toba’. Karo labo Batak, nina ka enterem kalak Karo, tapi uisna pe kalak Toba erbahanca. Emaka idaerah e lit ka pe kuidah Sekolah Menengah Industri Kerajinen (SMIK). Tapi la kueteh kerajinen kai sini igarapna. Ningku ibas ukurku, situhuna potensi-potensi si lit ibas Taneh Karo banci ikembangken ibas sekolah enda guna mendukung sektor pariwisata. Adi kin untuk oleh-oleh mulih nukur sada item saja bagi kulcapi ndai ergana Rp. 700.000,- kuakap sangat terbatas kalak nukursa, kecuali perlu kel, entahpe si lit senna lebih. Engkai maka la iban replika entahpe bentuk miniaturna, jadi gantungen kunci, pajangen, ras sidebanna. Hal sibagenda rupana la hanya kulcapi saja ngenca, tapi pe rumah adat Karo, gendang Karo, kulcapi, rimo, markisa, ras sidebanna-ras sidebanna.

Mulih pe aku ku inganku, terbayang denga aku kerna kulcapi ndai. Ibas sada erpagi-pagi lampas, kudeheri anakku si kebetelun berulang tahun sipeteluken. Kubaba janah kutamaken kulcapi sikutukur ndai ibas ampunna. “Selamat Ulang Tahun nakku, amin gia kam langa beluh makesa, alokenndulah,” ningku man bana. Kuendesken kulcapi ndai bana. Cikepna enteguh, janah tatapna mataku, janahku ngema ayona. Karawaci, 23 Maret 2007.

4 comments:

Yoel Kaban said...

Mejuah-juah...
Perlebe, kuga ngenda tuturta, Aku Kaban bebera Milala, he
entah erbulang, erbapa, ermama, erbengkila ndia aku? :)
aku merhat erlajar budaya Karo terbagesen, khususna ibas Musikna, bujur man tulisenndu si menginspirasi. terus berkarya.
Mejuah-juah

Anonymous said...

Mejuah-juah

Aku Pinem bebere Ginting arah juhar nari
lit kap penungkunenku, yaitu:
ija kin banci i tukur kulcapi enda bang?tolong kirimken alamatna ku email ku jlpinem@gmail.com
bujur

Anonymous said...

Mejuah-juah, aku Jekonia Tarigan bebere ginting. Gundari tading i Jogja, tapi orang tua tading i Raya, Berastagi, janah kuta kemulihen i Jandi, Kec. Juhar. Sentabi kal, aku pe mesikel kel aku erlajar kerna alat musik karo, khususna kulcapi. Gundari enda sangana aku i kuta, Raya janah lit sura-surangku guna nukur kulcapi tapi lenga bo kueteh ija kin enda lit man tukuren. Mohon informasi ibas kam nari. Adi banci tolong informasikendu ku: (jco.tarigan@gmail.com) Bujur :)

Dodi Purba said...

labo bapa Dep sini maksudkendu pembuat kulcapi e ma?

About Me

My photo
Bekasi, Jawa Barat, Indonesia
Etnomusikolog