20 March 2007

Komentar Batak Karo

Bergurulah seh ku Tiongkok nina, adi ningku perlu,
sebab sejarah kebudayaanta (Indonesia umumna) mbue
idat ibas Tionghoa nari. engkai maka bage, erkiteken
nai lit hubungen sejarah nusantara ras Cina. Adi si
siksiki misalna keterangen-keterang en ibas Tionghoa
nari, misalna ibas Kitab Chu-fan-chi sini itulis
Chau-Ju-Kua tahun 1225, maka nina i Nusantara kerajaan
si terkemuka ras terkaya sekitar tahun 1200an eme lit
dua, eme i Jawa (Kadiri entahpe Kediri ras Sriwijaya).
Sieteh maka kerajaan enda duana galang kel pengaruh
Hindu ras Budha. Masing-masing kerajaan enda lit
daerah kekuasanna. Kerna kerajaan Sriwijaya enda ndai
ikatakenna ibas Kitab Chu-Fan-Chi ndai kekuasanna eme
(1) P'ong-fong (Pahang)
(2) Tong-ya-nong (Trengganau)
(3) Ling-ya-ssi- kia (Lengkasuka)
(4) Kilan-tan (Kelantan)
(5) Fo-Lo-An (?)
(6) Ji-Lot'ing (Jelutong)
(7) Ts'ien-mai (?)
(8) Pa-t'a (BATAK)
(9) Tan-ma-ling (Tamralingga, Ligor)
(10) Kia-lo-hi (Grahi di Semenanjung malaka)
(11) Pa-lin-fong (Palembang)
(12) Sin-t'o (Sunda)
(13) Lan-wu-li (Lamuri, Aceh)
(14) Silan (Sailan?).

Disebutkan juga bahwa bandarnya baik sekali, bertani,
ladanya jenis yang baik sekali, tapi sayang disana
banyak perampok, sehingga perdagangan tidak lancar.

Ngidah hal sada enda, situhuna kerna Batak enggo
tercatat ndekah nai ope Penjajahen Barat reh. Marenda
pe situhuna enggo me sidiskusiken kerna sienda, tapi
la erkedungen.

Ibas seminar Desember 1995 ibas Kongres Kebudayaan
Karo i Berastagi pe nai e terjadi perdebaten sanga
Prof. H.G. Tarigan (Alm.) ngataken Karo la Batak,
sebab ibas bahasa Karo kata Batak lit ibas 'mbatakken'
eme terkait ras ritual, bagepe gula Batak, la gula
Karo (amin gia i Jawa ikataken kalak ka nge Gula
Jawa). Alu polos kel nai perkolong-kolongta Sinek br
Purba ngaku sebage kalak Batak Karo, sebab bagekin
selama enda iangkaina. Nina Prof. Henry Guntur "E.. ma
nindu..., ningku..?" alu gayana. Maka nina ibas
kongres e, penggelaren Batak e situhuna tinading
kolonialisme, adi siksiki kel artina la mejile, nina.
Bagem marenda sikubegi. Tapi adi nulih ka kita kubas
Kitab Chu-fan-chi Cina nari ndai, kolonial siapai kin
sini imaksudken Prof ndai? Apakah jaman Kerajaan
Sriwijaya, entahpe kenca penajajahen Barat. Batak nina
ibas kerajaan Sriwijaya e apai saja e? Jadi perlu ije
mpelajari sejarah.

Tapi sijelas ia, maka pengaruh Hindu mbelin kel
kaitenna ras sejarah Karo, terlepas Batak entah lang
gia.

Bagepe tulisen-tulisen kalak Karo sendiri, misalnya
Brahma Putro, D. Prinst (2004), labo jelas kel kerna
Karo enda ndai. Lit memang tertulis ije Kerajaan Haru
nina. Tapi ibas buku-buku sejarah kerajaan-kerajaan
nusantara la denga kuidah lit tersinget kerna gelar
kerajaan e (Kerajaan Aru/Haru). Bas kita ngenca top
enda. Kerna kai sinikataken D. Prinst, maka lit ije
kata 'KUTA' nandaken Karo. I Jawa Barat pe i kenal ka
nge istilah si e, Kampung-Kuta, bagepe i Bali, i Toba
'Huta'. Adi kin Karo pusatna, janah istilah enda Karo
punana pasti lit hubungenna (monogenesis) . Perlu
isiksiki. Adi Karo pusatna, banci jadi si klaim maka
Toba pe bagian dari Karo.

Adi tutus kel ateta, amin gia kuakap bagi si rumit
memang, gelah ieteh asal-usulta perlu lit usaha si
serius penelitian biologi molekuler. Tentuna mbue
butuh dana, bagepe ahlina. Adi kuakap la masalah
polling. Adi polling ningen, kuakap mayoritas
suku-suku sideban selain Batak meteh maka kita Batak
(Karo). Jadi mulihi ka bagi sini kataken Prof. H. G.
Tarigan ndai... "Nindu..., ningku...."

Buku H. M. Zainuddin dalam bukunya "Tarikh Aceh dan
Nusantara" (1961)lit ije isingetken kerna BATAK KARO,
bagepe H. Muhammad Said dalam bukunya "Aceh Sepanjang
Abad", (1981). lit ije tersinget bahwa penduduk asli
Aceh Besar adalah keturunan mirip Batak. Tapi
laijelaskenna Batak apai, tapi nina Batak. Lit
piga-piga temanku idaerah e (Aceh) maka ia ngaku kalak
Batak (Karo). Bu Ruzanah aceh nari, maka nina ia kalak
Karo, lit beruna. Bagepe Pak Zulkifli (kalak Aceh),
logat Aceh 'Karee'. Ikut ia bas arisen Munthe,
erkiteken situhuna ia kalak Karo, tapi gundari jadi
Acih. Bagepe Pak Buyung, "Kakek-kakekku sebenarnya
punya marga, Karo nina, tapi sekarang jadi Melayu..."

Jadi situhuna kel kesukuan e emosional nari ngenca.
Kai kin ciri-ciri Karo e, kai batasenna? ras
seterusna. Sentabi, tang-tangna marenda aku pernah
main musik i rumah Drs. Inget Sembiring, labo kuakap
ia kalak Karo, kalak Bule kuakap. Apai ka bicara jumpa
ras ia i Amerika misalna. Bagepe marenda i Buluh Awar
isyahken Mayjend Arie J Kumaat (Alm), --mantan Pangdam
I Bukit Barisan-- jadi merga Bukit, lengkap
bulang-bulang, cengkok-cengkok, ras uisna kerina
kerina ipakeken, janah ipalu ka gendang 'kibot'. Kalak
Karo nge ia? Prof. Mary Stedly (Antropolog, Harvard
Univ.) adi nguta-nguta katakenna ia Beru Sitepu, janah
lancar bahasa Karona, ietehna pe mbue kerna sejarah
Karo ndai, lit bukuna pe Gantung La Riket (hanging
without a Rope). Kalak Karo nge ia? Lit ka sekalak
anak perana Jakarta, gelarna bahasa Karo denga, janah
lit pe mergana, beberena jelas denga, rikut pe
binuangna, kampah ras solerna kerina. Labo tehna
bahasa Karo pe, labo pernah ku Taneh Karo pe. Kalak
Karo nge ia? Harry Tjan Silalahi la pernah benekenna
Silalahi e pudi gelarna. Adi la aku salah ia Cina.
Batak nge ia? Ras seterusna..

Jadi kesukubangsaan e, kuja kin ateta tujunna. Lit nai
kuidah 'pemurnian' nina, entah pe ku politis ras
sidebanna, e tentuna lain kari ia asilna.

Emaka menurut aku labo jelas kel, adi akapndu kam
Batak (Karo), Batak Karo lah kam, tapi adi la akapndu
kam bagian Batak, tapi Karo saja, Karo lah kam. "Kalau
Karo kenapa memang, tidak apa-apa kalau tidak Batak"
nina Pak Samosir ibas sada paksa.

Bagem lebe yah, kurang konsentrasi sangana....
Menarik situhuna pe siksiki dari struktur bahasa,
aksara. Gelah ula "ningku nindu" saja.

Bujur.

No comments:

About Me

My photo
Bekasi, Jawa Barat, Indonesia
Etnomusikolog