2 February 2007

LATIHEN KOOR EFEKTIF
Pt. Julianus P Limbeng

Bena Kata

Ibas kebaktin gerejanta koor entahpe paduan suara langa rutin kel siidah ibas tiap kebaktin minggu. Tapi adi sanga Natal e kenca, melala siidah koor, hampir tiap sektor nikapken sisitikna sada koor. Bagepe adi lit kalak pasu-pasu i gereja, biasana ugape lit koor, setidakna koor moria se-GBKP. Engkai maka la banci koor enda rutin ngisi ibas kebaktin? Lit piga-piga jababna eme: erkiteken lalit tim koor si solid; masalah waktu guna latihen; la talentana rende; pembinaan paduan suara si kurang, baik ibas sisi majelis nari, sumber daya manusiana (pelatih); masalah biaya; ras sidebanna. Padahal situhuna adi sisempat-sempatken, entahpe sifokusken waktu guna si e, situhuna labo metahat janah banci enda terlaksana ibas sada-sada runggun. Artina uga kita mengefektifken kerina kendala-kendala enda ndai, gelah arah pendahin si berbeda-beda, talenta siberbeda-beda, banci kerina irakut guna ersada ibas sada tim koor si mehuli.

Efektifitas Erlajar Koor

Memang adi ngerana kita kerna koor, tentuna pe ateta labo asal koor saja, gelah enggo saja, tapi pe koor si penampilenna mehuli, baik ibas kwalitas sorana, bagepe penampilen luarna. Guna mendukung si enda tentuna arus secara sukarela ngelitken waktu guna latihen. Sebab em bedana koor (paduan suara) ras rende sisada (solo). Lit ije rasa kebersamaan, uga kita menjaga hubungen sapih-sapih anggota paduan suara, gelah sora sindarat la menonjolken sekalak-sekalak jelma si ‘mejile’ sorana, tapi sora ras. Guna ndatken hasil si mehuli, arus latihen. Latihen la hanya menguasai lagu, tapi pe uga kita njiwai lagu siendeken e. Njiwai lagu la hanya analisis tekstual, kai makna entahpe pesan lagu siendeken e, tapi pe perlu ilatih uga njiwaisa secara musikal.

Emaka gelah efektif latihen, sekalak dirigen arusna min latihen lebe, janah nguasai kerina aspek-aspek kai kin sini imaksudken pencipta lagu e. Alu bage maka sidirigen pe enggo cukup pemetehna kerna lagu sini iajarken e. Lang adi je ka nge ia erlajar, enggo melala man waktu. Bagepe adi lagunta la bahasa ibu, misalna bahasa Inggris, pelajari lebe pelafalenna alu payo.

Hal dasar sini perlu iperdiateken eme sikap kundul sanga latihen. Kursi si empuk entahpe kursi malas la mehuli ingan latihen. Pangen gunaken kursi biasa kayu nari. Sanga latihen e ula malas-malasen, janah usahaken badanta tegak. Adi sanga ltihen koor, latihenlah ! Ula mbuesa ngeranai ras temanta sapih-sapih anggota koor. Sebab perkundul sibage pe lit kaitenna ras teknik pernafasen. Tutuslah tupung latihen. Sebab pelatih e empat kali rende, anggota paduan suara e sekali denga nge. Cukup latih !

Pergunaken waktu seefektif mungkin. Benai ras dungi latihen tepat waktu. Ula lupa ertoto, gelah Tuhan singajari paduan suara e. Simehulina min 2 kali seminggu latihen, adi la banci minimal sekali seminggu. Adi rutin sada jam saja tiap minggu enggo me mehuli adi labo e profesinta. Tapi rutin. Sebab labo jumlah buena latihen kel siperlu, tapi uga kita memanfaatken latihen e semaksimal mungkin.

Megati siidah latihen iulang-ulang awal lagu e she dung, tapi la ieteh ija salahna. E tandana singajarisa epe langga jelassa kel ibas ia lagu e. Berelah lebe kesempaten man anggota paduan suara menelaah lagu si bakal ipelajari e. Emaka mulailah ngelatih ija simesunahna. Labo dalih amin gia imulai itengah nari adi kin ije iakap simesunahna. Ibas sisusah e perlu ilatih alu payo. Mulailah latihen alu pemanasen, sebab pemanasen e la hanya penting melatih vokal, tapi pe konsentrasi anggota paduan suara e ras pelatihna terbina. Alu pemanasen e banci sibegiken soranta, bagepe sora kalak sideban. [Kerna pernanasen enda ibahas kami ka pagi ibas topik khusus].

Pelajari lebe alu mbaca notna (solmisasi), adi kira-kira enggo iakap mulai mahir, cuba ngendekenca alu ngganti solmisasi ndai alu “la-la-la-la”, emaka ku kata-katana (syair, entahpe teksna). Mastikenca payo entah lang lagu e enggo dat, pake teknik staccato, eme teknik rende alu putus-putus, la isambung. Emaka dungna gabungken kata-kata ndai sue ras melodi si enggo pelajari. Adi enggo dat, emaka masuk ku tahap penjiwaan entahpe pengungkapan ekspressi. Enda erat kaitenna ras intonasi, tempo, dinamika, pitch, bagepe artikulasi. Emaka sada nari si penting, pilihlah lagu si banci iendeken paduan suaranta. Enda ertina arus sieteh uga kualitas paduan suaranta. Tapi labo ka e jadi alasen la mpelajari lagu si susah. Cubalah. E gelarna lit peningkaten.


Pemanfaaten Teknologi

Perkembangen mesin-mesin rekam (digital), bagepe MIDI, situhuna enggo cukup mendukung efektifitas sekalak pelatih ngajarken koor man anggotana. Cukup irekam masing-masing sora saja, misalna ibahan ibas CD sora Sopran, bagepe sora Alto, Tenor, ras Bass. Bereken man tiap-tiap anggota koor e sada CD guna ibegiken janah ipelajarina irumah. Jadi kenca latihen gabungen, enggo lit modal dasarna erkiteken enggo ietehna lagu e. Jadi peran pelatih tading mpersada bagepe pelikasi kai-kai siperlu ipekena. Misalna masalah dinamika, penjiwaan, aba-aba konduktor, ras sidebanna siakap pelatih penting sue ras tuntuten uga arusna lagu e iendeken.

Jadi adi enggo irekam ibas bentuk kaset entahpe CD, jadi enggo banci kel efektif latihen e. Kuja pe anggota paduan suara e, enggo banci ibegikenna sekaligus erlajar. Bas mobil, kantor, sanga istirahat ras sidebanna enggo banci ipergunakenna waktuna guna latihen.

She gundari salah sada si menjadi kendala ibas ngelatih paduan suaranta eme pemimpin biasana kurang tegas nehken salah lepak anggotana, erkiteken mbiar ia megelut. Emaka man anggota paduan suara pe, arus betul-betul sibereken dirinta guna iaturken pemimpin paduan suaranta, gelah asilna mejile, mehuli, gelah arah epe tama kemulian man Tuhan. La kita si menonjol, tapi Tuhan siipermuliaken arah pujin. Emaka adi arah koor e ateta muji Tuhan, arusna min kita ULA PERGELUT.

Karawaci, 25 Januari 2007.

1 comment:

mejor sexshop said...

For my part every person should read it.

About Me

My photo
Bekasi, Jawa Barat, Indonesia
Etnomusikolog