19 October 2006

Cerpen

S I - C A K A P - K E N
Karya : Pt. Julianus P Limbeng


“Iak, adi enggo me piga-piga kita si pulung, emeka sibenaken saja me rapatta enda. Ndapetti si pudin”’ nina Pa Nderkem, eme Ketua Runggun, erkiteken jam pe enggo jam pitu berngi. “Langa kap kita quorum Pertua ?”, nina Pa Leto, erkiteken langa setengah pe reh Pertua Diaken ibas Sidang Runggun. Amin gia enggo me rutin sidang runggun ilakoken, janah gelah resmi ibahan ka nge surat undangen, tapi bage-bagem biasana. Padahal ibas undangen e jelas kel ije itulis, pulung jam 18.00, janah lit pe tambahen ibas kurung (makan malam). Emaka nina Pa Nderkem : “Timai kari quorumna tah la kari quorum-quorum .. Sebab bulan si lewat pe labo kita quorum.” Emaka nina Pa Leto: “Adi bage benaken saja, tapi ula siban keputusen. Adi quorum kari e banci.”

“Adi bage, sibuka dage rapatta enda (nuktuk meja telu kali). Jadi kerna notulen rapatta silewat banci bacaken sekretarista, entah lit perbaiken-perbaiken gelah sisyahken. Persilaken Sekretaris !!”, nina Pa Nderkem mbuka sidang. Emaka Pa Lepot pe sebagai sekretaris sapu-sapuna takalna si mulai enggo leneng. “Bujur. Emaka masing-masing siongkam notulenta masing-masing. Jadi erkiteken notulen enggo she kerina man banta, emaka la pedah kubacaken, kecuali adi lit perbaiken siman pekenan saja. Sebab bulan si lewat pe labo lit keputusenta erkiteken la mbue kita reh. Uga, lit si man pekenan ?”’ nina. “Kerna laporen pembangunen lakuidah lit bas notulen enda, uga ngenda”’ nina Pandita Bujur. “O, adi Kerna pembangunen laporenna tersendiri Pandita. Adi bage, notulen si lewat sisyahken”, nina Pa Lepot janahna misnter nuktuk meja telu kali.

“ Emaka gundari bengket kita ku laporen seksi-seksi. Seksi PWG lebe, persilaken”, nina ka. Emaka Pa Botoh pe sebage Seksi PWG mis ka aturna posisi perkundulna, nina : “Bujur. Ijenda ilaporken kami, maka ibas sector jauh enterem gundari lanai ku gereja.” “Kai sebabna Pertua ?” nina Sekretaris. “Gelarna pe sector jauh, ndauhsa ku gereja nina, adi naik angkuten empat kali nyambung-nyambung langa termasuk naik ojek ndarat komplek nari, langa denga ka kolekte, jadi adi perkiraken biaya ku gereja pp lebih kurang 40 ribu per takal”’ nina Pa Botoh. “Eakh, adi bage uga siban jalar keluarna adi bage ?” nina Ketua Runggun. “Adi kuakap perlu situkur sada motor guna ngangkutsa, sebab adi la bage, gereja sideban setiap minggu reh ngangkut anggotata ku gereja sideban. Daripada la ku gereja, ku gereja sideban pe labo dalih nina. Sebab galang kel biayana ndahi Dibata saja pe, nina”’ nina Pa Botoh. Emaka minter rempet tedis Pa Bakut, nina: “Interupsi ! Aku la setuju. Adi situkur kari motor, lanai bo kari ratur. Ise pe kari makesa nge.”

“Adi aku setuju itukur adi lit nge kas ta. Sebab ma sayang kel e adi latih nai akap seksi PI, kenca enggo bengket ku berita si meriah e, kalak peranisa”, nina Nande Gantang.
“Labo masalah rani Nande Gantang. Lang kin pe adi ateta tutus er-Dibata e, perlu biaya.
Gundari kai akapndu bas gereja enda la erbiaya, adi la erbiaya ise akapndu singgalari gaji panditata kerina ?”, nina Pa Bakut. “Payo nge Pa Bakut, tapi la kap seri kerina buatenta. Si megegeh nampati si la megegeh”, nina Nande Pirak.
“Sebagai tambahen, enggo tedeh kel ate kalak e Pandita reh ku sector jauh enda, sebab enggo ndekah Pandita la reh ku jah, nina..”, nina Pa Botoh. “Eit, Sentabi. Labo aku la kujah, tapi ganti-ganti rusur banna jadwal PJJ na, kuakap wari minggu, gantina rempet ku wari senin, e ma enggo serung, sebab aku pe jadwalku padat nge.”
“Kuakap payo nge bagi sini kataken pandita ena..” nina Pa Golom mbela Pandita..


“Iakh, kuakap kerna sada enda, sicakapken ka pagi selanjutna. Perlu lebe ipikirken ras iendapken, gelah kita ula mbuat keputusen si la payo”, nina Pa Lepot.Adi bage kin ninta bagelah, tapi kita biasana adi mperidiken luar biasa, tapi pembinaan enda aku ngidah kurang denga kel’” nina Pa Botoh. Emaka rempet ersora handphone-na, janah mis jawabna “Hallo…, ue…, kam e Silih….? Kai ndai…. O…. Ue yah.. mis aku reh.” Erkiteken idah agak sibuk ia, emaka mis isungkun Pa Lepot, nina “Kai Pertua, ma labo berita si la mehuli ?” “Jadi sentabi kel aku nake, aku terpaksa mulih erkiteken nabrak angkotta. Lang pe bidangku enggo me dung. Sentabi ya… “, nina Pa Botoh minter nadingken ruang rapat. “Yah, to dage yah… Gundari she kita ku seksi seni budaya, uga laporenndu”, nina Pa Lepot ngelanjutken sidang.


Emaka Nande Pirak pe mis ka mbereken lapurenna. “Bujur. Kami arah seksi seni budaya labo lit kai pe laporken kami sendah. Tapi perlu sieteh maka tiap wari minggu rende denga nge kerina perpulungen e. bujur.” Langa pe ipindo tanggapen, mis ngerana Pa Nderkem, nina : “Tapi sitik kuakap Nd. Pirak, pemain organta lit langa kuakap pas kel banna not lagu e. Ate-atena saja. Adi ate-atena saja man kai bahanen notna ?”

”Ise katandue Ketua ?”
“Enggo me lit. Kuakap sieteh nge ise ningku e, ma bage ?
“O… Pa Kese katandu. Wajar nge, lakin sekolahna musik, ngurut nge nai dahinna, deh kam hampir seri nge. Mecek nge duana, sada adi empet pecek, andiih… mesui nina, sada nari salah pecek, tureteteeeet… nina. E bedana,” nina Ketua Runggun e.
“Kuakap kursus kam ningen. Adi oraganna pe ate-atena banci kin perende perpulungen e pe bagi perende perkolong-kolong ?”, nina Pa Bakut mbereken saran. Minter merawa Nande Pirak, nina : “Perkolong-kolong kai kin katandue Pa Bakut ? Aku perkolong-kolong ya.. Gelah tehndu, labo kerina kel beluh rende bagi perendeku e. Nendu ya… “, nina janah ngendekan lagu Wari Enda ibas Kitab Ende-Enden Tambahen alu rengget jilen asa perkolong-kolong Lubang Kurung nari. Pas sanga Nande Pirak e rende, bengket me ku ruangen sidang Pa Mbetong. Pa Mbetong bendahara runggun. Daingna mbur, janah arah tempas dagingna epe tek kin kita adi ia njemak perbeliten gereja. Emaka minter perkuanken Pa Lapot, “E.. mari, ena kap go reh Bendaharata”. “Adi bage enggo kam banci kundul Nande Pirak,” nina Sektretaris.

“Adi bage aku ngerana ateku sitik. Man kam bendahara kami, kuakap banci nge sambarindu snackta. Tiap rapat adi la risol bakwan, adi la bakwan risol. Payo, adi entabeh, enda lang, pecek ndarat minakna. Kolestrol kerina. Danci kin akapndu sehat pertua diaken e adi e rusur banndu…”, nina Pa Bakut mis. “Iiii…, langa pe aku kundul Pa Bakut…” nina Pa Mbetong.

“Sentabi Pa bakut, seksi seni budaya ndai pe langa dung…., sisungi lebe gelah ula rulih-ulih”’ nina Pa Lepot. Minter ka aloi Pa Bakut, “Labo dalih, banci nge kari dungina, sebab seksi seni budaya e labo penting kel, rende ngenca urusenna, lape lit seksina tiap minggu rende nge perpulungen e, ma bage ? Sipenting adi nggit pemain organta ndai kursus, pindo man aku serpina. E, Uga akapndu ? Jadi, kam bendahara, uga kin maka melawen reh, ma idahndu nge, kerah kerina biber kami e la minem. Banci kin akapndu risol e saja bendut…?”
Emaka janah napu-napu beltekna si buncit, ngerana me Pa Mbetong, “Kam kerah nindu, bulan si reh adi labo sipegalang kolektenta, risol pe lanai tertukur. Kuakap man bahanen lima during-durungta sekali erdalan.” “Labo buat Buena during-durungna, sada gia adi mbelgah lah beliganna..,” nina ka Nande Pirak.

Emaka erkiteken menyimpang akap percakapen e, minter potong Sekretaris. “Ena kari saja kuakap si bahas. Gundari ku seksi Diakonia kita lebe”.

Nande Gantang sebagai Seksi Diakonia pe ngerana janah njemak buku Diakonia. “Bujur. Ijenda ilaporken kami maka, erkiteken virus flu burung si mbaru denga e, maka lit anggotanta dua dilo Dibata. Emaka demam berdarah 12 kalak. Janah lit sada keluarga man berenken bantuan, erkiteken manukna mate kerina, erkiteken imusnahken”. Sengget skretaris, “Ise ? Lit anggotata mate ?”, nina. “Ooo kam langa kepe tehndu. E mindo maaf aku bandu. Bp. Kurak ras Nd. Rukrak enggo leben nadingken kita”.
Mis ndauh tatapen Pa Lepot, nina: “Andikoo ale…, berarti pas sanga aku Amerika matena ari. Aturna si bage mis kin laporken kena man bangku, luar negeri gia aku, ma banci sms. Mela pe siakap, selaku sekretaris la sieteh biri-birinta mate. Iakh, terusken labo dalih”, nina Pa Lepot.

“Perlu pe pebetehken kami, maka kas diakonia gundari defisit, janah utangta 2 peti mati lit denga bas Bp. Bojot”’ nina Nd. Gantang. Emaka minter ka tanggapi ketua runggun, “Tapi bas momota minggu si lewat lit kuidah persembahen pengataken bujur ibas Bapa Bojot nari. Dua kali kuidah bulan enda, adi bage tah labo perlu man galaren ?”. Minter ka sampati Bendahara, “Bage kin, melala kap kalak mate bulan enda. Emaka cukup larislah peti matina”. “E labo banci bage pertua, kerna utang tetap nge utang, maka bage ningku sector kami ah pernah lakoken ngapuli. Si man apulen e lit utang diakoniana langa galarina, emaka sen diakonia siman ia e kam ipotong mbayar utangna.. E… dehkam tertib administrasi gelarna e…”.

“Adi bage cuba sisungkun lebe bendahara, tah uga kin posisi keuangenta pe,” nina Ketua Runggun. “Sentabi kel nake, Tading ka pe laporenku rumah, tapi kuhafal denga nge. Jadi siperlu kuakap kulaporken maka posisi keuangenta gundari defisit sekitar pitu juta setengah. Sementara utangta pe lit denga pekena sound sistemta, tambah pe peti mati bas Bp. Bojot ndai”. “Adi bage, uga dage siban e”, nina Pa Lepot.

“Adi ningku, bas Pa Bojot, jem lebe. Saja ngenca man anggota jemaatta adi banci min ula lebe sakit nindu. Bagepe entah lit si atena mate, timai lebe lit kas ta ningen. Lang deh kam. Lanai ka bo kari bere bapa Bojot ah ngutang…, enam kuakap ia” nina Bendahara tempa main-main.
Minter merawa Pa Leto, “Main-mainsa kuakap kita rapat enda pe. Kita e ngerana ibas kata Dibata e. Ise kin atena sakit ras mate…?”

Mis ka jawab Bendahara, nina: “Maka sakit ia, kai kin ukurken kerina doni enda ? Omong ngenca kita rusur, adi tuhu kin kita nerahken geluhta man Dibata, ma labo kai pe kebiarenta ? Aku terus terang nge. Labo aku nggit adoon. Ukuri si la man ukuren ah. Emaka pegalang kolektenta ningen man jemaatta gelah ula defisit”.
“Solusina lah si ban. Adi lit si sakit uga si ban, e ngia gundari man ukuren..” nina Pa Lepot.
“Adi bagena rupana perlu cakapken lebe, iah sicakapken..” nina Pa Mbetong..
Erkiteken naik akap pandita suhuna, emaka mis tengahina, nina: “Sentabi Ketua, ngerana ateku sitik. Kuakap kita labo perlu kel kakusa. Adi lit siman sampaten, sampatilah. Labo kuakap perlu man timan rapat, adi enggo bas biber kesahna”.
“Payo nge katandue Pandita, tapi senna e kap man ukurenken. Lang pe adi kerina mis sampati, kuakap kas ta pedas nge keri. Gundari saja kita enggo defisit…”, nina Bendahara.
“Adi masalah dana kuakap masalah carana nge si ban uga ndatkenca”, nina ka Pandita.
“Payo, tapi perlu nge lit kriteriana ise si man sampaten. Ula kari man sampaten ngenca ia, persembahen tahunenna, persepuluhen, ras pengataken bujurna pe labo pernah berekenna. Arus lit timbal balikna bas Dibata gia” nina ka bendahara.
Emaka minter ka angkat Nd. Kulu tanna, “Sentabi pimpinen rapat ! Aku lebe la sependapat ras Bendaharata. Adi bage naringe kai bedana kita ras kalak si lanandai Dibata ? La kin man kalak sibutuh nge situduhken kekelengenta ? Sebab Yesus enggo leben ngekelngi kita, emaka kita pe arus ngasup nehken kekelengenta man sapih-sapih kita bagepe man kalak sideban…” nina tempa-tempa khotbah.

“Gelah enggo itehndu ya Nande Kulu, biaya untuk Pandita saja pe bulan enda galang. Biaya telponna galang, perawaten mobilna galang, PAM-na galang. Langa ka listrikna. Emaka usulku man banta, periode si reh enda ula nai siterima pandita jenda adi anakna enterem”, nina Ka bendahara tole.

“E…. enggo jajat banndu e bendahara….”, nina Nande Kulu.
“Jajat entah la jajat, em ia. Kuakap kerna si ena sicakapken kari termbagesen, gelah ratur kuakap ku topik sideban saja kita lebe, ena sicakapken ka pagi. Keuangen e la gampang e….Engkai maka ise pe kita la nggit jadi Bendahara…, la gampang….”, nina Pa Mbetong.
Pas sanga Pa Mbetong ngerana bengket me ku ruang sidang Nande Belanja. Ia pe terlambat. Langa pe ia kundul mis ia ngerana, nina: “Sentabi nake, aku terlambat erkiteken rumah sakit ndari ndai. Lit anggota si sakit, janah arus operasi sendah. Adi la pedas operasi banci fatal akibatna. Kuakap perlu ia sisampati. Sebab masalah perbelitenna nge masalahna maka langa operasi”.

Minter ka tanggapi Pa Mbetong, “E…, dehkam.. terlambat kin kita rusur. Edenga kel cakapken kami ena. Dung cakapken e cakapkenndu ka, ma rulih-ulih kita lalap…”
“Kam pe ndai terlambat nge Pa Mbetong….” Nina Nande Kulu.
“Aku terlambat erkiteken diakoni, maaf yah. Enggo dage cakapken kena, kuakap langa the kena lit si sakit. adi bage enggo teng-teng sebab butuh kel ia”. “Eee. Dehkam… cakapken denga nge, keputusen langa lit, sebab la kita quorum. Lang pe sisakitndu ena, labo ndai cakapken kami. Ula lebe lit si sakit ningen nge, mis ka lit…” nina Bendahara.

“Adi bage bengket kita ku permata, man kam anak kami singuda banci pesehndu laporenndu..”, nina Sekretaris man pengurus permata.

Emaka sireh pe Raynold ngenca, emaka ilaporkenna me kerna Permata. “Permata aman-aman saja Pa.., kuakap kami la pedah cakapkenndu. Cakapkenndu pe kari labo lit kesimpulenna erbahan megara pinggel ka nge ngenca. Em laporen kami, bujur”, nina alu laporenna si sangat singkat. “Jadi payo nge bagi sini kataken anakta e. Aku sebage seksi mendukung”, nina Pa Golom sebagai komisi Permata.

“Bujur. Ma bage maka laporen anak singuda. La memberatken. Aturna bana. Adi bage ku Seksi Pembangunen kita…”, nina ka Sekretaris. Emaka reh Pa Bakut ngerana, “Sitik kel Ketua kerna pembangunen. Aku dehkam, ula min sia-sia sen sikubereken e ateku, sebab kuidah la terencana mehuli pembangunenta. Semen arah jenda, kah-kahi arah jah. Ma lalap nge la dung… Kami pe labo si bayak ndai kel nina jemaatta e. Uga nge ninta e…..”

Emaka itanggapi Pa Barti sebagai Ketua Pembangunen, “Bujur. Kerna kai ndai sini kataken Pa Bakut, lapedah lebe kujawab mis, kari sicakapken ras-ras kai permasalahenna. Jadi siperlu kuakap ku laporken eme biaya pengeluarenta seh paksa enda”. Langa pe she ku laporenna minter interupsi Pa Leto, eme komisi Pembangunen.”Interupsi Ketua…! Sitik kel man kam panitia, adi kupergermetken laporenndu man kami seksi, kuakap biaya sini banndu la realistis, lit ije indikasina mark-up”. “E…, kam ula min bage Diaken. Bas apai kin katandu e ? La lit sitik pe je aku cari untung ya… E dahin Dibata e. Adi bisnis ateku darat ah…. La gereja enda. Jengkalindu ka kita pe…” “Lang nindu, aku permaterial. Medan nari aku nai enggo er-panglong. Banci kin la kueteh.., la realistis… lit indikasina mark-up e….” nina ka Pa Leto.

“Jadi bagenda kuakap. Ula kari erkiteken la bas kam buat materialna maka kam sentimen ya..”
“Labo sentimen, tapi enggo ubanen bukku e, engo lima kempungku, janah enggo puluhen tahun aku bidang bahan bangunen, danandu e mark-up e. Lang gia nindu…” nina Pa Leto.
“Jadi … uga atendu…yak..?”
“Uga kin….?”
“La gereja enda job-ku, melala job-ku darat. Kam ngena lalit borongenndu…”
“La aku kurang page tutun Pa Barti… Sen jelma sienterem kap e… ula simian-mainken..”
“Uga dage ya… “, nina mis tedis janahna mutar tinju-tinjuna.
“Uga atem uga kin yah … “, nina ka Pa Leto janahna njemak botol Fanta.
Emaka minter tedis Pandita janahna ngerana alu sora megang, “Pa Barti.. Pa Leto, ula bage… ula bage.. sabar… sabar, tenang… tenang….” Pa Bakut pe erkiteken pernah lit persoalenna ras Pa Leto reh ka manas-manasi situasi e, nina “Lang kin pe perlu nge sekali-sekali…., gelah eteh apai kin daluna….” Tempa-tempa rubia-rubia ka banna kalak ndai.
“Adi bage mundur aku jadi seksi pembangunen…”, nina Pa Leto janah minter ia ndarat. “Pangen bage silih, to lah ndaratken…”, nina ka Pa Golom.

“Bagenda saja kuakap Ketua. Gelah ula ruk-rak kel rapatta enda, rende saja kita lebe, sipuji Dibatanta rende kita ibas kitab ende-endenta No. 205 ayat sipemena”, nina Nande Pirak nuduhken peranna sebagai seksi musik. Emaka rende me peserta rapat runggun e kerina. Dung kenca rende ndai, miter angkat tan Raynold, “Pimpinan Sidang, Jam-ta Pertua…, enggo jam sepuluh berngi”. “Uga kin maka anak perana denga pe mis atena tunduh..”, nina Nd. Belanja. “Labo masalah tunduh Mami, tempa laitehndu pe, Malam Minggu kap e…”, nina Raynold.

“Yakh.., adi bage erkiteken jamta pe enggo menda mbages, kuakap perlu ka nge sijaga kesehatenta. Tentuna enggo pe melala sicakapken ibas rapatta enda, sura-suranta kerina lako pehuliken, emaka erkiteken kita pe seh dung labo enda quorum, emaka perlu denga akap kami pagi sicakapken ibas sidang runggunta si reh. Gelah ibas kita mbuat keputusen banci lebih mehuli..”, nina Bp. Lepot.
“Kerna si sakit ndai uga dage sibahan e Pertua ?” nina Nd. Belanja. Sebab rubati pe kalak e ije, ingetna lalap anggotana si sakit ndai.Emaka nina Bp. Lepot, “Lit ndai situhuna enggo cakapken ope kam reh, gia la menjadi keputusen, perlu pe iakap kami isingetken mulihi gelah asa bancina ibas bulan-bulan enda ula lebe lit simate-mateta, janah adi banci jaga kesehtatenta, gelah ula kita sisakit-sakit, sebab kas ta defisit. Jadi sabar kam lebe nindu, sebab sidangta si reh ka nge maka tercakapken kita. Yakh, jadi bagem serahken kami mulihi man Ketua. Bujur.” Nina Bp. Lepot.

Emaka minter iambil alih Pa Nderkem sidang e, janah ngerana sebagai pendungi, nina: “Dage, senina ras turang. Endam dage rapat runggunta berngi si sendah. Kai siakap perlu denga sicakapken ibas sidangta si reh. Melala memang pertua diakenta si la reh, emaka seksina pe langa sicakapken. Melala si arus icakapken kita, tapi erkiteken kelangasupenta, erkiteken sura-suranta, bagepe kuasa iblis sierdahin si banci naluken hubungenta ras Dibata, emaka kerina banci jadi la mehuli. Emaka, nin kami sebagai BP runggun, enda jadi catataen ras pelajaren man banta, gelah rapat sireh banci reh ulina. Dage ibas gelar BP Runggun itutup kami me sidangta enda. Bujur. Dibata simasu-masu kita kerina. Sekali nari bujur. Guna nutup sidang ta enda, doa penutup iserahken kami man Bp. Ane. Bujur”.

Bagepe Bp. Ane erbahan pertoton biasana singkat, pedas, kata AMIN e ngenca begi. Kemungkinen ban Ketua Runggun pe minter atena mulih, emaka Bp. Ane suruhna. Bagem dage Bp. Ane pe la setengah menit pe banna pertoton mis Amin, nina. Kerina si reh bas rapat e sisalam-salamen, ras lanai ngerana-ngerana. Tempa ndauh ukurna. Sada-sada nadingken ingan rapat. Sitading eme risol ras bakwan ampar-ampar bas piring babo meja…. melungun. Ibas ruang rapat e [konsistori} lit sada ayat galang kel bas dingding, eme sini ibuat ibas Kitab Matius nari, nina : “Kai pe lakokendu, lakokenlah e alu tutus, tempa-tempa kam erdahin guna Tuhan….”

Karawaci, 26-27 Oktober 2005.
Naskah Drama - Jadi Cerpen, 17 Mei 2006.

No comments:

About Me

My photo
Bekasi, Jawa Barat, Indonesia
Etnomusikolog