Pemanfaatan Kesenian Karo
Julianus P Limbeng
Adi sinehen uga buena kesenian ‘tradisional’ Karo, situhuna adi siperugunakenlah alu mehuli, maka seni Karo e ndai meherga kel adi ikaitken kubas aspek ekonomi, sosial bagepe budaya e sendiri. Adi nen seni musikta, arah segi instrumen pe cukup mbue, lit surdam rumamis, surdam tangko kuda, surdam pingko-pingko, surdam puntung, surdam, balobat, murbab, keteng-keteng, kulcapi, sarune, gendang, penganak, gung, ketuk, kap-kap, olek-olek, ras sidebanna si cukup mbue denga. Bagepe ibas bidang seni dideban, mbue turi-turin Karo [mbue lanai ieteh], mbue ornamentasi Karo, mbue lagu-lagu Karo, mbue tari-tarian Karo, lit ndung-ndungen, lit didong-didong, lit io-io, lit erbagai macam upacara si adi, si banci kelompokken sebagai seni pertunjukan komunal, ras mbue denga jenis kesenian sideban. Kerina e banci ikataken sebagai aset ekonomis. Tapi memang si lebih penting uga kita memberdayakenca, gelah banci ia menjadi aset ekonomis tapi pe la bertentangen ras nilai-nilai entahpe tata aturen si ‘payo’ ibas kalak Karo.
Kesenian tradisional sebagai warisen nini-ninta tentuna labo min terkait ras nilai ekonomi saja. Situhuna ndau belinen ia asangken nilai ekonomi ndai, erkiteken ibas kesenian e lit si lebih penting, eme nilai budaya si banci jadi tatanen nilai ibas kita nggeluh ibas jaman si gundari enda. Uga kita nggeluh bagi surat ukat “er-endi-enta”, misalna labo ndauh-ndauhsa ras teori budaya si lit, katakenlah teori ibas buku “The Gift”-nya Marcel Mauss, entahpe “Kula Ring”-na Bronislaw Malinowsky i Trobriand. Bagepe nilai-nilai sideban ibas kesenian e si banci si pakeken ibas nggeluh konteksna si gundari. Artina lit nilai-nilai si mehuli si banci sipakeken ibas kegeluhenta, mungkin saja carana berubah erkiteken jamanta pe berubah. Tapi nilai budaya si lit ibas seni ndai banci si pake, contohna: mehamat, siergan, erpenandai bana, peran, mehangke, mela, ratur, runggu, ras sidebanna. Nilai-nilai si e kerina lit ibas kesenian. Artina kesenian Karo enda la hanya sebagai hiburen pribadi, masyarakat entahpe terkait ku fungsi-fungsi bagi sini ikataken etnomusikolog, Alan P Meriam.
Gelah nilai-nilai budaya simehuli ndai banci terakomodasi ibas kegeluhen kalak Karo si gundari maka ia harus imanfaatken ibas bidang-bidang si banci pake. Pemanfaatan sini imaksudken ijenda eme upaya nggunaken perwujudan budaya untuk kepentingan lain, misalna pendidikan, agama, ekonomi (pariwisata), ilmu pengetahuan ras sidebanna. Baik ibas pendidikan seni. Ermain musik eme salah sada erlajar uga kita ngergai ras kerjasama ras kalak sideban. Sebab adi sibaba jangna saja, tentuna musik e la ratur, janah le entabeh man beginken. Emaka arus siergan, janah meteh porsina masing-masing. Artina erpenandai man bana, peran kai ia ibas ensambel musik e. Enda merupaken sada contoh saja.
Selain pemanfaaten si sifatna abstrak [nilai], pemanfaaten kesenian epe banci sikaitken ras masalah ekonomi. Ring Back Tone bagepe nada panggil enggo mbue gundari musik Karo. Enda enggo masuk kubas hak cipta. Tapi mbue kesenian tradisional Karo si hak ciptana la sekalak, tapi komunitas Karo keseluruhen. Ibas sada buku terbaru isingetken maka lagu Piso Surit eme lagu dari Aceh, la lagu Karo. Buku e iedarken mbar kujapa pe. Bicara lagu Karo pe nina, salah denga, erkiteken lagu e lagu Djaga Depari. Tahun 80-an nari lagu e bage lalap penulisken ibas piga-piga buku kesenian. Emaka pemanfaatenna situhuna arus lit usaha guna ngelindungisa. Bagi lagu-lagu misalna, perlu intranskripsikan, emaka daftarken. Erbahan not lagu pe gundari enggo lit programna, katakenlah Sybelius, Enscore, Finale, ras sidebanna. Artina banci sibegiken sorana pas tah lang guna nulisken sora musik. Bagepa perkembangen teknologi alat-alat rekam misalna pe mbantu kita mendokumentasiken kesenianta guna banci imanfaatken. Masyarakatta mbue denga la sadar sebagai pemilik kesenian, sehingga la bana masalah aminna gia kalak sideban memanfaatken kesenianta e tanpa persetujunta. Emaka perlu situhuna kesadaran memiliki kesenianta.
Kai dagena arus silakoken, gelah pemanfaaten kesenian e lit dampakna man masyarakatta. Pemena eme, harus lit pemahamamen man masyarakatta (seniman tradisional) maka kesenian Karo e mbelin kel gunana, janah kesenian e kita (kalak Karo) empuna. Adi enggo sieteh kita empuna, enggo lit kebebasenta guna memilih pemanfaaten kesenianta ndai; Sipeduaken, banci simanfaatken kesenianta ndai secara optimal alu menghargai bagepe menghormati hak-hak sosial budaya Kalak Karo, sebab empuna kalak Karo sienterem. Sebab megati kesenianta lebih banci inikmati kalak sideban asangken kita, emaka man kalak luar negeri lako, man kalak Karo lang. Emaka banci saja kesenian tradisional banci imanfaatken dunia industri. Arusna min dunia industri simake kesenianta pe lit tanggung jawab sosialna man empu kesenian e. Istilah sigundari Corporate Social Responsibility nina. Adi lit pertawar ngembangken pengobatan tradisional Karo, ma lit min ulih pemanfaatenna e man kalak Karo; Peteluken, perlu enggo lakoken pendokumentasian jenis-jenis kesenian Karo secara mendetail ras mendalam [inventarisasi]. Usaha sibage rupana eme usaha guna ngelindungi kesenianta arah pemanfaatan kalak sideban. Simejilena ka min sidaftarken ku pihak berwenang, gelah alu bage banci sipilah-pilah jenis-jenis kinibayakenta ibas dunia seni Karo.
Tentuna kerina usaha-usaha sini lakoken bagi si isingetken i datas, membutuhken dukungen pemerintahta, mungkin la hanya Pemda Karo tapi pe terdatasen. Adi lit rasa menghargai, memiliki ras masalah nilai-nilai kesenianta si mbelin, emaka kesenian Karo e sendiri erdolat la hanya man kalak Karo, tapi pe man jelma sienterem, baik dalam negeri bagepe ku luar negeri.
Karawaci, 17 Juni 2008.
Adi sinehen uga buena kesenian ‘tradisional’ Karo, situhuna adi siperugunakenlah alu mehuli, maka seni Karo e ndai meherga kel adi ikaitken kubas aspek ekonomi, sosial bagepe budaya e sendiri. Adi nen seni musikta, arah segi instrumen pe cukup mbue, lit surdam rumamis, surdam tangko kuda, surdam pingko-pingko, surdam puntung, surdam, balobat, murbab, keteng-keteng, kulcapi, sarune, gendang, penganak, gung, ketuk, kap-kap, olek-olek, ras sidebanna si cukup mbue denga. Bagepe ibas bidang seni dideban, mbue turi-turin Karo [mbue lanai ieteh], mbue ornamentasi Karo, mbue lagu-lagu Karo, mbue tari-tarian Karo, lit ndung-ndungen, lit didong-didong, lit io-io, lit erbagai macam upacara si adi, si banci kelompokken sebagai seni pertunjukan komunal, ras mbue denga jenis kesenian sideban. Kerina e banci ikataken sebagai aset ekonomis. Tapi memang si lebih penting uga kita memberdayakenca, gelah banci ia menjadi aset ekonomis tapi pe la bertentangen ras nilai-nilai entahpe tata aturen si ‘payo’ ibas kalak Karo.
Kesenian tradisional sebagai warisen nini-ninta tentuna labo min terkait ras nilai ekonomi saja. Situhuna ndau belinen ia asangken nilai ekonomi ndai, erkiteken ibas kesenian e lit si lebih penting, eme nilai budaya si banci jadi tatanen nilai ibas kita nggeluh ibas jaman si gundari enda. Uga kita nggeluh bagi surat ukat “er-endi-enta”, misalna labo ndauh-ndauhsa ras teori budaya si lit, katakenlah teori ibas buku “The Gift”-nya Marcel Mauss, entahpe “Kula Ring”-na Bronislaw Malinowsky i Trobriand. Bagepe nilai-nilai sideban ibas kesenian e si banci si pakeken ibas nggeluh konteksna si gundari. Artina lit nilai-nilai si mehuli si banci sipakeken ibas kegeluhenta, mungkin saja carana berubah erkiteken jamanta pe berubah. Tapi nilai budaya si lit ibas seni ndai banci si pake, contohna: mehamat, siergan, erpenandai bana, peran, mehangke, mela, ratur, runggu, ras sidebanna. Nilai-nilai si e kerina lit ibas kesenian. Artina kesenian Karo enda la hanya sebagai hiburen pribadi, masyarakat entahpe terkait ku fungsi-fungsi bagi sini ikataken etnomusikolog, Alan P Meriam.
Gelah nilai-nilai budaya simehuli ndai banci terakomodasi ibas kegeluhen kalak Karo si gundari maka ia harus imanfaatken ibas bidang-bidang si banci pake. Pemanfaatan sini imaksudken ijenda eme upaya nggunaken perwujudan budaya untuk kepentingan lain, misalna pendidikan, agama, ekonomi (pariwisata), ilmu pengetahuan ras sidebanna. Baik ibas pendidikan seni. Ermain musik eme salah sada erlajar uga kita ngergai ras kerjasama ras kalak sideban. Sebab adi sibaba jangna saja, tentuna musik e la ratur, janah le entabeh man beginken. Emaka arus siergan, janah meteh porsina masing-masing. Artina erpenandai man bana, peran kai ia ibas ensambel musik e. Enda merupaken sada contoh saja.
Selain pemanfaaten si sifatna abstrak [nilai], pemanfaaten kesenian epe banci sikaitken ras masalah ekonomi. Ring Back Tone bagepe nada panggil enggo mbue gundari musik Karo. Enda enggo masuk kubas hak cipta. Tapi mbue kesenian tradisional Karo si hak ciptana la sekalak, tapi komunitas Karo keseluruhen. Ibas sada buku terbaru isingetken maka lagu Piso Surit eme lagu dari Aceh, la lagu Karo. Buku e iedarken mbar kujapa pe. Bicara lagu Karo pe nina, salah denga, erkiteken lagu e lagu Djaga Depari. Tahun 80-an nari lagu e bage lalap penulisken ibas piga-piga buku kesenian. Emaka pemanfaatenna situhuna arus lit usaha guna ngelindungisa. Bagi lagu-lagu misalna, perlu intranskripsikan, emaka daftarken. Erbahan not lagu pe gundari enggo lit programna, katakenlah Sybelius, Enscore, Finale, ras sidebanna. Artina banci sibegiken sorana pas tah lang guna nulisken sora musik. Bagepa perkembangen teknologi alat-alat rekam misalna pe mbantu kita mendokumentasiken kesenianta guna banci imanfaatken. Masyarakatta mbue denga la sadar sebagai pemilik kesenian, sehingga la bana masalah aminna gia kalak sideban memanfaatken kesenianta e tanpa persetujunta. Emaka perlu situhuna kesadaran memiliki kesenianta.
Kai dagena arus silakoken, gelah pemanfaaten kesenian e lit dampakna man masyarakatta. Pemena eme, harus lit pemahamamen man masyarakatta (seniman tradisional) maka kesenian Karo e mbelin kel gunana, janah kesenian e kita (kalak Karo) empuna. Adi enggo sieteh kita empuna, enggo lit kebebasenta guna memilih pemanfaaten kesenianta ndai; Sipeduaken, banci simanfaatken kesenianta ndai secara optimal alu menghargai bagepe menghormati hak-hak sosial budaya Kalak Karo, sebab empuna kalak Karo sienterem. Sebab megati kesenianta lebih banci inikmati kalak sideban asangken kita, emaka man kalak luar negeri lako, man kalak Karo lang. Emaka banci saja kesenian tradisional banci imanfaatken dunia industri. Arusna min dunia industri simake kesenianta pe lit tanggung jawab sosialna man empu kesenian e. Istilah sigundari Corporate Social Responsibility nina. Adi lit pertawar ngembangken pengobatan tradisional Karo, ma lit min ulih pemanfaatenna e man kalak Karo; Peteluken, perlu enggo lakoken pendokumentasian jenis-jenis kesenian Karo secara mendetail ras mendalam [inventarisasi]. Usaha sibage rupana eme usaha guna ngelindungi kesenianta arah pemanfaatan kalak sideban. Simejilena ka min sidaftarken ku pihak berwenang, gelah alu bage banci sipilah-pilah jenis-jenis kinibayakenta ibas dunia seni Karo.
Tentuna kerina usaha-usaha sini lakoken bagi si isingetken i datas, membutuhken dukungen pemerintahta, mungkin la hanya Pemda Karo tapi pe terdatasen. Adi lit rasa menghargai, memiliki ras masalah nilai-nilai kesenianta si mbelin, emaka kesenian Karo e sendiri erdolat la hanya man kalak Karo, tapi pe man jelma sienterem, baik dalam negeri bagepe ku luar negeri.
Karawaci, 17 Juni 2008.
Comments