RUDANG
Cerpen:
RUDANG
Julianus P Limbeng
Megati kel kalak salah sangka kerna gelarku. Adi langa itandai kalak aku, ugape akapna aku sekalak diberu. Apai ka adi gundari beru pe enggo jarang ipake bas gelar diberu Karo. Jadi wajar saja adi akap kalak aku diberu. Sebab mecERmanCg lit ka seri gelarna ras aku, tapi ia sekalak diberu. Janah piga-piga sipernah kujumpa ergelarken rudang, biasana diberu, janah rata-rata mejile kerina.
La kuangka engkai maka gelar Rudang buen gelar diberu, mungkin gelar e gelar diberu kin pe. Entah maun aku ngenca dilaki ergelarken Rudang. Rudang identik feminim, la maskulin. Bagepe sierbahan turi-turin, megati kel ibahanna gelar Rudang jadi gelar diberu mejile. La ietehna maka lit gelar Rudang sekalak dilaki si sitik pe la bagi diberu, baik sifat, watak, bagepe potongenku sitik pe la mediberu. Adi ras la kalak Karo, mungkin saja gelarku cukup ‘keren’ man kalak, erkiteken jarang jumpana gelar sibage, janah la angkana kai ertina. Adi ndilo aku “Rud’ nina saja. Jelas dilaki. Mungkin akap kalak Rudi. Tapi adi begi saja ngenca, la idah jelmana banci saja kata ‘Rud’ jadi ‘Rut’. Seri pembelasken. Ma gelar e biasana banci denga ka gelar diberu ka, ateku bas pusuhku. Tapi marenda ngenca tupung aku danak-danak denga megati mela aku ergelarken Rudang, tapi gundari erkiteken enggo semal, enggo mekapal cupingku. Biasa saja. Rudang..
Adi marenda, pernah nembeh ateku orang tuaku erkiteken ibahanna gelarku Rudang. Ula min ndai aku kalak Karo, ma la gelar diberu gelarku e ateku. Aku pe enggo tek, maka gelarku e situhuna gelar diberu, erkiteken la aku pernah jumpa dilaki ergelarken seri ras gelarku e. Kerina si pernah aku jumpa, ugape ‘diberu’, tapi langa pasti ‘diberu’. Anak-anak denga pe marenda aku, rusur aku isaling-saling kandu-kanduku. Maun-maun kacipken teman-temanku padung ku cupingku. “Adi diberu erpadung anak…”, nina. Bagepe tupung sekolah, megati kel “arusna adi diberu erlayam..” nina teman-temanku. Maun-maun panas ka cupingku, janah megati ka pe banci ersepah bagi lembu.
Piga-piga bulan si lewat pe pernah ka reh SMS man bangku ibas sekalak dilaki nari. La kueteh ija nari datsa nomor HP-ku. Ndekah kami sibalas-balasen er-SMS. Aku pe tetap ku balas SMSna alu mposisiken diri sebage sekalak diberu, entah uga kin tanggapenna ateku. Seh makana erjanji kami jumpa ibas sada ingan. Erkiteken ikatakenna bajuna mentar, saluarna jeans, bukna gondrong nina, emaka ku pepang me nungkun gelarna bagi sini ikatakenna arah SMS ndube. “Kam ise kin..?”, nina kenca kusungkun gelarna. “Aku Rudang…”, ningku. Rempet kuidah megara ayona, sengget kel ia. “Rudang kuga…?”, nina ka tole tempa la ia tek adi aku si SMSna rusur. “Payo pal… aku Rudang…”, ningku janahku cirem. “Ooo…..”, nina alu erkesah ndekah. “Sentabi kel ya pal… kuakap kap diberu Gelarndu e…”, nina janahna cirem, mungkin mela pe akapna, erkiteken arah SMS e enggo mbue kel rayuan pulau kelapa ipesehna.
Adi kutatap ayona ndauh kel tunggungen ia jadi diberu asangken aku. Ayona halus rikut pe buka nggedang seh ku barana. Adi aku bukku pe gendek, ergumis, dagingku pe mbestang. Tapi aku akapna diberu erkiteken gelarku Rudang.
Bicara la kin minda ndai aku ergumis, janah nggedang ka min ndai bukku, mejile ka rupaku, amin gia erseluar gedang gia aku, entah cocok ka nge min ndai gelarku Rudang, ateku. Tapi labo ah.., aku dilaki. Rudang Ginting dilaki tolen. Titik.
Kenca perjumpan ndai, rukur aku ndekah kenca kubaca buku adat Karo eme kerna merga si lima ras orat tutur. Isingetkenna ije, maka adi man dilaki ikataken merga, janah adi man diberu ikataken beru. Penulisenna nina adi man dilaki merga e cukup itambahken kenca gelar sini ibereken, janah otomatis enggo iangka maka e sebagai merga, janah ia pasti ‘dilaki’. Bagepe adi man diberu ikataken beru, janah itulisken entahpe isingetken beru kenca gelar sinibereken man sekal diberu. Ndekah kupepayo erti penjelasen si tertulis ibas buku ndai. Adi bage situhuna, labo kap lit salah ibas gelarku e, ateku ka. Adi lit min ndai kata beru bas gelarku, ma e nge maka gelarku e diberu ateku ka. Jelaskel gelarku Rudang Ginting, engkai maka megati kel akap kalak aku diberu. Memang kuidah ka pe piga-piga siergelarken Rudang si jenis kelaminna diberu seri ka penuratkenna bagi gelarku e. Rudang Sembiring, Rudang Tarigan, Rudang Peranginangin, Rudang Karokaro… Janah lit ka pe memang Rudang Ginting diberu. Jadi apai nge ndia si salah, aku entah sideban ateku ka. Adi kupepayo buku adapt Karo e, berarti aku labo salah. Berarti adi sad ape la make kata beru kenca gelarna, berarti dilaki. Titik. Bage adi kalak karo, ateku ngalemi pusuhku. Aku si payo. Penuratken gelar Karo. Penggelari kalak Karo. Dilaki. La Er-beru…
Oh.., situhuna beluh kel nini-nini bulang kami nai. Bahanna kata beru man diberu nandaken beru kai ia, sekaligus nandaken ia sekalak diberu. Kai gia gelarna adi enggo lit beruna, enggo pasti ia diberu. Berarti amin gia gelarku Rudang, tapi lalit kata beru kenca gelarku, berarti aku dilaki. Gelarku payo. Dilaki Karo. Make merga alu payo. Rudang, dilaki Karo, la diberu. Mejile kel ibahan nini-nininta marenda, tapi engkai maka enggo lanai ipake kata beru e man diberu. Entahkin merhat diberu Karo e jadi dilaki? Arusna min bangga kita budayanta khususna ibas gelar lit lainna kita ras kalak sideban. Adi diberu, er-berulah. Labo gelah payo akap kalak gelarku Rudang, tapi e kap budayanta. Kutulis bas pusuhku mbages-mbages gelarku gelar dilaki. La diberu.
Bekasi, Januari 2008.
RUDANG
Julianus P Limbeng
Megati kel kalak salah sangka kerna gelarku. Adi langa itandai kalak aku, ugape akapna aku sekalak diberu. Apai ka adi gundari beru pe enggo jarang ipake bas gelar diberu Karo. Jadi wajar saja adi akap kalak aku diberu. Sebab mecERmanCg lit ka seri gelarna ras aku, tapi ia sekalak diberu. Janah piga-piga sipernah kujumpa ergelarken rudang, biasana diberu, janah rata-rata mejile kerina.
La kuangka engkai maka gelar Rudang buen gelar diberu, mungkin gelar e gelar diberu kin pe. Entah maun aku ngenca dilaki ergelarken Rudang. Rudang identik feminim, la maskulin. Bagepe sierbahan turi-turin, megati kel ibahanna gelar Rudang jadi gelar diberu mejile. La ietehna maka lit gelar Rudang sekalak dilaki si sitik pe la bagi diberu, baik sifat, watak, bagepe potongenku sitik pe la mediberu. Adi ras la kalak Karo, mungkin saja gelarku cukup ‘keren’ man kalak, erkiteken jarang jumpana gelar sibage, janah la angkana kai ertina. Adi ndilo aku “Rud’ nina saja. Jelas dilaki. Mungkin akap kalak Rudi. Tapi adi begi saja ngenca, la idah jelmana banci saja kata ‘Rud’ jadi ‘Rut’. Seri pembelasken. Ma gelar e biasana banci denga ka gelar diberu ka, ateku bas pusuhku. Tapi marenda ngenca tupung aku danak-danak denga megati mela aku ergelarken Rudang, tapi gundari erkiteken enggo semal, enggo mekapal cupingku. Biasa saja. Rudang..
Adi marenda, pernah nembeh ateku orang tuaku erkiteken ibahanna gelarku Rudang. Ula min ndai aku kalak Karo, ma la gelar diberu gelarku e ateku. Aku pe enggo tek, maka gelarku e situhuna gelar diberu, erkiteken la aku pernah jumpa dilaki ergelarken seri ras gelarku e. Kerina si pernah aku jumpa, ugape ‘diberu’, tapi langa pasti ‘diberu’. Anak-anak denga pe marenda aku, rusur aku isaling-saling kandu-kanduku. Maun-maun kacipken teman-temanku padung ku cupingku. “Adi diberu erpadung anak…”, nina. Bagepe tupung sekolah, megati kel “arusna adi diberu erlayam..” nina teman-temanku. Maun-maun panas ka cupingku, janah megati ka pe banci ersepah bagi lembu.
Piga-piga bulan si lewat pe pernah ka reh SMS man bangku ibas sekalak dilaki nari. La kueteh ija nari datsa nomor HP-ku. Ndekah kami sibalas-balasen er-SMS. Aku pe tetap ku balas SMSna alu mposisiken diri sebage sekalak diberu, entah uga kin tanggapenna ateku. Seh makana erjanji kami jumpa ibas sada ingan. Erkiteken ikatakenna bajuna mentar, saluarna jeans, bukna gondrong nina, emaka ku pepang me nungkun gelarna bagi sini ikatakenna arah SMS ndube. “Kam ise kin..?”, nina kenca kusungkun gelarna. “Aku Rudang…”, ningku. Rempet kuidah megara ayona, sengget kel ia. “Rudang kuga…?”, nina ka tole tempa la ia tek adi aku si SMSna rusur. “Payo pal… aku Rudang…”, ningku janahku cirem. “Ooo…..”, nina alu erkesah ndekah. “Sentabi kel ya pal… kuakap kap diberu Gelarndu e…”, nina janahna cirem, mungkin mela pe akapna, erkiteken arah SMS e enggo mbue kel rayuan pulau kelapa ipesehna.
Adi kutatap ayona ndauh kel tunggungen ia jadi diberu asangken aku. Ayona halus rikut pe buka nggedang seh ku barana. Adi aku bukku pe gendek, ergumis, dagingku pe mbestang. Tapi aku akapna diberu erkiteken gelarku Rudang.
Bicara la kin minda ndai aku ergumis, janah nggedang ka min ndai bukku, mejile ka rupaku, amin gia erseluar gedang gia aku, entah cocok ka nge min ndai gelarku Rudang, ateku. Tapi labo ah.., aku dilaki. Rudang Ginting dilaki tolen. Titik.
Kenca perjumpan ndai, rukur aku ndekah kenca kubaca buku adat Karo eme kerna merga si lima ras orat tutur. Isingetkenna ije, maka adi man dilaki ikataken merga, janah adi man diberu ikataken beru. Penulisenna nina adi man dilaki merga e cukup itambahken kenca gelar sini ibereken, janah otomatis enggo iangka maka e sebagai merga, janah ia pasti ‘dilaki’. Bagepe adi man diberu ikataken beru, janah itulisken entahpe isingetken beru kenca gelar sinibereken man sekal diberu. Ndekah kupepayo erti penjelasen si tertulis ibas buku ndai. Adi bage situhuna, labo kap lit salah ibas gelarku e, ateku ka. Adi lit min ndai kata beru bas gelarku, ma e nge maka gelarku e diberu ateku ka. Jelaskel gelarku Rudang Ginting, engkai maka megati kel akap kalak aku diberu. Memang kuidah ka pe piga-piga siergelarken Rudang si jenis kelaminna diberu seri ka penuratkenna bagi gelarku e. Rudang Sembiring, Rudang Tarigan, Rudang Peranginangin, Rudang Karokaro… Janah lit ka pe memang Rudang Ginting diberu. Jadi apai nge ndia si salah, aku entah sideban ateku ka. Adi kupepayo buku adapt Karo e, berarti aku labo salah. Berarti adi sad ape la make kata beru kenca gelarna, berarti dilaki. Titik. Bage adi kalak karo, ateku ngalemi pusuhku. Aku si payo. Penuratken gelar Karo. Penggelari kalak Karo. Dilaki. La Er-beru…
Oh.., situhuna beluh kel nini-nini bulang kami nai. Bahanna kata beru man diberu nandaken beru kai ia, sekaligus nandaken ia sekalak diberu. Kai gia gelarna adi enggo lit beruna, enggo pasti ia diberu. Berarti amin gia gelarku Rudang, tapi lalit kata beru kenca gelarku, berarti aku dilaki. Gelarku payo. Dilaki Karo. Make merga alu payo. Rudang, dilaki Karo, la diberu. Mejile kel ibahan nini-nininta marenda, tapi engkai maka enggo lanai ipake kata beru e man diberu. Entahkin merhat diberu Karo e jadi dilaki? Arusna min bangga kita budayanta khususna ibas gelar lit lainna kita ras kalak sideban. Adi diberu, er-berulah. Labo gelah payo akap kalak gelarku Rudang, tapi e kap budayanta. Kutulis bas pusuhku mbages-mbages gelarku gelar dilaki. La diberu.
Bekasi, Januari 2008.
Comments