Cerpen : UIS NIPES

Cerpen :

UIS NIPES

Julianus P. Limbeng

“Uga Bulang, sidarami Beru Tigan ndai ?” nina sekalak anak perana man  Bulang Naken bas kedai kopi Pa Kasro. “Hahaha… banci anak, ku ja kin sidarami? Lit dengan kin seri ras Nini Tiganmu marenda…” nina Bulang Naken janahna kundul arah suki-suki. “Iak… adi seri kel katandu, Tigan marenda ngenca bali ras ia Bulang… pala uga pegeluh mulihi… hahahaha….” Nina ka anak perana ndai nokohi Bulang Naken. “Ndigan kam empo ndai Bulang”… eme biasa cakap begi bas kedei kopi jadi bual sipaya man Bulang Naken.

Enggo megati bual sibagenda ibegi ibas Kede Kopi Pa Kasro. Iagat-agati anak perana bagepe piga-piga perbapan rusur Nini Bulang Naken enda, erkiteken nguda denga ia marenda enggo leben itadingken ndeharana, Tigan Naken.  Tuduhken kalak e ka megati man bana gambar singuda-nguda bas HP na, tapi tawai Bulang Naken saja. “Sehat gelah kam e Bulang”, nina ka deba anak perana e. “Sehat nak, adi la sehat ma labo banci ku kede enda…” nina Bulang naken njababsa janah tawa.

Enggo 13 tahun dekahna ia pension. Tiap wari Bulang Naken ku Kede Pa Kasro. Timaina Bulang Enina kandu-kanduna sekedar main satur i kede. Labo lit kai pen bahanna taruh-taruhna, tapi peperangen e tempa luar biasa kel adi icah cakapna duana janahna ndalanken buah satur ndai. “Eh…. Ku ja nari kita kiam lagan…. Eee… eee….” Nina kadang la gejapna endekkenna ka tanna e janah rende odak-odak, adi kune kenca kemenangen e enggo ndeher ras ia. “Sah kuda la tertudung nake… eak uga dage bahanndu yah…. Hahahaha….” Nina tawa meriah duana tiap wari bas kede.

“Ersatur enda me erbahanca aku sehat janah la lampas metua.. sebab rukur lalap otak e..” nina Bulang Naken sanga sungkun kalak ia uga maka satur pilihna kegiatenna tep-tep wari. Dage, gajina pensiunna enggo me lit man alonkenna tiap bulan amin gia kitik-kitik nari. Tapi anak-anakna enggo me sikap kerina kegeluhenna, bagepe asuransi kesehatenna tejeng ertambar ku klinik ras puskesmas pe enggo me lit. Tapi jarang nge pakena erkiteken sehat nge lalap daging kulana. Perpulungen merga si lima pe dahina nge. Perpulungen jabu-jabu ras Mamre pe aktif nge ia, bagepe perpulungen lansia (Ssaitun) pe hadir ia. Mbue ia ngerana nuriken penggejapen. Ikait-kaitenna pengalamenna ras kata Dibata siman bahasen. Terutama pengalamen-pengalamenna sanga ia aktif denga marenda erdahin bas pemerintahen enda. Mbereken motivasi man anak singuda denga.

Bas kerja-kerja adat pe labo ia ketadingen. Asal seh bana tenah uga pe usahakenna ndahisa. Saja ngenca lit la bagi biasa bas Bulang Naken. Setiap ndahi kerja-kerja uga pe babana uis nipes, janah lilitkenna ibas kerahungna. Bagepe megati ka langgekenna bas barana. La pernah ia lupa,  janah uis nipesna pe la ganti. Tetap pakena.  Hal sibagenda rupana ilakokenna kenca Nina Naken lanai rumah, enggo ngadap man Dibata lebih telu puluh tahun silewat. Pernah sungkun kalak uga maka dilaki er-uis nipes. “Salah osendu e, ena uis pernanden” nina sekalak pernanden ningetkenca, erkiteken akapna salah. Jababna singkat, em tandana Nande Tigan marenda ikut denga ras aku ndahi kerja-kerja e, nina. “La gia baba ma enggo me teh kalak kam enggo mbalu…?” nina ka sekalak perbapan si telu kali erjabu. “La teh kena denga uga ceritana. Nggedang ceritana, adi kuturiken pe peratahi bulung-bulung si enggo meratah e ka kari nak. Megogo ka kari ateku mulihi”, nina Bulang Naken ngenca njababsa.

Ibas sada wari, tupung la denga enteremsa jelma bas kede kopi, janah kandu-kanduna main satur, Bulang Enina, pe langa reh. Isungkun kalak ka me uga kin ceritana kerna uis nipes silanggkenna megati bas kerja-kerja e. “Iak… erkiteken umurku pe enda enggo me meganjang, janah tah uga gia pagi perberkat ndahi Nande Tigan marenda, emaka adi merhat kel kena kerna uga ceritana, banci nge kuturiken”, nina Bulang Naken. Erkiteken enggo me megati sungkun kalak. Gawerna tehna, janah celupkenna ka roti kosong e ku gelasna, janah tatapna ndauh, emaka benakenna me nuriken kerna sejarahna engkai maka setiap ku kerja-kerja ras ku kalak mate langgekenna lalap uis nipes Tigan.

“Marenda kenca kami enggo erjabu, janah enggo lit dua pupus kami, kegeluhen pe seh kel serana, emaka ndahi kerja-kerja e pe erpala-pala,” nina mulai ceritana. “Kuinget kel pedah kalak sanga kerja adat kami marenda, ise pe pagi adi lit ertanah sibagenda rupana, bagepe simate-mate, adi etehndu ula kel kam la reh. Idahndu uga teremna kade-kadeta reh bas kerja-kerjandu enda…, nina sekalak ibas biak sukut senina ngerana man kami..” nina Bulang Naken. “Ndekah kel kuinget katana ah ndai, janah erkiteken aku pe erjabu kota enda, jelma sienterem nge kade-kade kerina. Metunggung kel kerja kami marenda, amin gia aku anak pertandang, janah keluarga ndeher kel ningen labo lit, erkiteken geluh mesera nge maka seh kujenda, emaka meriah kel ukurku, janah erpadan aku marenda, maka asa gegehku, uga pe kupala-palai pagi reh ku kerja kalak e kerina ateku”, nina Bulang Naken nginget hampir lima puluh tahun si lewat.

Ituriken Bulang Naken pe maka ibas sada wari lit tenah kerja seh man bana. Ekonomi pe langa memungkinken ibas masa-masa berjuang. Anak enggo dua. Kitik denga, janah pendahin pe langa bo sikapsa kel. Emaka berkat me ia empatna ku kerja-kerja e.  Nangkihina me Vespa Kongo, tapi stikerna PS-100. Vespa enda nina kalak marenda hadiah man pasuken perdamaian man tentera si ikut bertugas sebagai pasukan perdamaian ke Kongo, Afrika. Eme Kontingen Garuda sipe-2 ken tahun 1960, siipimpin Letkol Inf. Solichin GP. I Medan pe marenda melala jenis Vespa enda, erkiteken Kodam Bukit Barisan  pe pernah ikut, eme Kontingen Garuda III, tahun 1962. Keputusen nukur Vespa eme, erkiteken galang, janah lit ingan anak-anak tedis, ergana terjangkau denga. Ersikap me nande ras anak-anak kerina, emaka la lupa ikadangken ndeharana uis nipes pemere bibina kenca dung kerja adat perjabunna. Uis nipe e pe bekas nge, enggo ka me bekas pake bibina. Tapi e ngenca lit kadang-kadangna.  “Enda uis nipes, sebab labo denga lit kuidah uis kena, pake adi ku kerja-kerja kena pagi…jarang nge kupake e” nina bibina.

Itengah perdalanen ope seh ku ingan kerja-kerja e, mogok me Vespa ndai. Biasana lit ngian-ngian bas box na bahanna busi. Emaka pinggirken me Vespa ndai, janah  iganti me busina, iengkol-engkolna asa gegehna, tapi lalap la nggeluh-nggeluh. Gus-gusina ka tole busina, emaka engkolna ka mulihken.Enggo cur-curkel panasna, seh maka litap pe bajuna. Engkolna sekali nari, rempet banci nggeluh. La sengaja, uis nipes si baba pernandenna ndai enggo terlilit mesin Vespa si buka denga kap na ndai. Emaka enggo me merigat uis nipes sini baba ndai.

Bagem kenca enggo nggeluh Vespa e, alu uis nipes si merigat, terusken kalak enda me berkat ndahi kerja-kerja ndai. Ilipat pernanden ndai me alu mehuli maka ula teridah rigatna si mbelang. Amin mungkin la gia lit kalak perdiatekenca uis nipesna merigat, tapi bas pusuh Bulang Naken ibas paksa si e bet-beten lalap. Janah erpadan ia, adi lit kari senna maka itukurna uis nipes terulin, terjilen man ndeharana. Merasa bersalah ia erkiteken uis e pemere kalimbubu, janah Vespana sierbahanca merigat. Emaka ibas sada paksa, kenca enggo lit rejekina, emaka tukurna me sada uis nipes si she kel jilena. Iberekenna me pas momen Ulang Tahun ndeharana pe-30 ken.  “Selamat ulang tahun Nande Tigan, sehat-sehat kam, janah nggedang umurndu gelah ras kita pagi ngepkep anak-anakta e, janah enda uis nipes ndu marenda, seh kel jilena, maka bage kel pagi tetap jilena ukurndu man bangku, man anak-anakta, bagepe man kerina kade-kadenta…” nina Bulang Naken masa e agak romatis sitik. Kenangen enda tuhu-tuhu erbekas kel bas kalak e duana. Janah e denga akapna kado ulang tahunna sipaling bermakna. Uis siiberekenna pe tuhu-tuhu ngena kel ate ndeharana, janah eme rusur ipakena ku kerja-kerja.

Kegeluhen manusia enggo iaturken Dibata kerina. Masa-masa mesera ndube ersada kel arihna duana. Lit telu kali Bulang Naken ku rumah sakit operasi, janah man arak-araken, tapi ndeharana seh kel setiana. La pernah kitik ukur perbulangenna ibahanna. Megati nge la tertukur gulen, erkiteken masa berjuang bas perantauan, ndauh ibas orang tua nari. Tapi bage gia, ras-ras ia man. Melawen pe mulih perbulangenna, timaina mulih maka ras ia man. Nini Naken pe ibas masa si e, mbaru denga erdahin sebagai perawat i rumah sakit. Sempabu kel kerina, maka nambah wari kegeluhenna pe reh jorena.

Nina kuan-kuan melayu, rejeki la tertulak, padan la tersimbak. Kegeluhen jabu enda enggo reh jorena janah enggo sikap. Tapi lit ka kepe mungkin la bagi ukur, maka idatme pinakit lit ibas daging kula ndehara. Kerina usaha enggo ilakoken gelah malem, tapi kuasa Dibata la terolangi. Singkat cerita, idilo Dibata me sindehara. Megogo tuhu ate perbulangen. Ula nai tangis pe nina Pertua ras Diaken, bagepe Pendeta, tapi lagejapna lalap nirciren iluhna. Ibayangkenna uga setiana ndeharana. Berjuang ras-ras ibas ngalaken kerina perbeben kegeluhen ras ngarak-ngarak anak-anak. Ibas enggo mulai lit peningkaten kegeluhenna, anak-anak pe masa persekolahen denga, ije ka me ia berkat nadingken perbulangen ras anak-anakna. “Kune pagi aku lanai lit, kelengi pagi anak-anakta e duana. Seh pagi kerina sekolahna. Bicara erjabu pe pagi atendu, labo kuolangi, tapi daramilah si banci keleng atena anakta e duana… sebab ugape aku lanai bo ndekah banci ras kam….”, nina ndeharana alu senyum ras paguh. Sinik saja perbulangenna. Iluhna ngenca mambur. Lanai terturikenca sedihna.

Kenca ndeharana lanai lit, emaka ia me sekalak ngurusi jabu ras anak-anakna kerina. Enggo piga-piga tahun dekahna, maka turang-turangna pe nuruh ia empo ka mulihi. “Ukurken lah kam metua. Labo pagi lit singurussa, anakndu pagi enggo ka me bahanna jabuna masing-masing. Adi lit senna paling ku Panti Jompo kam bahanna. Lit nge idah kami je, mehuli nge jelmana…” nina turangna. Tapi la pernah itanggapi Bulang Naken serius masa si e. Ibas ukurna, ibas mesera ras kel kami marenda, setia kel ia. Arah ia me lit dua anak kami, penerus mergaku, la kel pernah kitik bahanna ukurku, bagepe enggo erpadan kami marenda maka kematen nirangken kami, engkai maka kuingkari padan kami marenda? Memang lanai idahna aku adi erjabu aku mulihi, tapi aku ma kuinget denga ia rikut ras padan kami marenda….  Nina lalap bas pusuhna. SETIA.

Paguh ukurna lanai erjabu. Ibuktikenna man dirina maka ia dilaki si setia man pasangenna. Guna peringet-ingeten man ndeharana simehuli, setiap kerja-kerja bagepe kepaten, tetap ilanggekenna uis nipes ndeharana marenda, sebage simbol maka ia tetap ras numpak-numpak anak-anak, kalimbubu si rulo, bagepe ku senina sukut ras anak beruna kerina. Bagem iceritakenna man kalak ibas kede kopi e. “Tuhu-tuhu ndatken sada pengalamn hidup luar biasa ibas kesetianndu Bulang… salut aku..” nina anak perana ndai kenca megi turi-turin Bulang Naken ndai.

*****

Manjar-anjar itutup anak beru peti jenazah ndai. “Tatap dage sekali nari Bapandu enda, Bulangndu enda.. sendah nari lanai bo kam kari teran sora, tapi pe teran rupa…” nina anak beru singerana. La keluarga saja ngenca namaken bunga si merim kubas ampun jenazah Bulang Naken. Tapi perpulungen kerina ermorah ate. Sada-sada bunga nutupi uis nipes si lit ibas ampun jenazah Bulang Naken. Uis nipes siberekenna marenda man ndeharana tanda keleng atena bas ulang tahunna. Uis nipes sipakena tetap sebagai simbol kehadiren ndeharana bas kegeluhenna. Uis nipes si kenangenna luar biasa bas kegeluhenna. Uis nipes si jadi temanna seh ia mulih ku simada tinuang, Dibata simada kuasa. “Selamat Jalan Bulang….”.  nina sekalak anak perana janahna serko, sierbahanca heran kalak. Labo lit perkade-kadenna ras Bulang enda, tapi serko kel ia. Mbue ia erlajar ibas Bulang Naken, amin gia megati tokohina. Manjar-anjar rudang si merim, bagepe batang ras uis nipes lanai teridah erkiteken patina enggo tutup.

Jakarta, 13 September 2019.

(Mengenang 2 hari wafatnya Presiden RI ke-3, Prof. Dr. Ing B.J. Habibie).