Cerpen
Pt. Julianus P Limbeng
“Eakh, jadi kai nge untungna man bandu adi bualindu kalak?” ningku man doktor e. “Ih, puas kin kuakap adi banci ia kutokohi, sebab aku kai pe labo lit sekolahku, kutokohi akapndu kalak si sekolahna meganjang, e…, dah kam talu nge ia ku ban….”, nina Doktor Lalang. Situhuna bagi katana ndai, ia situhuna labo sekalak dokter si erdahin bas rumah sakit entahpe doctor si meganjang sekolahna. Dahinna ngemo-ngemo ku juma kalak. Ertemanken cangkul cap buaya, iembakna me rusur juma kalak gelah tanehna jadi mehumur. Erkiteken rih [alang-alang] rusur man embakenna alu cangku, emaka ban anak kuta gelarna Doktor Lalang, entah pe Doktor Rih. Erkiteken lanai turah rih e asal embakkenna cangkulna e, maka tangkel me gelar e man bana.
Memang bas kuta e kai saja pe banci tangkel gelar kalak. Lit dahinna erbahan keranjang, emaka tangkel gelarna Pa Keranjang. Lit ka gelarna Kuasa, tangkel gelarna Kuasa Iblis. Erkiteken pendahinna sekali pe la jore, emaka tangkel ka gelarna jadi Kuasa Iblis. Sebab kuasa iblis akap kalak sierdahin bas ia. Emaka lit ka sada nari gelarna Kuasa, pendahinna erbinaga biang, emaka ban kalak gelarna Kuasa Biang. Lit ka asal sungkun kenca, kai pe “emm…” nina ngue kenca. Emaka ban kalak gelarna Pa Nderkem. Lit ka sibeluh nggemburi ngenca perasatna, istilah si gundari ‘ngompori’, emaka ban kalak gelarna Pa Berek [kecebong]. Bage-bagem tangkel gelar ban anak kuta e man ise saja pe. Bagepe Doktor Lalang, erkiteken lit akap kalak pemetehna, tapi dahinna ngembak rih, emaka tangkel gelarna “Doktor Lalang”.
Aminna gia ncangkul pendahinna, tapi ceritana hebat-hebat rusur. Enggo itemuken Badan Antariksa Amerika pe planet mbaru, eme planet sipesepuluhken pe ietehna. “Enggo kap temuken NASA sada planet mbaru, menam-menam bagi doni enda, tapi gelarna langa ban”’ nina. “Adi nggedang ban Dibata umurku, entah sempat nge min kita pagi pindah ku jah…”, nina ka. Skandal Presiden Bill Clinton ras Monica Lewinsky pe mantap penurikenna. Bagepe analisa kematen Lady Diana ras Dody Al Fayed iceritakenna alu logika-logika. Bagepe tokoh-tokoh penting bagi Marthin Luther King, Gandhi, ras totem-totem kuno bangsa Indian, buaya putih, evolusi biologi kulit hitam perkebunan kapas Mississippi pe ceritakenna alu menarik. Apai ka kerna teori-teori Marxian ras non-Marxian pe kaitkenna ras kegeluhen si gundari. “Mozart gelah enggo tehndu umur 4 tahun enggo banci ermusik, umur 6 tahun enggo banci ia erbahan lagu, termasuk Le Figaro, 35 tahun ngenca umurna, tapi lit 600 laguna, janah gundari inget kalak lalap ia”, nina Doktor Lalang e man bangku. “Ma bagi Mozart e nge maka mantap, lit tanda-tandana kita pernah nggeluh doni enda, eme tading-tadingenken si mehuli. Adi bage ma nggeluh kita lalap”, nina.
Doktor Lalang e la ieteh isepe kade-kadena, janah ija nari asalna maka enggo she bas kuta e. Aminna gia dahinna ngemo-ngemo ku juma kalak, setiap minggu reh ia ku gereja. Perpulungen jabu-jabu pe reh rusur ia. Padahal juma inganna tading cukup lumayan ndauh. Adi udan kenca wari e, sing-singna seluarna she paha, payungkenna bulung galuh, janah pustakana tamana bas tas. Bagepe la ketadingen babada tetap radio kitik-kitik kuja pe. Selain lit sada biangna sebagai teman, radio eme temanna si paling akrab, sekaligus sumber informasi dunia sekitarna man bana. Emaka dauh-dauh nari enggo idah senterna si milep-ilep, ugape enggo pasti e Doktor Lalang. Bagepe Mamre ras kegiaten sideban kerina la ia ketadingen. Persembahen tahunenna pe tiap tahun galarina. Adi bas perpulungen jabu-jabu kenca, ia me rusur sipetna ngerana, janah penggejapenna e payo ka akap kalak.
Bukana tabungna, pedaratna isap bulung nipah ras mbako tabeh. Sada-sada pebelangna bulung nipah ndai, emaka tamana mbakona. Gulung-gulungna, emaka santikina. Cep-cepna manjar-anjar. Setengah gebukna pedaratna arah igungna, setengah nari pedarat arah babahna. Tatapna ndauh. La ia ngerana. Janahna nepcep isap e ikipasina ayona alu tengkuluk [bulang]. Reh dekahna reh kerahna panasna e. Enggo sepulu lima tahun ia juma berngi sekalak itemani biangna Si Roro. Saja ban hebatna akap kalak rusur ceritana ban kalak gelarna Doktor, lit ka pe professor nina kalak. Lit ka pe akap kalak hebatsa ceritana, emaka lit kalak erpengakap ia adon. Tapi aku meriah rusur kuakap ceritana. Emaka lakuakap ndauhsa reh ku sapona amin gia lit telu kilometer dauhna rumah nari ku juma inganna tading. Kerina bukna enggo mentar, janah ayona pe enggo ringut. Adi itaksir kira-kira umurna enggo lit 70 tahun. Tapi megegeh denga erdahin.
“Kuakap dehko, kiamat e pagi manusia e nge erbahanca”, nina. “Engkai maka bage nindu Pa ?” ningku tare ia. “Bage kin”, nina. “Kiamat e eme pendungi doni enda. Tapi tek kin ko lit kedungen doni enda ?”, nina ka mulihi nungkun bangku. “Ih, tek pa. Sebab bas Alkitab ah pe katakenna bage”, ningku. “Oo…, adi ena katam. Enda la pustaka, labo la aku tek. Cerita kita kerna kiniteken entahpe Pustaka ena gampang mbantahsa secara ilmiah. Sebagai contoh saja misalnya, umur doni enda adi menurut Pustaka lebih kurang 6000 tahun denga umurna, tentu adi sibandingken ras asal mula kegeluhen enda tentu gampang mbantahsa. Labo la aku tek Pustaka e, tapi aku ngenen arah sisi lain”, nina Doktor Lalang. “Kiamat e banci situhuna sicermati arah sisi ilmiah pe situhuna. Sebab doni enda merupaken sada system si mehuli kel situhuna. Kerina teratur rikutken baginna masing-masing”, nina Doktor e. “Payo kin bage Pa, dehkam bas Genesis ah pe bage nge nina”, ningku ka. “Adi ceda system e, jem pagi maka ceda kerina. Bagi gundarilah, engkai kin maka lit angin meder, melas, terbayangkenmu kin adi leneng (gundul) kerina taneh e, kuakap terjadi pemanasen global, cair me es kutub utara ras selatan, kelenglengen me doni, la kin gedap nge kita kerina ?” nina.
Sanga ia ercerita e, reh me sekalak perburu. “Melala ka nge arah enda pincala Pa …?”, nina perburu ndai nungkun. “Ii…, e la kap bidangku ena nak…!”, nina Doktor Lalang.
“Maksudndu…?”, nina ka perburu ndai.
“Maksudku, bidangku ngembak rih….”.
“Oh kam pe, tah lit jenda perik ateku…”.
“O…, e sentabi aku. La bidangku e..”, nina Doktor Lalang.
Kenca lawes perburu ndai kusungkun ia. Kepe ia la setuju adi perik-perik e ibunuhi. “Dage kuterusken kerna si ndai”, nina. “Jadi situhuna kiamat e hanya akhir sementara saja ngenca ibas sada proses, kaiten doni ras isina saja ngenca. Dung kenca kiamat e ma lit denga nge proses, tapi mungkin secara manusia kai je laterukuri kita. Banlah bagi manusia e mate, kenca mate sieteh kin uga je manusia e ? Ma lang. Bagepe sebelum kita tubuh ku doni enda, terukuri kita kin ija nari kita ? Si nyata ma sigundari e ka nge. Adi kita mate si eteh secara organic jadi taneh. Kenca jadi taneh, jadi kai… ? Tentu lit, emaka si laerkeri-kerin e, emekap si la erkeri-kerin e sendiri. Ije, secara ilmiah she je ka memang jawabenna. Agama ka ngenca banci njelaskenca. Ilmu pengetahuan siapai pe la banci njelasken ija nari manusia e janah kuja kenca ia mate. Bagepe kerna kiamat ndai, situhuna kuakap erkiteken ceda system ndai ban manusia, emaka lanai teratur doni ndai, emaka sontar janah kernep me kerina isina. Dage adi sini perluken manusia e pe enggo lanai melias, lanai jadi teman. Gundari banci siidah uga musim udan ras musim perlego, lanai erturin. Manuk bernungen, manusia banna pinakiten. Ozon reh nipesna, lau mbelin kerah, batang kayu rabas itabahi, rubia-rubia kernep. Banjir, longsor, janah pinakit pe melala erbagena. Emaka adi ndekah denga ate ‘kiamat’ doni enda, jagai dage doni enda. Bagem analisisku”, nina. “Mungkin adi ku gereja ko rusur, cuba baca ko Masmur 8 : 1- 9, uga nina je. Tapi kuakap kalak sierpemeteh e kange lalan ncedai, aku ngembak gia perasatku, e la lebih situhuna bagi kai nina ibas kitab Kejadin 3 : 19”, nina Doktor Lalang e tempa-tempa bagi erkhotbah.
Jengang aku megiken penjelasen Doktor Lalang enda. Entah payo kin bagi katana e, ateku. Perjuma-juma, tapi ilmiah ka kuakap tempa. Pustaka gampang mbantahsa nina ka, tapi suruhna ka ku oge kitab Masmur. Ia sendiri pe rajin ka ku gereja. Bingung aku banna. La terukuri aku kai sini maksudkenna e. Emaka kuinget-inget saja ibas pusuhku.
Dua bulan kenca si e, mulihken ka me aku ku sapo Doktor Lalang e. Biasana lit rusur gebuk bas dalikenna nari. Tapi enda lalit kuidah. Biangna, Si Roro pe ngkipas-kipasken ikurna saja ngenca janahna medem tempa lit atena katakenna bangku. Kudeheri manjar-anjar ku sapo e, mata biang e tempa-tempa mindo penampat. Kenca she bas sapo e, kuidah Doktor Lalang terdo la kemuit. Kudadap perdempakenna melas denga, kudadap ten-tenna erdebet-debet denga. Bukana matana, tatapna aku ndekah. Tapi lanai ia ngasep ngerana. Kubuat lau mbentar bas tambe, kutunggahi ia, lanai terinemsa. Kutunggahi ka mulihi, tapi lalap lanai terinemsa. Emaka ertoto aku janah kujemak tanna. Kenca dung aku ertoto, manjar-anjar tarikna tanku ku koncang bajuna. Pala-palaina mereken tabung isapna e man bangku. La ndekahsa retapme kesahna. Bagepe biangna Roro ikut mate. Ikuburken anak kuta me Doktor Lalang ndai.
Tuhu-tuhu anak kuta kerina merasa ikut erceda ate ras merasa kehilangen. Sebab selama enda ibas kegiaten gereja lebih hidup banna. Penggejapen ras pemahamen teologina pe banci lebih njemba perpulungen bas kuta si kitik e. Bagepe anak kuta kerina ikut erceda ate, sebab reh kenca ia ku kedai kopi, meriah akap kalak banna megi-megi. Ketua Runggun pe orang tuana dilo Dibata la ia ngandung. Emaka ibas kelawesen Doktor Lalang e pe Ketua Runggun piga-piga kali ngapusi iluh campur ras imenna. Bagepe aku, amin la gia aku ngandung, tapi tuhu-tuhu aku nggejapken kebenen. Mbue kudat pemeteh ibas ia nari. Ia me sikubahan jadi guru informalku. Adi biasana tengah juma e ia ngenca ras biangna, sendah juma e jadi ingan pulung anak kuta. Manjar tapi pasti, udan rintik-rintik pe mulai nusur. Sada-sada ngawan perpulungen nadingken taneh si megara ingan Doktor Lalang ikuburken ras biangna.
Kenca she rumah, kubuka tabung isap si berekenna man bangku ope ia berkat. Lit ije sada foto, janah balik foto e lit tertulis gelar R.R. Nursuwarningdiyah, Yogyakarta, 20 April 1963. Emaka ibas tabung e ka pe lit sada kertas enggo kumal kel. Manjar-anjar kubuka gelah ula sontar. Lit je tertulis “nDalem II/74 Sewon, Bantul”. Kusimpan foto ras kertas ndai mehuli. Sada waktu pagi kuangkai nge kerina ateku.
Enem bulan kenca si e, berangkat aku ku Yogyakarta. Kudarami alamat si lit ibas kertas e. Dungna kudat alamat e, eme dalan ku arah Parang Teritis. Galang rumah e, janah depan lit tertulis praktek dokter “ Dr. Malem Kerina, Sp.OG”. Kenca pebengket pembantuna aku ku bas, emaka ndarat me sekalak perninin. Kutatap ayo nini e, seri kuakap ras singuda-nguda si lit ibas foto ndai. Emaka kuceritaken kerna perdalanenku maka she ku Yogyakarta, janah kutuduhken pe foto e man bana. Ndekah ia tangis la ersora. Kepeken Doktor Lalang e emekap bekas mahasiswa publisistik UGM. Mahasiswa denga kalak enda enggo erjabu, dua bulan kenca anakna lahir, sebagai salah sada tokoh pergeraken mahasiswa, ia idarami tentera. Tadingkenna ndeharana ras anakna Si Malem. Identitasna pe selama enda itutup-tutupina. Ku kutana sendiri gugung pe la ia pernah reh. Berbagai upaya pe enggo ibahan keluarga. Kuta-ku kuta pe enggo darami. Teman-temanna sekolah ndube pe enggo isungkuni. Pas bagi kata-kata lagu sigundari, nina : “dua jelma isungkun, telu ngaku la ngidah”. Emaka iputusken keluarga me selama enda lanai ia idarami, janah ianggap bene, entahpe mate. Bagepe Doktor Lalang sendiri selama enda cukup ketat njemak rusiana. La pernah ia nggit enceritakenca ise ia, ija nari ia, janah latar belakang kegeluhenna.
“Empat puluh tahun saya dalam penantian, akhirnya walaupun dia telah pergi menghadap Tuhan, tapi aku sangat bahagia, karena di akhir usiaku aku dapat membawa anaknya, meski yang akan kami temui pusara”, nina nini e alu tangis. “Ketika kami diberkati di gereja, keluargaku memusuhi aku karena aku memilih Yesus, aku pegang betul hanya kematian yang dapat memisahkan kami, meskipun telah lama berpisah, dan perpisahan itu datang kembali kali kedua.”
Amburken Roro ras Malem anakna, bunga sierbage rupa ku babo kuburen Doktor Lalang ras Roro. Angin si rembus engkelayap-kelayapken bulung rih si rusur cangkulina, tempa-tempa nehken ‘selamat tinggal’ man ndehara ras anakna si enggo 40 tahun la jumpa. Kematen Doktor Lalang ngingetken aku mulihi pesanna. Adi ndekah denga ate doni e kiamat, jagai doni e, nina.
Bj. Menteng, 26 Pebruari 2006, pkl. 03.17 dinihari.
NATAL I FLANCIUS
Pt. Julianus P Limbeng
Bagi sengget tempa aku natap ayongku enggo mulai ringut turihna ras mugur-ugur. Kutatap ndekah bas kaca spion mobilku, sangana aku kena macet tol kota. La kueteh perban kai maka dalan tol sendah macet total, la banci erdalan. Biasana amin gia macet tep-tep wari, la bagenda kel macetna. Enggo kepe metua aku ari, ateku bas ukurku. Tapi erkiteken kesibuken-kesibuken tep-tep wari, mbaru denga kuakap rusur aku tading taneh Jawa si malem enda. Emaka kupegeluh me CD mobilku meneken ngel-ngel nimai macet. Terbegi me Symphony No. 9 op.125 L.V. Beethoven ibas chamber orchestra si tuhu-tuhu erbahan cupingku terbayang ku masa-masa Natal. Rempet ndauh ku pudi ingetenku, ija 40 tahun si lewat aku berkat nadingken kuta pas ka kel bulan Desember, empat wari ope perayaan Natal kutaku.
“Timai me lewat Natal e kam berkat anakku, empat wari nari nge kap”, nina Nande man bangku, tupung ku kataken sura-surangku erlajang ku Jakarta.
“La pedah ku timai Nande, sebab lanai kari lit temanku ku jah, adi gundari lit. Sebab labo pernah aku kujah,” ningku ngaloi nande, ija teridah bas ayona bagi kurang mendukung aku berkat erlajang ku Pulau Jawa.
“Kecewa kel kari teman-temanndu anakku, enggo ajarindu koor, pas acarana e la kam je, adi banci nge tunda, tundandu saja lebe”, nina ka Nande tole man bangku. “Lang Nande, enggo kel bulat ukurku erlajang ndai, la pe aku je enggo me sikap pagi kerina”, ningku.
“Yakh, adi bage nindu bage…, ku rumah Mamandu ah dage kam kari lebe, gelah ia pe tehna kam berkat”.
“Ue Nande, kari aku ku jah”, ningku.
“Labo kiniteken sindekah, pagi erpagi-pagi e lampasi lebe kukuburen bapandu kita lebe, gelah mehuli pagi perdalanndu”, nina Nande tole. “Bage-bage Nande,” ningku .
*****
“Adi bage, mejuah-juah dage Kalep, ija pe kam ringan ula lupa ernalem man Dibata, adi jenda kam rajin ku gereja, tole rajinen ka kam pagi iperlajangen, ula kel pagi berita si la mehuli begi kami kuta nari”, bagem nina Mama mbereken pedah man bangku dung kenca kami elah man ras banna pertoton perberkatenku.
“Enda alokenndu Kalep, labo kai pe terbereken kami ras Bengkilandu, em sitik, em mbue, pasu-pasuna nge situhuna,” nina ka Bibi janahna namaken sen ku tanku.
“Bujur Bi”, ningku. Kutatap ku Nande, lanai ia ngerana, tapi ibas ayona sada-sada naktaken iluhna. Sada hal aku maklum engkai maka Nande teriluh. Lampas kel kami tadingken Bapa, janah aku kel sedekah enda sibanci muat ukurna. Terlebih aku ka sintua, janah lit denga agingku dua nari. Bagepe situasi negara masa e la menentu, erkiteken mbaru denga kel terjadi G30S PKI, jadi lit tempa kebiaren.
“Ula kam ngandung Nande, totokendulah aku iperlajangen, gelah banci pagi terulin geluhta”, ningku ngapuli Nande. Aminna gia bas pusuhku getem nge nadingken Nande, tapi la kucidahken ibas ayongku. Lang situhuna labo aku tahan natap ayo Nande siteriluh e, tapi sebagai dilaki kutahan bas pusuhku.
“Labo aku ngandung anakku, meriah nge ukurku kam berkat erlajang, totoku tetap kel ngarak-ngarak kam she ku perlajangen. Emaka ija gia kam ringan, ban lah ijah orang tuandu, sebab sindeher ras kam e nge leben meteh siugapana pe kam, adi kami ndauh nge Lau Silebu enda. Bagepe adi jadi kam pagi nakku, bagi buluh lah kam, meganjang sekali gia buluh e, pucukna tetap nulih ku ndampurenna,” nina Nande janahna ngapusi iluhna. Emaka berekenna man bangku sada kertas, eme kertas ibas pembungkus obat nyamuk nari. “Bacandu pagi rusur enda Anakku adi tedeh pagi atendu aku,” nina Nande. Kualoken kertas e, janah kutamaken kubas tasku, janah kusimpan mehuli.
“Ue Nande, kuinget nge pagi kerina pedahndu e. Dage, kam pe duana agingku, ula kam gutul ya, sampati kena nandeta e, janah ula kena sidalih-dalihen nampati nandeta,” ningku janah ndakep agingku duana. Kerina anak kuta si reh paksa e sinik kel kerina, janah nuduhken ayona pe ikut ermorah ate ibas perberkatku.
“Ue Kaka Tua, mejuah-juah,” nina duana agingku. Deher dalikan, kuidah ije biang kami Si Pancur pe gempang janah ngkipas-kipasken ikurna, tempa-tempa ia pe tehna aku berkat erlajang, janah ia pe rate megogo. Kudeheri, janah kusapu-sapu takal biang e ras la kugejap kudakep biang e. Adi kujuma kenca aku sedekah enda ia rusur temanku. Kerina mbayangken aku berkat ku ingan sindauh kel, padahal gundari cukup dua jam saja enggo banci seh.
Dungna, rehme temanku si ras kami berkat ku Jakarta ndai. Emaka berkat me kami nadingken kuta. Itaruhken kade-kade me kerina aku alu erdalan nahe she ujung kuta. Itaruhken Bengkila me kami nangkih sepeda seh Talun Kenas, lit sepulu sada kilo meter dauhna. Eme dua sepeda siboncengen.Talun Kenas nari ku Delitua naik motor gerobak, merekna GS, supirna kalak Keling (Tamil), gelarna Sami, tapi ia enggo lancar kel bahasa Karo. “Kuja nge ate kena Sillih..?”, nina Sami ndai. “Ku Jakarta Lih,” ningku. “Ooo.., ku Jakarta,” nina.
Seh me kami jam lima karaben Belawan. Nginap kami sada berngi Belawan, rumah kade-kade temanku ndai. Erpagi-pagi kenca dung sarapen, berkat me kami ku Pelabuhen. Nangkih me kami ku kapal radu ras penumpang sideban. Kapal e tuhu-tuhu galang, janah enda denga nge aku ngidah kapal laut, gelarna KM Flancius. Kenca enggo nangkih kerina penumpangna ku datas, ersora me terompetna telu kali.
“Tueeetttt….., tuueeetttt……, tueettttt…….”
Manjar-anjar berkat me kapal e nadingken Belawan. Kerina penumpangna erlumba-lumba ku tingkap kapal e janah mbaba sulampe (sapu tangan). Ikiap-kiapkenna sapu tangan e ndarat. Bagepe ibas pelabuhen e, kade-kade penumpang siikut naruhken kami pe ngkiap-kiapken sulampena ka. Deherku, lit sekalak singuda-nguda ngandung, janah imenna epe enggo ndabuhen. Ole-ole kenna sapu tanganna, “Inaaa…ng….,Ama….ng…”, nina. Kutatap bas tingkap nari kuteruh, kuidah sekalak pernanden si enggo metua, kuinget ka Nande sikutadingken kuta. Erkiteken lalit sinaruhken aku, emaka kupedarat andukku, ku ole-oleken ka ndarat. Ije maka enggo megogo ateku, kenca enggo ndauh ras Nande. La kugejap naktak ka nge iluhku.
Kuapusi iluhku alu anduk ndai, erkiteken reh dekahna reh kitikna idah Belawan ndai, seh pe maka lanai teridah. Reh dauhna kapal e erlayar, sada-sada penumpang e ngapusi iluhna. Teneng tapi merawa, eme lawit si mangko-angko si man tatapen.
Telu wari telu berngi dekahna aku bas kapal. Pas berngi terakhir pas kel tanggal 24 Desember 1965, eme malam Natal. Tuhu-tuhu meriah kel. Lagu-lagu natal pe iputar bas berngi e. Aturna kin aku Natal kuta, tapi Natal bas kapal. Lit banna kebaktian Natal bas kapal e, janah kuikuti me kebaktian Natal e. Khotbah me Pendeta Tetelepta, sekalak Ambon, janah bas khotbahna iturikenna uga Yesus reh ku doni enda alu kesederhanaan erkiteken dosa-dosa manusia. KerehenNa eme jadi kado paling meherga kel ibas geluhta, nina. Adi bage, uga kita ngaloken hadiah e, enggo me kita sikap ? Nina Tetelepta ndai.
“Suka cita Natal tidak akan kita temukan dalam semua pesta. Hanya melalui Yesus, Allah menawarkan pengampunan atas masa lalu, ketentraman pada saat ini, dan masa depan yang pasti dalam kekekalan,” nina Pandita ndai ibas khotbahna.
Khotbah pandita enda ndai tempa mbereken semangat man bangku ibas ndalanken sura-surangku erlajang. Sebab ‘masa depan yang pasti’ nina. Emaka kenca dung kebaktian ndai, ndekah aku rukur sisada, janah ibas matangku terbayang ayo Nande, ras duana agingku. Sebab bas berngi e ka nge Nande ras agingku kuta ngerayaken Natal. Aminna gia kami pedauh daging ibas Natal, tapi ukurku rembak ras kalak e.
Muatku tunduh, kubuka me kertas obat nyamuk sini bereken nande man bangku empat wari silewat ope aku berkat. Manjar-anjar kubuka. Kepeken isina eme sada ayat sini buatna ibas Pustaka nari, eme ibas Yohanes 3:16, Nina : “Karena begitu besar kasih Allah akan dunia ini, sehingga Ia telah mengaruniakan Anak-Nya yang tunggal, supaya orang yang percaya kepadaNya tidak binasa, melainkan beroleh hidup yang kekal”.
Dung kenca kubaca Bujur Nande, Selamat Natal Nandeku…., ningku bas ukurku. Janah kusimpan kamulihi kertas e bas tasku. Emaka she asa gundari ayat enda tetap kuinget, apai ka adi Natal enggo she. Bas kapal Flancius me ayat enda pertama kuoge.Tapi setiap Natal pasti kuoege ayat e janah kuinget Nande. Janah enda pe memotifasi aku ibas geluhku nehken kekelengen man kalak sideban sebagai kalak sierkiniteken.
Empat puluh tahun aku perlajangen, janah aku pe enggo erkempu, pedah Nande marenda teringet lalap bas aku, amin gia Nande enggo ka ngadap Dibata. Tatapen mataku ndauh ku lebe, samar-samar teridah kerina mobil deherku erdalan, janah kubegi sora klekson mobil belakangku la erngadi-ngadi. Emaka ituk-tuki kalak me kaca mobilku, janah nina “ Pak… maju…Pak…, maju….”. Kutulihken ku samping kuidah mobil sideban enggo maju. Je maka sadar aku, enggo kepe aku melamun ndekah. Sympony No. 9 Beethoven, Song of Joy pe tetap ersora. Kupedalan mobilku manjar-anjar ku rumah, sebab kari berngi pe Malam Natal ka.
Dua pasang pakaian ngenca marenda kubaba kujenda, ras pustaka si badia sada.
Gundari kuukuri kai si enggo lit bas aku, tempa-tempa la terukuri aku uga belinna kekelengen Dibata man bangku. Kenek Saudaranta ngenca marenda perasatku. Gundari mobilku lit seratus lima puluh. Anak sehat, seh sekolahna, tapi kai enggo si kuban man Dibata ?
Selamat Natal.
Karawaci, 8 Desember 2005.
Comments