Bengket Ajar
BENGKET AJAR
Pt. Julianus P Limbeng
“E ula kel kitik ukurndu, adi sekali enda kusimbak katandu Nande....”, nina Morgan man nandena si enggo seminggu reh kuta nari ras bapa Morgan. Ndekah sinik Nande Morgan la erbelas. Merawa atena, tapi itahanna. Mungkuk lalap ia. Lit sepulu lima menit dekahna teluna kalak enda la ngerana. Melungun. Adi nina tua-tua si adi, mentas begu. Pedarat bapa Morgan isapna bas koncangna nari. Saganina, janah mbages kel selduna, emaka pedaratna gebukna deba arah babahna, deba ka arah igungna. Sekali ngenca cepcepna, lagejapna enggo nggedang abu isapna, piah naktak la bas asbak.
Emaka pala-palai nande Morgan me ngerana, nina: “Adi marenda nari kel kam mbegiken kata kami ras bapandu anakku, kenca kam enggo galang pang kel kam nimbak kata kami”. “Labo bagena nande, payo kin akapndu silakoken bagi katandu e ?’, nina ka Morgan ngaloi nandena. “Payo, engkai maka la payo. Aku pe adi la kuakap payo labo kusuruh”, nina Nande Morgan. “Enggo me iakap kami payo anak maka kataken man bam..., ula nari kin ko nogani..., adi engo pitu tahun enggo me banci ko rukur...”, nina ka Bapa Morgan. “Enggo melala contoh si bage siidah, jelma si enterem e pe maklum nge ia. Uga ban adi lakin payo... Aku gia ma kueteh nge adi darehku, tapi adi la payo labo dalih adi si enggoi ”, nina ka Nande Morgan erbelas.
“Ih... aku kam nande, ban la ije kel nge permenndu e, adi begina uga denga lah akapndu bas pusuh na ah”, nina Morgan. “Mehuli nge kap sibahan carana. Si mehuli-mehuli nge siban. Adi alu cara si payo nge si ban, Mamamu ah pe labo ia keberaten”, nina Bapa Morgan. “Kam kap marenda duana ras nande sinuruh aku mbuat impal Pa. Ma tehndu nge nai lit teman ku meriah si enggo empat tahun kami erteman. Gundari ......”, nina Morgan lanai terteruskenca, erkiteken emosi janah merawa pe atena. “Gundari bagenda saja yah..., adi nande denga atendu... em ukurken. Kami pagi mulih ku kuta. Titik.” nina nande Morgan. “Payo nge anak. Adi la kin begikenko kata kami ras nandemu e sekalenda, ula nai ko ngarap dedeh kami jabumu e”, nina ka pe Bapana.
La ialoi Morgan ranan bapa ras nandena. Kem saja ia ibas inganna kundul. Tatapna ku lantai. Keramik si mbentar ngenca si teriedah bas matana erkiteken tatapenna ku lantai rumahna. Reh dekahna, reh samarna teridah lantai keramik e. Si lit bas matana eme kejadian geluhna 20 tahun si lewat. Amin gia ia sekalak dilaki itengah-tengah jabuna, tapi la kel pernah ia meneh entahpe manja. Kai sikataken orang tuana kerinana ibegiken janah ikutkenna.
****
“Labo bage Morgan, padin nge kam masuk SMA saja anakku. Adi SMM (--Sekolah Menengah Musik--) jadi kai nge kam pagi. SMA pe kam, banci nge kap kam terus les musik”, nina Nande Morgan piga tahun si enggo lewat kenca Morgan lulus SMP. “Bage kin nak, selama enda gia ma les musik nge engko..”, nina ka Bapana. “Adi bage kin nindu duana, bagepe labo dalih Nande..., lang adi ukurku kel situhuna, lebih berminat nge aku sekolah musik saja”, nina Morgan alu ngerana manjar-anjar janah patuh kel man duana orang tuana. “Bage kin anakku, adi SMA kam melala denga kel pagi si man pilihenndu kune la pagi bage atendu musik ena ndai...”, nina nandena.
Telu tahun dekahna, tamat me si Morgan SMA alu tetap ranking sada. Emaka melanjut me atena ku sada perguruan tinggi terkenal jurusen Fisika, erkiteken ilmu fisika lit kaitenna ras akustika, eme sada bagin si penting pe ibas ilmu musik. Akustika enggo pagi lit kaitenna ras musik (bunyi), emaka enggo kel berminat ia melanjut ku perguruan tinggi. Janah segi pengetahuanna pe memungkinken kel ia masuk, erkiteken ia tetap juara bas sekolahna. Emaka kenca enggo mulai sipenmaru (-seleksi penerimaan mahasiswa baru-), iturikenna me man nande bapana kerna sura-surana melanjutken sekolah ku perguruan tinggi. “Ku jurusen kai kin atendu anakku...?”, nina nandena. “Adi sura-surangku kel nande, ku Fisika ateku, sebab ilmu fisika banci denga kuterapken ku bidang akustika ibas musik,” nina si Morgan yakin. “Ih...., tah motu kel nge engko anak. Kalak nggit mbayar ratusen juta gelah banci masuk ku kedokteran, enda engko dalan enggo me lit, pemetehmu pe lit, engkai kin maka la pilihko ku kedokteran...??”, nina bapana setengah heran. “Ii..., aku dah kam Pa, labo kel minat aku ku kedokteran ena...”, nina Morgan. “Payo nge bagi kata bapandu ah anakku, adi dokter saja uga kin...dat nge min akap kami kam bas negeri, adi nggit kam ku kedokteran bas perguruan tinggi si apai pe atendu Indonesia enda pala-palai kami ras bapandu e...”, nina ka nande nambahisa. Memang secara ekonomi pe keluarga enda cukup mampu, erkiteken buah rimo pe tetap meramis, janah regana pe lit. “Lang kin gia, keluarganta pe langa lit si jadi dokter..., kune pagi keluarganta e sakit ma banci tambarindu. Mbelin kel gunana pe kam man kade-kadenta..”, nina ka Bapa Morgan tole. “Adi dokter ma idahndu, sukses kerina geluhna... janah mehaga anakku..”, nina Nande Morga ka. “Labo kerina bage dokter nande, lit nge kuidah dokter, bapa temanku sekolah, engkawil ngenca perasatna, adi merhat kam banci kutuduhken man bandu. Langa jarumna kalak, langa suin. La kin ije bidangna...”, nina Morgan.
“Jadi kuakap, em sipayona. Adi isindu pagi formulir sipenmaru ndai, pilihlah kedokteran”, nina Bapana. Emaka iikuti si Morgan me kai sini enggo iputusken orang tuana. Kenca pengumumen ndarat, emaka ndarat me gelar si Morgan, janah masuk me ia ku perguruan tinggi alu jurusen kedokteran. Meriah pe ukur keluarga kerina, emaka ibahan me acara syukuren, janah mbulak ka pe si empat nahe.
Amin gia labo sura-surana kel, tapi i Kedokteran pe tutusina kel erlajar. Semester pertama nomor lima nilai na simeganjangna. Tapi ibas semester sipeduaken nilaina simeganjangna. Emaka banci dungina kuliahna lebih cepat asa waktu siitentuken. Sanga ia kuliah enggo ka pe imulaina erteman-teman ras sekalak diberu, eme suku Tionghoa nari. Yap Hui Tjin gelarna. Situhuna maka erteman pe ras Yap Hui Tjin enda, erkiteken gigih kel idahna diberu enda ndai. Eme rusur saingenna ibas erlajar. Semester pertama nilai Yap Hui Tjin enda me simeganangna. Emaka erkiteken sama-sama beluh, janah rusur pe erlajar ras diskusi ras-ras, emaka mulai me turah atena ngena sapih-sapih ia duana. Telu tahun dekahna kalak enda erteman, janah enggo pe sempat icakapken kerna sura-suura erjabu.
“Erkiteken enggo dung persekolahen anak kami Si Morgan, emaka iundang kami kita kerina wari Sabtu enda, gelah ras-ras kita kerina man i jabu kami, erkiteken meriah kel ukur kami, enggo dung ia i wisuda...” nina bapa Morgan ras nande Morgan ngerana ibas gereja kenca dung kebaktin. Emaka inehen pe ibas momo tuhu galang itamana persembahen pengataken bujurna. Kerina sair banna, lit guna suka makmur, alpha omega, permata, kesejahteraan pandita, ulih siermakan, termasuk pe kesejahteraan pegawai gereja.
Ibas acara syukuren e, reh pe kerina sangkep nggeluh, bagepe kerina anggota perpulungen lalit sitading-tading. Emaka iban ka pe acara erbelas ibas sangkep nggeluh. Ibas tegun kalimbubu ngerana, tersena ibas babah kalimbubu nari ngatakenca alu erjagar-jagar, tapi mbelin kel ertina, nina: “Selamat man kam bebere kami ibas enggo dung persekolahenndu. Malem kel ate kami mamandu, mamindu ngidah kam tuhu-tuhu bengket ajar. Ternen-ternen kam, impalndu enggo melala mbelin....”, nina Mama si Morgan i Lubang Ido nari. Bagem acara e pe erdalan alu mehuli janah puas kel ate orang tua si Morgan.
Kenca enggo idungina masa PTT-na i Kalimantan, mulih me si Morgan ku kuta, janah ijumpaina pe Yap Hui Tjin si enggo ka pe dung PTT. Iputusken me maka ibas tahun e ka me kalak enda erjabu. Emaka ibas sada wari, ibabana me Yap Hui Tjin kujabuna, ipeseh si Morgan me atena sura-surana e man duana orang tuana. Perban enggo idah orang tuana diberu e ras Morgan, mis orangtuana curiga, janah minter macem ayona. Salamina pe diberu e, tapi la atena tutus. Bagepe Yap Hui Tjin sensitif ngidah orang tua Morgan, emaka karaben minter ia mulih ku kutana, amin gia nginap nge min atena.
Berngina kenca elah man, ipeseh si Morgan me sura-surana erjabu ras kalak Cina ndai man duana orang tuana. Minter kel merawa duana orang tuana. “Kalak Cina ka atem, anak mamamu ah pe melala mejile... Siapai atem, aku ngerana man mami mu ah..., eh dehko enggo salah pe. Ngerana ras mamim ningku ka..., nande mu e maksudku ngarihkenca...”, nina Bapana. “Sentabi aku pa enggo telu tahun kami erteman kuliah ndube, emaka dua tahun enda pe kami tetap nge berkomunikasi jarak jauh. E sekali enda mindo aku bandu gelah sehindu sura-sura kami, ngarap kel aku man kam bapa ras nande..”, nina. “Pokokna la banci...”, nina Nande Morgan alu mekpek meja. “Adi ah ndai kin buat ko, ndelis aku.... gundari ukurken apai pangen kalak Cina ah ndai asangken aku... Enggo pebelin-belin, sekolahken... encage... pokokna la banci. Lang !! Titik !!” nina nande Morgan alu cukup emosi.
“..........Ula atendu morah gi, amin gia kita sirang bas ukurku tetap nge kam. Tapi amin bage gia, guna kiniulinta ras-ras, lupakenlah aku. La padanta ban Dibata. Amin gia kueteh mberat nge ngelupankenca. Kutotoken kam pe jumpa pagi ngena si ngena atendu. Bujur. Morgan......” Bagem nina surat Morgan terakhir man Yap Hui Tjin, erkiteken enggo ipersada keluarga arih, maka ipejabu me si Morgan ras impalna, permen nandena kel.
“Salah kel kami ras bapandu anakku, emaka mungkin erkiteken kitik kel nge nai ukur Beru Cina ndai itadingken kam ia, entah e nge makana lalap la lit kempu kami. Emaka adi nggit denga nge Beru Cina marenda man bandu, enggo me persada kena saja arih kena. Tadingken saja permen kami ah....”, nina Nandena man Morgan reh ndahi anakna ku Jakarta. “Lang nande, erjanji kel marenda aku lebe-lebe pandita, aku erpadan tetap setia, pala kematen nirangken kami ningku marenda... Emaka lang Nande.... lang Bapa... ula nai aku ibabandu kubas dosa.....”. “Gundari apai pe nim ue ken kami, gelah lit lah kempu kami....” nina ka Bapana.
Ndekah kel inget si Morgan marenda nats khotbah sini ibuat pandita ibas acara pemasu-masun perjabunna, eme I Petrus 3 : 1-7, eme kerna ndehara ras perbulangen. Nina pandita tupung si e, “Kam duana arus sikeleng-kelengen ibas jabu, adi kam sikeleng-kelengen, maka epe jadi persembahen man Tuhan. Tole pe maka kam si Morgan arus jeli ras bijaksana erndeharaken ndehara si lemah daging kulana.. Ula kel kerna sada masalah maka kam lanai siangkan, tapi rembakkenlah dirindu tetap man Tuhan.”
Bagepe ibas acara pemasu-masun e ibacaken padita ka pe Matius 19:3-6. “Banci kin ulihken kalak ndeharana kerna kai-kai gia sebabna ? Ma enggo ioge kam maka mula-mulana nari ijadiken sinepasa dilaki ras diberu nge ? Sabab e itadingken manusia nande bapana gelah ras ndeharana ia, janah si dua kalak e jadi sada kula me kap; lanai dua dage ia sada kula nari nge. Dagena si enggo ipersadaken Dibata, la arus isirangken manusia.....” Bagepe sanga tukar cincin marenda ibacaken pandita ka pe sada ayat nari, eme Roma 15:13, “Dibata sumbul pengarapen, Ia lah sindemi kam alu keriahen ras kemalamen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa”. Emaka amin gia enggo pitu tahun dekahna Morgan erjabu tapi lenga dat tuah, tapi ertambah-tambahna kinitekenna man Tuhan amin melala gia rusur pedah la jore.
“ Lang nande...., lang bapa. Lang !!”, nina. “Ula kel kitik ukurndu amin sekali enda la ku ikutken ajarndu. Ula kel ndele atendu adi sekali enda kutogan kam duana”. Lanai ngerana sengkebabah pe nande ras bapa Morgan. Kerina kundul sinik. La ngerana.
Bjg. Menteng, Agustus 2006.
Pt. Julianus P Limbeng
“E ula kel kitik ukurndu, adi sekali enda kusimbak katandu Nande....”, nina Morgan man nandena si enggo seminggu reh kuta nari ras bapa Morgan. Ndekah sinik Nande Morgan la erbelas. Merawa atena, tapi itahanna. Mungkuk lalap ia. Lit sepulu lima menit dekahna teluna kalak enda la ngerana. Melungun. Adi nina tua-tua si adi, mentas begu. Pedarat bapa Morgan isapna bas koncangna nari. Saganina, janah mbages kel selduna, emaka pedaratna gebukna deba arah babahna, deba ka arah igungna. Sekali ngenca cepcepna, lagejapna enggo nggedang abu isapna, piah naktak la bas asbak.
Emaka pala-palai nande Morgan me ngerana, nina: “Adi marenda nari kel kam mbegiken kata kami ras bapandu anakku, kenca kam enggo galang pang kel kam nimbak kata kami”. “Labo bagena nande, payo kin akapndu silakoken bagi katandu e ?’, nina ka Morgan ngaloi nandena. “Payo, engkai maka la payo. Aku pe adi la kuakap payo labo kusuruh”, nina Nande Morgan. “Enggo me iakap kami payo anak maka kataken man bam..., ula nari kin ko nogani..., adi engo pitu tahun enggo me banci ko rukur...”, nina ka Bapa Morgan. “Enggo melala contoh si bage siidah, jelma si enterem e pe maklum nge ia. Uga ban adi lakin payo... Aku gia ma kueteh nge adi darehku, tapi adi la payo labo dalih adi si enggoi ”, nina ka Nande Morgan erbelas.
“Ih... aku kam nande, ban la ije kel nge permenndu e, adi begina uga denga lah akapndu bas pusuh na ah”, nina Morgan. “Mehuli nge kap sibahan carana. Si mehuli-mehuli nge siban. Adi alu cara si payo nge si ban, Mamamu ah pe labo ia keberaten”, nina Bapa Morgan. “Kam kap marenda duana ras nande sinuruh aku mbuat impal Pa. Ma tehndu nge nai lit teman ku meriah si enggo empat tahun kami erteman. Gundari ......”, nina Morgan lanai terteruskenca, erkiteken emosi janah merawa pe atena. “Gundari bagenda saja yah..., adi nande denga atendu... em ukurken. Kami pagi mulih ku kuta. Titik.” nina nande Morgan. “Payo nge anak. Adi la kin begikenko kata kami ras nandemu e sekalenda, ula nai ko ngarap dedeh kami jabumu e”, nina ka pe Bapana.
La ialoi Morgan ranan bapa ras nandena. Kem saja ia ibas inganna kundul. Tatapna ku lantai. Keramik si mbentar ngenca si teriedah bas matana erkiteken tatapenna ku lantai rumahna. Reh dekahna, reh samarna teridah lantai keramik e. Si lit bas matana eme kejadian geluhna 20 tahun si lewat. Amin gia ia sekalak dilaki itengah-tengah jabuna, tapi la kel pernah ia meneh entahpe manja. Kai sikataken orang tuana kerinana ibegiken janah ikutkenna.
****
“Labo bage Morgan, padin nge kam masuk SMA saja anakku. Adi SMM (--Sekolah Menengah Musik--) jadi kai nge kam pagi. SMA pe kam, banci nge kap kam terus les musik”, nina Nande Morgan piga tahun si enggo lewat kenca Morgan lulus SMP. “Bage kin nak, selama enda gia ma les musik nge engko..”, nina ka Bapana. “Adi bage kin nindu duana, bagepe labo dalih Nande..., lang adi ukurku kel situhuna, lebih berminat nge aku sekolah musik saja”, nina Morgan alu ngerana manjar-anjar janah patuh kel man duana orang tuana. “Bage kin anakku, adi SMA kam melala denga kel pagi si man pilihenndu kune la pagi bage atendu musik ena ndai...”, nina nandena.
Telu tahun dekahna, tamat me si Morgan SMA alu tetap ranking sada. Emaka melanjut me atena ku sada perguruan tinggi terkenal jurusen Fisika, erkiteken ilmu fisika lit kaitenna ras akustika, eme sada bagin si penting pe ibas ilmu musik. Akustika enggo pagi lit kaitenna ras musik (bunyi), emaka enggo kel berminat ia melanjut ku perguruan tinggi. Janah segi pengetahuanna pe memungkinken kel ia masuk, erkiteken ia tetap juara bas sekolahna. Emaka kenca enggo mulai sipenmaru (-seleksi penerimaan mahasiswa baru-), iturikenna me man nande bapana kerna sura-surana melanjutken sekolah ku perguruan tinggi. “Ku jurusen kai kin atendu anakku...?”, nina nandena. “Adi sura-surangku kel nande, ku Fisika ateku, sebab ilmu fisika banci denga kuterapken ku bidang akustika ibas musik,” nina si Morgan yakin. “Ih...., tah motu kel nge engko anak. Kalak nggit mbayar ratusen juta gelah banci masuk ku kedokteran, enda engko dalan enggo me lit, pemetehmu pe lit, engkai kin maka la pilihko ku kedokteran...??”, nina bapana setengah heran. “Ii..., aku dah kam Pa, labo kel minat aku ku kedokteran ena...”, nina Morgan. “Payo nge bagi kata bapandu ah anakku, adi dokter saja uga kin...dat nge min akap kami kam bas negeri, adi nggit kam ku kedokteran bas perguruan tinggi si apai pe atendu Indonesia enda pala-palai kami ras bapandu e...”, nina ka nande nambahisa. Memang secara ekonomi pe keluarga enda cukup mampu, erkiteken buah rimo pe tetap meramis, janah regana pe lit. “Lang kin gia, keluarganta pe langa lit si jadi dokter..., kune pagi keluarganta e sakit ma banci tambarindu. Mbelin kel gunana pe kam man kade-kadenta..”, nina ka Bapa Morgan tole. “Adi dokter ma idahndu, sukses kerina geluhna... janah mehaga anakku..”, nina Nande Morga ka. “Labo kerina bage dokter nande, lit nge kuidah dokter, bapa temanku sekolah, engkawil ngenca perasatna, adi merhat kam banci kutuduhken man bandu. Langa jarumna kalak, langa suin. La kin ije bidangna...”, nina Morgan.
“Jadi kuakap, em sipayona. Adi isindu pagi formulir sipenmaru ndai, pilihlah kedokteran”, nina Bapana. Emaka iikuti si Morgan me kai sini enggo iputusken orang tuana. Kenca pengumumen ndarat, emaka ndarat me gelar si Morgan, janah masuk me ia ku perguruan tinggi alu jurusen kedokteran. Meriah pe ukur keluarga kerina, emaka ibahan me acara syukuren, janah mbulak ka pe si empat nahe.
Amin gia labo sura-surana kel, tapi i Kedokteran pe tutusina kel erlajar. Semester pertama nomor lima nilai na simeganjangna. Tapi ibas semester sipeduaken nilaina simeganjangna. Emaka banci dungina kuliahna lebih cepat asa waktu siitentuken. Sanga ia kuliah enggo ka pe imulaina erteman-teman ras sekalak diberu, eme suku Tionghoa nari. Yap Hui Tjin gelarna. Situhuna maka erteman pe ras Yap Hui Tjin enda, erkiteken gigih kel idahna diberu enda ndai. Eme rusur saingenna ibas erlajar. Semester pertama nilai Yap Hui Tjin enda me simeganangna. Emaka erkiteken sama-sama beluh, janah rusur pe erlajar ras diskusi ras-ras, emaka mulai me turah atena ngena sapih-sapih ia duana. Telu tahun dekahna kalak enda erteman, janah enggo pe sempat icakapken kerna sura-suura erjabu.
“Erkiteken enggo dung persekolahen anak kami Si Morgan, emaka iundang kami kita kerina wari Sabtu enda, gelah ras-ras kita kerina man i jabu kami, erkiteken meriah kel ukur kami, enggo dung ia i wisuda...” nina bapa Morgan ras nande Morgan ngerana ibas gereja kenca dung kebaktin. Emaka inehen pe ibas momo tuhu galang itamana persembahen pengataken bujurna. Kerina sair banna, lit guna suka makmur, alpha omega, permata, kesejahteraan pandita, ulih siermakan, termasuk pe kesejahteraan pegawai gereja.
Ibas acara syukuren e, reh pe kerina sangkep nggeluh, bagepe kerina anggota perpulungen lalit sitading-tading. Emaka iban ka pe acara erbelas ibas sangkep nggeluh. Ibas tegun kalimbubu ngerana, tersena ibas babah kalimbubu nari ngatakenca alu erjagar-jagar, tapi mbelin kel ertina, nina: “Selamat man kam bebere kami ibas enggo dung persekolahenndu. Malem kel ate kami mamandu, mamindu ngidah kam tuhu-tuhu bengket ajar. Ternen-ternen kam, impalndu enggo melala mbelin....”, nina Mama si Morgan i Lubang Ido nari. Bagem acara e pe erdalan alu mehuli janah puas kel ate orang tua si Morgan.
Kenca enggo idungina masa PTT-na i Kalimantan, mulih me si Morgan ku kuta, janah ijumpaina pe Yap Hui Tjin si enggo ka pe dung PTT. Iputusken me maka ibas tahun e ka me kalak enda erjabu. Emaka ibas sada wari, ibabana me Yap Hui Tjin kujabuna, ipeseh si Morgan me atena sura-surana e man duana orang tuana. Perban enggo idah orang tuana diberu e ras Morgan, mis orangtuana curiga, janah minter macem ayona. Salamina pe diberu e, tapi la atena tutus. Bagepe Yap Hui Tjin sensitif ngidah orang tua Morgan, emaka karaben minter ia mulih ku kutana, amin gia nginap nge min atena.
Berngina kenca elah man, ipeseh si Morgan me sura-surana erjabu ras kalak Cina ndai man duana orang tuana. Minter kel merawa duana orang tuana. “Kalak Cina ka atem, anak mamamu ah pe melala mejile... Siapai atem, aku ngerana man mami mu ah..., eh dehko enggo salah pe. Ngerana ras mamim ningku ka..., nande mu e maksudku ngarihkenca...”, nina Bapana. “Sentabi aku pa enggo telu tahun kami erteman kuliah ndube, emaka dua tahun enda pe kami tetap nge berkomunikasi jarak jauh. E sekali enda mindo aku bandu gelah sehindu sura-sura kami, ngarap kel aku man kam bapa ras nande..”, nina. “Pokokna la banci...”, nina Nande Morgan alu mekpek meja. “Adi ah ndai kin buat ko, ndelis aku.... gundari ukurken apai pangen kalak Cina ah ndai asangken aku... Enggo pebelin-belin, sekolahken... encage... pokokna la banci. Lang !! Titik !!” nina nande Morgan alu cukup emosi.
“..........Ula atendu morah gi, amin gia kita sirang bas ukurku tetap nge kam. Tapi amin bage gia, guna kiniulinta ras-ras, lupakenlah aku. La padanta ban Dibata. Amin gia kueteh mberat nge ngelupankenca. Kutotoken kam pe jumpa pagi ngena si ngena atendu. Bujur. Morgan......” Bagem nina surat Morgan terakhir man Yap Hui Tjin, erkiteken enggo ipersada keluarga arih, maka ipejabu me si Morgan ras impalna, permen nandena kel.
“Salah kel kami ras bapandu anakku, emaka mungkin erkiteken kitik kel nge nai ukur Beru Cina ndai itadingken kam ia, entah e nge makana lalap la lit kempu kami. Emaka adi nggit denga nge Beru Cina marenda man bandu, enggo me persada kena saja arih kena. Tadingken saja permen kami ah....”, nina Nandena man Morgan reh ndahi anakna ku Jakarta. “Lang nande, erjanji kel marenda aku lebe-lebe pandita, aku erpadan tetap setia, pala kematen nirangken kami ningku marenda... Emaka lang Nande.... lang Bapa... ula nai aku ibabandu kubas dosa.....”. “Gundari apai pe nim ue ken kami, gelah lit lah kempu kami....” nina ka Bapana.
Ndekah kel inget si Morgan marenda nats khotbah sini ibuat pandita ibas acara pemasu-masun perjabunna, eme I Petrus 3 : 1-7, eme kerna ndehara ras perbulangen. Nina pandita tupung si e, “Kam duana arus sikeleng-kelengen ibas jabu, adi kam sikeleng-kelengen, maka epe jadi persembahen man Tuhan. Tole pe maka kam si Morgan arus jeli ras bijaksana erndeharaken ndehara si lemah daging kulana.. Ula kel kerna sada masalah maka kam lanai siangkan, tapi rembakkenlah dirindu tetap man Tuhan.”
Bagepe ibas acara pemasu-masun e ibacaken padita ka pe Matius 19:3-6. “Banci kin ulihken kalak ndeharana kerna kai-kai gia sebabna ? Ma enggo ioge kam maka mula-mulana nari ijadiken sinepasa dilaki ras diberu nge ? Sabab e itadingken manusia nande bapana gelah ras ndeharana ia, janah si dua kalak e jadi sada kula me kap; lanai dua dage ia sada kula nari nge. Dagena si enggo ipersadaken Dibata, la arus isirangken manusia.....” Bagepe sanga tukar cincin marenda ibacaken pandita ka pe sada ayat nari, eme Roma 15:13, “Dibata sumbul pengarapen, Ia lah sindemi kam alu keriahen ras kemalamen ate, erpalasken kinitekenndu man baNa, gelah erkiteken gegeh Kesah Si Badia reh tambahna pengarapenndu man baNa”. Emaka amin gia enggo pitu tahun dekahna Morgan erjabu tapi lenga dat tuah, tapi ertambah-tambahna kinitekenna man Tuhan amin melala gia rusur pedah la jore.
“ Lang nande...., lang bapa. Lang !!”, nina. “Ula kel kitik ukurndu amin sekali enda la ku ikutken ajarndu. Ula kel ndele atendu adi sekali enda kutogan kam duana”. Lanai ngerana sengkebabah pe nande ras bapa Morgan. Kerina kundul sinik. La ngerana.
Bjg. Menteng, Agustus 2006.
Comments