TURI-TURIN KARO
Kak Tangko Bunga
I bas sada kuta nai lit
sekalak nini-nini ras 2 (dua) kalak kempuna. Tupung nangkih-nangkih matawari
ijemur nini e bunga (kapas) i tengah kesain. Perban mbiar ia bergehen adi
karaben erpangir, e maka isuruhna 2 (dua) kalak kempuna guna ngiani bunga e,
emaka lawes ia ku tapin guna erpangir.
Kempuna si 2 (dua) enda, sada pasek, sada nari pentang. Tupung mulih nini enda i lau nari idahna lanai lit bunga e i bas inganna ijemurken.
Nina nini enda nungkun man kempuna: “Ja bungangku ndai, kempu ?”.
Nina kempuna si pentang: “Kubegi ndai sorana, kak...kak...nina. Tapi labo ndai kuidah tah ia nge muatsa bunga e”.
Jenari nina ka kempuna si pasek : “Kuidah nge ndai reh perik mbiring rupana, agak galang. Bendutna nge ndai kuidah bunga e, tapi labo kubegi sorana. Kuolangi ateku, enggo leben ia kabang”.
E maka ipindoken nini e man perik kak gelah iutahkenna bunga e.
Tapi nina kak : ”Labo lit kubendut, banci nge bas ture kenjulu cibal bungandu e”.
Inen nini e bungana ku ture kenjulu, tapi la lit i je.
E maka nina ka kak : ”Adi bage i ture kenjahe nge”.
Inen nini enda ka ku ture kenjahe, i je pe la lit.
Nina ka kak : ”Adi bage i datas para nge cibalna”.
Inen nini e ka ku datas para, je pe la lit.
Rukur nini e uga dalanna guna ndatken bunga e mulihi.
E maka mindo penampat ia man eltep, nina : “O, eltep sampati sitik aku, eltepndu sitik kak ah, sebab tangkona bungangku”.
Nina eltep : ”Aku laaang....”.
E maka ijumpai nini enda sekin, janah nina : ” O, sekin sampati sitik aku, campengndu sitik eltep ah, sebab la ia nggit ngeltep kak. Kak tangkona bungangku”.
Nina sekin : ”Aku laaang...”.
Jenari mindo penampat ka nini enda man rara, nina : ”O, rara, rarai sitik sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina rara ngaloi : ”Aku laaang....”.
E maka lawes nini enda mindo penampat man lau, nina :”O, lau, nimpetti sitik rara, sebab rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina lau :”Aku laaang....”.
E maka idahi nini enda ka uruk, nina : ”O, uruk sampati aku, tombeng sitik lau, sebab lau la nggit ngeninpatti rara, rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina uruk ngaloi : ”Aku laaang.....”.
Enggo latih iakap nini enda ndungi soalna, janah tetap idaramina dalan. E maka ijumpai nini enda ka kerbo, nina man bana : ”O, kerbo sampati sitik aku, egas sitik uruh ah, sebab la ia nggit nombeng lau, lau la nggit ngenimpetti rara, rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina kerbo ngaloi : ”Aku laaang.....”.
Jenari lawes ka nini enda njumpai erpo, nina : ”O, erpo sampati sitik aku, ranto sitik kerbo ah, sebab la ia nggit ngegas uruk, uruk la nggit nombeng lau, lau la nggit ngenimpetti rara, rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina erpo ngaloi : ”Aku laaang.....”.
Jenari ijumpai nini enda menci, janah nina : ”O, menci sampati sitik aku, kettep sitik erpo, sebab la ia nggit ngeranto kerbo, kerbo la nggit ngegas uruk, uruk la nggit nombeng lau, lau la nggit ngenimpetti rara, rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina menci ngaloi : ”Aku laaang.....”.
E maka ijumpai nini enda kucing, nina : “O, kucing, rigep sitik menci, menci la nggit ngettep erpo, erpo la nggit ngeranto nkerbo, kerbo la nggit ngegas uruk, uruk la nggit nombeng lau, lau la nggit ngenimpetti rara, rara la nggit ngerarai sekin, sekin la nggit ncampeng eltep, eltep la nggit ngeltep kak, kak tangkona bungangku”.
Nina kucing ngaloi : ”Ja kin ndai menci ndai gelah kurigep ras kupan ia”.
Perban mbiar menci irigep kucing, emaka nina alu rende : ” Ula aku rigepndu, kukettep gia erpo”.
Nina erpo : ”Ula aku kettepndu, kuranto gia kerbo”.
Nina Kerbo : ”Ula aku rantondu, kuegas gia uruk”.
Nina ka uruk : ”Ula aku egasndu, kutombeng gia lau”.
Nina ka lau : ”Ula aku tombengndu, kunimpetti gia rara”.
Nina rara ngaloi : ”Ula aku nimpetti, kurarai gia sekin”.
Ban mbiar sekin irarai, e maka nina : ”Ula aku rarai, kucampeng gia eltep”.
Reh nina eltep : ”Ula aku icampeng, kueltep gia kak”.
Perban mbiar kak kena eltep, e maka nia : ”Ula aku ieltep, kuutahken gia bunga ndai”.
Emaka iutahken kak me bunga e, janah iulihkenna man nini ndai.
Bage me bas geluh enda, adi la mejile perbahanenta, nandangi reh me si naluken kita.
Comments