BERU PUHUN

Julianus P Limbeng

“Aku ise pe pagi buatko jadi permen kami labo kuakap dalih anak, sipenting keleng atena kami ras nandemu e..’, nina bapa man bangku tupung engkawil kami i kolam pancing Makarona. La kualoi cakap bapa e. Cirem saja aku, janah terus kunehen ujung kawilku, entah mawen kari dek-dek binurung ateku. Tarik bapa kawilna, keri empanna, tamana ka empanna tak-takna ka mulihi ku kolam si lau na megembur e. Agingku si Butet ras Nande pe erbual-bual bas sapo-sapo bagi payung sini enggo isikapken deher kolam e. Memang adi nehen umurku, enggo me pantas aturna aku erjabu. Kenca kin aku mulih ndungi sekolah Inggris nari, janah pendahin pe cukup-cukup pan enggo me lit, sekali pe la pernah kuturiken man bapa kerna temanku meriah, amin gia hubungenku ras bapa bagi erkandu-kandu deherna. Erkiteken lampas marenda bapa erjabu, emaka bagi ersenina kataken kalak kami rusur, erkiteken banci ikataken bapa awet muda.
“Jadi bagenda nge dah ko, ngulihi rananku sanga kita engkawil ndai…”, nina ka bapa mulihken kenca kami elah man ciger kolam ndai. “Sura-sura kami ras nandemu e, adi enggo me lit pendahinmu, kai nari kin man timanken, tah enggo me banci ko rukur.., apai pe labo dalih…” nina bapa. “bage kin anakku, uga kin.., enggo kin lit teman-temanndu..”, nina ka nande. “Langa bo lit nande, marenda memang lit, tapi kalak Inggris.. gundari…”, ningku la kuterusken. “Apai pe labo kap dalih nina bapandu ah, tapi adi banci min kalak Indonesia lah, la kari antusi kami cakapna, la kel kuakap puas kari erpermain adi bage…”, nina nande. “Bagelah… adi bahasa Indonesia iangka denga, adi bahasa Manggris, e la angka kami anak..”, nina ka bapa nambahisa. “Lang pe adi la kalak Karo kurang pantas kuakap, sebab la tehna mehangke… ”, nina nande. “Iakh… ah…, lang simehulina min kalak Karo, ise pe labo dalih.. adi bahasa Karo ia puas kin siakap pe ngerana ras ia.. “, nina ka nande tole.
Kem saja aku, la kujawab. “Lang anak mamandu si Kuta Jurung ah pe enggo me mbelin.., mamandu si Pernangenen pe bage ka nge..”, nina ka nande tole. “Adi aku, engko ngah nak.., sipenting adi aku kel, adi banci min kalak Karo…”’ nina bapa janahna pekena moranna ka mulihi. “Impal pen ningen engko ngah, lang anak mamamu ah Jakarta ah nge ia marenda sekolah, saja tah piga enggo banna surat lamaren ndai lalap nge kuidah la erdahin…. Lang si Delitua ah.. e mantap.. asal idahna aku i tiga uga pe perkuankenna naring..”, nina bapa janahna mulihken ka ku kolam engkawil. Ibas ukurku, asak-asak tuan kebun kuakap ban bapa ras nande man bangku. Adi ndai si penting kalak Indonesia nina, gundari adi banci min kalak Karo nina. Ka. Emaka mis kubuat kesimpulen, ugape lit nge tembaken bapa ras nande si special. Sebab kalak Karo pe nina e la ka bo sembarang kalak Karo. Ugapa pe tertujunge ku sekalak singuda-nguda si beruna seri ras beru nande. Beru Puhun. Saja anak mama siapai atena la kueteh.....
Sitik pe la kujawab ranan nande ras bapa e, erkiteken gigih kel bapa selama enda nekolahken kami duana ras agingku si Butet amin gia pendahinna nderes karet ngenca. Dukung bapa kel kami duana sekolah, seh maka kudat pe bea siswa sekolah ku luar negeri. Adi ue ningen bagi si mberat ka kel sitik ibas pusuhku, tapi ada lahang ningen mbiar ka kel aku ceda ukur nande ras bapa. Emaka cirem saja aku mbegi-mbegi rananna. Mbiar aku keriahen ukur kami pulung-pulung bage rupana jadi ayo berjut mulih ku rumah.
”Uga dage anak.., labo denga kap jawabmu cakap kami ndai..” nina ka bapa elah kenca kami man. ”Enggo me meriah ukurta, adi enggo ka engko tamat sekolah bagena. Aku dah ko.., adi enggo ko erpengue... pang aku ngerana man turangku ah..., ihh.. ihh... kao kari enggo lepak pe aku e...”, nina ka bapa. ”Uga kin kam e pak, labo ise pe erkuan ras turangkuna...”, nina ka nande. ”Em ban semangatna aku, meriah kel ukurku adi jumpa anak enda ras impalnah... piah enggo ka salah pe... haha... haaa....” nina bapa janahna tawa. ”Iak ah labo man paksan pak... adi jumpa kin kari atena, labo kujapa pe.. tempa-tempa kam ka kuidah semangaten ena..”, nina nande. ”Ih... semangat nindu, ise kin akapndu la semangat pejumpa anakna ras permenna, impal ketat ka kel...”, nina ka bapa tole janahna naktakken kawil ka mulihken ku kolam pancing. Agingku si Butet tempa-tempa la ia peduli cakap kami erkiteken sora musik arah HP-na nari tetap leket kubas cupingna, janahna mbaca novel beru Sembiring. ”Uga dage nak...”, nina bapa lanai sabar megi jababenku. ”Oh adi kam pe pa...” ningku ngenca.
“Adi kami ras nandemu e tamat SMP ngenca, tersekolahken kami kena duana ku fakultas ma enggo me jago kami e. Adi masalah dahin labo man daramen dahin, tapi bahanlah dahin e ndarami kita. Tutusi lebe sekolah, banci erteman-teman, tapi arus jaga gelah ula e erabahanca ketadingen persekolahen. Adi banci la pe lebe erteman-teman reh jilena. Adi enggo pagi engko berhasil reh sendiri nge diberu e, milihi anak.. ” Bagem nina bapa marenda man bangku tupung aku masuk ku Fakultas Teknik USU Medan. Emaka tuhu-tuhu kel kuinget paedah bapa e. Emaka tutus kel ateku sekolah, janah lampas pe aku dung. Adi kalak pitu tahun maka dung, aku empat tahun setengah enggo kuban dung, janah langsung ka kudat bea siswa ku Inggris.
Sanga wisuda pe marenda, malem kel ate nande ras bapa, erkiteken igelari pembawa acara eme gelarku si pemenana, janah tedis kami duana ras bapa ibas ingan kami kundul. Aku berhasil jadi juara pertama ras lulusen terbaik alu judicium cum laude. Dua bulan kenca e berangkat ka aku mis ku Oxford ngelanjutken kuliahku. Ijah pe labo ndekahsa enggo kudat magisterku, janah lanjut ka pe ku program doktoral. Kubegi maka tuhu-tuhu meriah kel ate kerina keluarga erkiteken kudat sekolah i Inggris. Kubegi maka pujiken bapa ras nande kal aku rusur. I kedei kopi, i perpulungen jabu-jabu, kerja-kerja, bagepe acara simate-mate pe megati turiken bapa kerna kecibalku man kalak amin gia la sungkun kalak. Bangga kel bapa kerna ketutusenku sekolah. Enem tahun dekahna aku Inggris sekolah, janah sempat pe aku itawari sada perusahaan terkenal erdahin je. Tapi kuputusken lebe mulih ku Indonesia.
Dua minggu denga aku Tiga Juhar marenda, la kuja-kuja denga pe perdalanku. Kupuasi kel ateku ngerana-ngerana ras keluarga. Bagepe ban bapa ka marenda acara meriah ukur, janah ngundang mama ras mami lengkap ras gendang kibotna kerina. Bagepe sangkep kami nggeluh kerina, baik si i Buluh Belin, Pernangenen, Rambe, Kuta Jurung, bagepe Durin Tinggung iundang bapa kerina. Lengkap kerina reh impal-impalku. Tempa-tempa kuakap acara meriah ukurku berlebihen man bangku, erkiteken mbue terhebaten bagi aku kuidah labo bage kel acara iban orang tuana. Tapi gelah meriah kel ukur bapa, bagem acara e kuikuti alu ukur meriah. Iundang bapa ka pe pandita erbahan renungen, janah kerina kade-kade si reh mbereken pedah-pedah. Isi pedah e kerina rata-rata ngataken ndarami teman nggeluh, bagepe kalimbubu e kuidah ngataken impalku enggo me mbelin. Memang lit sada anak mama e si minter kin tus-tusna pusuhku. Labo erkiteken jilena rupana, tapi mis kin kuakap jodu ras aku.
”Iakh... iakh.....Ou.., lepas ka pe... nurung emas nge ndai...”, nina bapa narik kawilna. Nande ras agingku si butet enggo tertunduh ibas sapo-sapo si lit i kolam pancing e. Deheri bapa ku inganku engkawil. Tamana kobe ku kawilna, janah tak-takna ka mulihken. Alu manjar-anjar engerana ndeher ku cupingku. ”Aku dehko anak, arah pusuhku nari kel e ngerana. Adi banci min, enggo meriah kel ukur kami duana ras nandem, bagepe kerina keluarga erkiteken tutus atem ibas persekolahenmu, emaka nina ukurku, gelah permen kami e ka lah pagi si ngenanami ketutusen anak kami e, meriah kel ukur kami ras nandem, mamamu, mamim, adi salah sada impalmu e buat ko. Adi impalmu mue buat ko, enggo simpar kel ate kami malem e eranakken anak kami, anak si pupus ndube...”, nina bapa janahna natap ndauh. Tempa-tempa erkhayal ia ... ”Sibahan kel pepagi kerja sintua, siundang kerina kade-kadeta e, adi tadingken kami pe pagi doni enda, malem kel ate kami...” nina ka bapa tole. ”Emaka la gia gundari jawabko labo dalih, tapi em gelah enggo kupeseh ukur kami ras nandem..,” nina bapa. Kutatap ayo bapa alu tutus ras serius. ”Pa.. marenda nari kai pe nindu kuikutken lalap, emaka ula kel kitik ukurndu sekali enda....”, ningku janahku nahan kata-kata si ndarat ibas biberku nari. ”Uga maksudmu... simbak ko katangku ndai...” nina bapa alu medas sitik bahanna sorana. ”Ula kel kitik ukurndu duana ras nande, bagepe mama ras mami kerina pa, adi sekali enda... pe tetap nge kuikutken katanndu...” ningku. Rempet dakep bapa aku, janah ngambengken kawilna ku kolam. Menam la terlepasken bapa dakepenna man bangku. Kawil bapa si tarik binurung pe lanai diatena. ”Bujur nak...” nina bapa.

Bekasi, 22 September 2008. (Selamat HUT Mama Xeane Fu..)